މެންޗެސްޓަރ ސިޓީ އަށް ކުޅެމުން އަންނަ އާޖެންޓީނާގެ ފޯވާޑް، ހޫލިއަން އަލްވަރޭޒް ހޯދުމުގެ ޑީލުގައި ސްޕެއިންގެ އެތުލެޓިކޯ މެޑްރިޑުން މިހާރު ދަނީ ލިޔެ ކިޔުންތައް ފުރިހަމަ ކުރަމުން ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 24 އަހަރުގެ ކުޅުންތެރިޔާ ސިޓީ އަށް ބަދަލުވީ 2022 ވަނަ އަހަރު އެވެ. އެ ކުލަބާއެކު އޭނާ ސޮއި ކުރީ ފަސް އަހަރާ، ބައިގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރު އެވެ. އެހެން ނަމަވެސް، އަލްވަރޭޒް ހޯދުމުގެ ޝައުޤުވެރިކަން ފާޅުކޮށް އެތުލެޓިކޯ އިން ވަނީ އޭނާ ހޯދުމުގެ މަސައްކަތް ފަށައިފަ އެވެ.

އަލްވަރޭޒް އާއެކު ކުރިއަށް ގެންދިޔަ މަޝްވަރާތަކުގައި އެތުލެޓިކޯ އިން ވަނީ އަލްވަރޭޒް ހޯދުމުގެ ޑީލް ކާމިޔާބު ކޮށްފަ އެވެ. އެގޮތުން އޭނާ ހޯދުމަށް އެތުލެޓިކޯ އިން ފީގެ ގޮތުގައި 75 މިލިއަން ޔޫރޯ ޚަރަދު ކުރާނެ ކަމަށް ވެސް ރިޕޯޓުތައް ބުނެ އެވެ. އެހެނިހެން ފީ ތަކާއެކު، އެތުލެޓިކޯ އިން ގާތް ގަނޑަކަށް 95 މިލިއަން ޔޫރޯ ޚަރަދު ކުރާނެ ކަމަށް ރިޕޯޓުތައް ބުނެ އެވެ.

މީގެ އިތުރުން މީޑިއާ ތަކުގައި ބުނެފައިވާ ގޮތުން އެތުލެޓިކޯ އާއެކު އަލްވަރޭޒް ސޮއި ކުރާނީ ފަސް އަހަރު ދުވަހުގެ އެއްބަސްވުމެއްގަ އެވެ. އެތުލެޓިކޯގެ ހުށަހެޅުން އަލްވަރޭޒް ޤަބޫލު ކޮށްފައިވާ ކަމަށް ރިޕޯޓުތައް ބުނާއިރު، އެ ކުލަބާ އެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ 2029 ވަނަ އަހަރުގެ ޖޫން މަހުގެ ނިޔަލަށެވެ. އެހެން ނަމަވެސް، އެތުލެޓިކޯގެ އެއްބަސްވުމުގައި އަލްވަރޭޒް ސޮއި ކުރަން ދުވަސް ކޮޅެއް ނަގާނެ ކަމަށް މީޑިއާ ރިޕޯޓުތައް ބުނެ އެވެ. މީޑިއާ ތަކުގައި ބުނެފައިވާ ގޮތުން އެކަމުގައި ދުވަސް ކޮޅެއް ނަގާނެ ކަމަށް ބެލެވެނީ، އެތުލެޓިކޯ އިން ލިޔެ ކިޔުންތައް ފުރިހަމަ ކުރަން ޖެހޭތީ އެވެ.

އަލްވަރޭޒް ވަނީ ސިޓީ އަށް މިހާތަނަށް ކުޅެދިން 103 މެޗުގައި 36 ލަނޑު ޖަހައިފަ އެވެ. ސިޓީ އާއެކު އޭނާ ވަނީ ގިނަ ކާމިޔާބީތަކެއް ހޯދައިފަ އެވެ. އެގޮތުން އަލްވަރޭޒް ވަނީ ސިޓީ އާއެކު، އިނގިރޭސި ޕްރިމިއާ ލީގު، އެފްއޭ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކޮށްފަ އެވެ.