ލޮސް އެންޖަލަސް އަށް ބަދަލުވާާން ރެއުސް އެއްބަސްވެއްޖެ

މިވަގުތު ފްރީ އެޖެންޓެއްގެ ގޮތުގައި ހުރި ޖަރުމަނުގެ އެޓޭކިން މިޑްފީލްޑަރު މާކޯ ރެއުސް، އެމެރިކާގެ ލޮސް އެންޖަލަސް އަށް ބަދަލުވާން އެއްބަސްވެއްޖެ އެވެ.

އުމުރުން 35 އަހަރުގެ ރެއުސް އެންމެ ފަހުން ކުޅުނީ ޖަރުމަނުގެ ބޮރޫޝިއާ ޑޯޓްމަންޑަށެވެ. ޑޯޓްމަންޑުގައި 12 ސީޒަން ހޭދަކުރުމަށްފަހު، ރެއުސް ނިންމީ އެ ކުލަބު ދޫކޮށްލުމަށެވެ. އެއީ ޑޯޓްމަންޑާ އެކު އޭނާ ސޮއި ކޮށްފައިވާ އެއްބަސްވުން ހަމަވުމުންނެވެ. އެއާއެކު ލޮސް އެންޖަލަސް އިން ވަނީ ރެއުސް ހޯދުމުގެ މަސައްކަތް މިއަހަރުގެ ޖޫން މަހުގެ ތެރޭގައި ފަށައިފަ އެވެ.

މީޑިއާ ތަކުގައި ބުނެފައިވާ ގޮތުން ރެއުސް ވަނީ ލޮސް އެންޖަލްސް އިން ހުށަހަޅާފައިވާ ހުށަހެޅުން ޤަބޫލުކޮށްފަ އެވެ. ލޮސް އެންޖަލަސް އިން ރެއުސް އަށް ހުށަހަޅަނީ އެއް އަހަރު ދުވަހުގެ އެއްބަސްވުމެކެވެ. އެހެންކަމުން އެ ކުލަބާ އެކު އޭނާ ސޮއި ކުރާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. އެ އެއްބަސްވުމުގެ މުއްދަތު ހަަމަވުމުން، އިތުރު އެއް އަހަރަށް އެެއްބަސްވުން އައު ކުރެވޭނެ މާއްދާ ވެސް ވަނީ އެއްބަސްވުމުގައި ހިމަނައިފަ އެވެ.

ލޮސް އެންޖަލަސް އަށް ބަދަލުވުމުގެ ކުރިން ފުރިހަމަ ކުރަން ޖެހޭ މެޑިކަލްގެ ކަންކަން ފުރިހަމަ ކުރުމަށް ކުރިއަށް އޮތް ދުވަސްތަކުގެ ތެރޭގައި ރެއުސް އެމެރިކާ އަށް ދަތުރު ކުރާނެ އެވެ. އަދި އެއަށްފަހު ލޮސް އެންޖަލަސްގެ ކުޅުންތެރިޔެއްގެ ގޮތުގައި ރަސްމީކޮށް ރެއުސް ދައްކާލުން ވެސް އޮންނާނެ ކަމަށް ރިޕޯޓުތައް ބުނެ އެވެ.

ރެއުސް ވަނީ ޑޯޓްމަންޑަށް ކުޅެދިން 429 މެޗުގައި 170 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ހަތަރު ތައްޓެއް ކާމިޔާބު ކޮށްފަ އެވެ. އެއީ ޖަރުމަނު ކަޕް ދެ ފަހަރު އަދި ޖަރުމަނު ސުޕަ ކަޕް ދެ ފަހަރު އެވެ. މީގެ އިތުރުން ދެ ފަހަރެއްގެ މަތިން އޭނާ ވަނީ ޑޯޓްމަންޑާ އެކު ޔުއެފާ ޗެމްޕިއަންސް ލީގުގެ ފައިނަލްގައި ވެސް ކުޅެފަ އެވެ.