ސްޕޭނުގެ ފޯވަޑް ޑެނީ އޮލްމޯ ކުޑައިރުއްސުރެ ދެކެމުން އައި ހުވަފެން ކަމަށްވާ އޭނާ ސަޕޯޓްކުރާ ބާސެލޯނާ އަށް ކުޅެން އެންމެ ފަހުން ބަދަލުވެވިއްޖެ އެވެ.

ރަސްމީކޮށް ބާސެލޯނާގެ ކުޅުންތެރިއެއްގެ އޮލްމޯ ދައްކާލުން އޮތީ ހުކުރު ދުވަހު ހަވީރު އެވެ. އެއަށްފަހު އޭނާ ބުނީ އެނބުރި އާދެވުމުން ވަރަށް އުފާވެއްޖެ ކަމަށެވެ.

ބާސެލޯނާގެ ފުޓްބޯޅަ އެކަޑަމީ ކަމަށްވާ ލަމާސިއާގައި ކުޑައިރު ހޭދަކުރި ކުޅުންތެރިޔާ އަލުން އެކުލަބަށް ގަތީ ޖަރުމަނުގެ ލައިޕްޒިގަށް 60 މިލިއަން ޕައުންޑް ދޭގޮތަށެވެ. މީގެ ތެރެއިން ވަގުތުން ދޭން ޖެހެނީ 47 މިލިއަން ޔޫރޯ އެވެ. އަނެއް ބައި ދެން ޖެހެނީ އޮލްމޯ ކުޅޭ މެޗުތަކަށާއި ހޯދާ ތަށިތަކަށް ބަލައިގެންނެވެ. ނަމަވެސް ތައްޓެއް ނުލިބުނަސް ބާސެލޯނާގެ 60 ޕަސެންޓް މެޗު އޭނާ ކުޅެފިނަމަ މި ފައިސާ ދޭންޖެހޭނެ އެވެ.

26 އަހަރުގެ ފޯވަޑަކީ އާ ސީޒަނަށް ބާސެލޯނާ ވަރުގަދަ ކުރުމަށް ގެނައި ފުރަތަމަ ކުޅުންތެރިޔާ އެވެ. ބާސެލޯނާގެ އޮފީހުގައި އޭނާގެ ކޮންޓްރެކްޓްގައި ހުކުރު ދުވަހު މެންދުރު ސޮއިކުރީ ކުލަބުގެ ރައީސް ހުއާން ލަޕޯޓާ އެވެ. މި އެގްރީމަންޓްގެ މުއްދަތަކީ ހަ އަހަރު ދުވަހެވެ. އޭނާ ވިއްކާލާނަމަ އެކަމަށް ހަމަޖައްސާފައިވާ އަގަނީ 200 މިލިއަން ޔޫރޯ އެވެ.

އޮލްމޯ އަކީ މި އަހަރު ބޭއްވި ޔޫރޯ ފުޓްބޯޅަ މުބާރާތް ސްޕޭނަށް ކާމިޔާބުކޮށްދޭން އެންމެ މޮޅަށް ކުޅުނު އެއް ކުޅުންތެރިޔާ އެވެ. އޭނާ ވަނީ ތިން ގޯލު ޖަހައި މުބާރާތުގެ ރަންބޫޓު ވެސް ހާސިލްކޮށްފަ އެވެ.

ބާސެލޯނާ ވަރުގަދަ ކުރުމަށް ގެނައުމަށް މަސައްކަތް ކުރާ އަނެއް ކުޅުންތެރިއަކީ ސްޕޭނުގެ ވިންގާ އެތްލެޓިކް ކުލަބުގެ ނިކޯ ވިލިއަމްސް އެވެ. އޭނާ  ނުލިބޭނަމަ ބަޔާން މިއުނިކްގެ ކިންގްސްލީ ކޯމަން އެވެ.