ސްޕޭނުގެ ރެއާލް ސޮސިއެޑާޑްގެ މިޑްފީލްޑަރު މާޓިން ޒުބިމެންޑީ އިނގިރޭސިވިލާތުގެ ލިވަޕޫލަށް ގެންދަން މަސައްކަތް ފަށައިފި އެވެ.

ޒުބިމެންޑީ އަކީ އެންމެފަހުގެ ޔޫރޯ ފައިނަލްގައި ސްޕޭނުގެ ރޮޑްރީ އަށް އަނިޔާވުމުން އޭނާގެ ބަދަލުގައި ކުޅެން ނުކުތެ ކުޅުންތެރިޔާ އެވެ. އިނގިރޭސިވިލާތާ ދެކޮޅަށް އޭނާ ވަނީ އެ ފައިނަލްގައި މޮޅަށް ކުޅެފަ އެވެ. އުމުރުން 25 އަހަރުގެ ކުޅުންތެރިޔާ ދޫކޮށްލަން ސޮސިއެޑާޑްއިން ހަމަޖައްސާފައިވާ އަގަކީ 51 މިލިއަން ޔޫރޯ އެވެ.

ސްޕޭނުގެ ގިނަ ކޯޗުން ގަބޫލުކުރާ ގޮތުގައި ޒުބިމެންޑީ އަކީ ސްޕޭނުގައި މިވަގތު ހުރި އެންމެ މޮޅު ޒުވާން މިޑްފީލްޑަރެވެ. އަދި ސްޕޭނުގެ ގައުމީ ޓީމުގައި މޮޅަށް ކުޅުނު ދެ ޑިފެންސިވް މިޑްފީލްޑަރުން ކަމަށްވާ ބާސެލޯނާގެ ކުރީގެ ކެޕްޓަން ސާޖިއޯ ބުސްކެޓްސް އާއި މެންޗެސްޓާ ސިޓީގެ ރޮޑްރީގެ މަގާމު ދެން އަދާކުރާނެ ކުޅުންތެރިއަކީ ވެސް ޒުބިމެންޑީ އެވެ. މި ގޮތުން ބާސެލޯނާގެ ކޯޗުކަމުގައި ޒަވީ ހުރިއިރު ޒުބިމެންޑީ ގަންނަން ވެސް މަސައްކަތް ކުރި އެވެ. އެކަން ނާކާމިޔާބުވީ ފައިސާ ނެތިގެންނެވެ.

ޒުބިމެންޑީއާ ބެހޭ ގޮތުން ބަޔާން ލެވަކޫސަންގެ ކޯޗު ސްޕޭނުގެ ޒަވީ އަލޮންސޯ ބުނެފައިވަނީ ޒުބިމެންޑީ އަކީ ކޮންމެ ކޯޗަކު ވެސް ބޭނުންވާނެ ފަދަ ކުޅުންތެރިއެއް ކަމަށެވެ. މި ދެ މީހުންނަކީ އެއް ސަރަހައްދަކަށް ނިސްބަތްވި އަދި އެއް އެޖެންސީ އެއް ތަމްސީލުކުރާ ދެ މީީހުންނެވެ.

ލިވަޕޫލުން އޭނާ އަށް ޝައުގުވެރިވަނީ އެ ޓީމުގައި ޖޯޑަން ހެންޑަސަނާއި ތިއާގޯ އަލްސަންޓާރާ ނެތްތަން ފޯބެއްދުމަށެވެ. އއު ކޯޗު އާނޭ ސްލޮޓް މި ސީޒަނަށް އަދި ކުޅުންތެރިއަކު ލައްވައި ސޮއިނުކުރުވަ އެވެ. އޭނާ އާއި ލިވަޕޫލްގެ ސްޕޯޓިން ޑިޕާޓްމަންޓުން ބޭނުންވަނީ ގިނަ ކުޅުންތެރިންތަކެއް ގެނައުމުގެ ބަދަލުގައި ވަރަށް ރަނގަޅަށް ދިރާސާ ކުރުމަށްފަހު މޮޅު ކުޅުންތެރިން ގެނައުމަށެވެ.

ރެއާލް ސޮސިއެޑާޑަކީ ޒުބިމެންޑީ ކުޑައިރުއްސުރެ ކުޅެމުން އަންނަ ކުލަބެވެ. ލިވަޕޫލްގެ ހުށަހެޅުން ލިބުމާއެކު އޭނާ އަށް މިވަގުތު ޖެހިފައިވަނީ ވަރަށް އުނދަގޫ ނިންމުމެއް ނިންމަން ކަމަށް ސްޕޭނުގެ ނޫސްތަކުން ބުނެ އެވެ.