ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވުޒާރާ އަކީ ޤާނޫނު އަސާސީގެ ދަށުން އުފެއްދޭނެ މިނިސްޓްރީ އެއް ނޫންކަމަށް އިހަވަންދޫ ދާއިރާގެ ކުރީގެ މެމްބަރު އަހުމަދު އަބްދުﷲ ވިދާޅުވެއްޖެއެވެ.

އޭނާ އެފަދައިން ވިދާޅުވި ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ.

އޭނާ ވިދާޅުވީ ރާއްޖޭގައި އޮތީ ދެ ފިކުރު ކަމަށާއި އެއީ އެމްޑީޕީގެ ފިކުރާއި އެއާއި އިދިކޮޅު ފިކުރު ކަމަށެވެ. އޭގެ ތެރޭގައި ޑީއާރްޕީ، ޕީޕީއެމް އަދި ޕީއެންސީ އޮތް ކަމަށް އޭނާ ވިދާޅުވިއެވެ. ކަން މިހެން އޮތް އިރު އެމްޑީޕީ އަކީ ލާމަރުކަޒީކޮށް އިދާރާތައް ހިންގަން ބާރު އަޅާ ފިކުރެއް ކަަމަށާއި ދެން އޮތީ ބާރުތައް ހިފަހައްޓާ، މަރުކަޒީ ވިސްނުމުގެ ފިކުރެއް ކަމަށް އޭނާ ވިދާޅުވިއެވެ. އެއީ ލާމަރުކަޒީ ނިޒާމް މަސައްކަތް ކުރަން ކެނޑިނޭޅި މަސައްކަތްކުރަމުން އައި ފިކުރެއް ކަމަށް އޭނާ ވިދާޅުވިއެވެ. އެގޮތުން ކުރިންޕީޕީއެމްގެ ވެރިކަމުގައި، ކުރީގެ ރައިސް އަބްދުﷲ ޔާމީންގެ ރައީސްކަމުގައި ކައުންސިލްތަކަށް ބޮޑެތި ގޮންޖެހުންތަކާއި ދިމާވި ކަމަށް އޭނާ ވިދާޅުވިއެވެ. އޭރު މިހާރުގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު، ހައުސިން މިނިސްޓަރކަމުގައި ހުންނަވައިގެން ކައުންސިލްތަކުގެ ބާރުތައް އެ މިނިސްޓްރީގެ ދަށަށް ބަދަލުކުރައްވާފައިވާ ކަމަށާއި، ސަހަރާ ބެލެހެއްޓުމާއި ވިހާ މަރުވާ މީހުންގެ ހިސާބުތައް ބެލެހެއްޓުން ނޫން ހުރިހާ ކަމެއް އެ ވުޒާރާގެ ދަށަށް ބަދަލުކުރެއްވި ކަމަށް އޭނާ ވިދާޅުވިއެވެ. ކުރިން ވެސް ޕީޕިއެމްގެ ވެރިކަމުގައި ކައުންސިލްތަކަށް ނިކަމެތިކަން ދީފައިވާ ކަމަށް އޭނާ ވަނީ ވިދާޅުވެފައެވެ.

މިހާރު ސަރުކާރުން މަސައްކަތް ކުރަނީ އަވަސް އަރުވާލައިގެން ލާމަރުކަޒީ ޤާނޫނަށް ބަދަލުތައް ގެންނަން ކަމަށާއި އެއީ ސުވާލު އުފެދޭ ކަމެއް ކަމަށް އޭނާ ވިދާޅުވިއެވެ. އަދި ޚަރަދު ކުޑަކުރުމަށް އެ ބަދަލުތައް ގެންނަ ކަމަށް ވިދާޅުވާ އިރު ސަރުކާރުގެ މަތި ބަރުކޮށް ހިންގުން ހުއްޓާލުން ކީއްތޯ އޭނާ ވަނީ ސުވާލުކުރައްވާފައެވެ. މި ސަރުކާރުން އިންތިޚާބީ މަޤާމުތަކާއި މެދު ޢަމަލުކުރާ ގޮތަށް އޭނާ ވަނީ ފާޑު ވިދާޅުވެފައެެވެ.