އިޒްރޭލުގެ ޕާސްޕޯޓު މަނާކުރާ ބިލްގެ މަސައްކަތް ކުރިއަށް ނުދާ ސަބަބު ސާފުކޮށްދިނުމަށް މެމްބަރު މީކާއީލް އެދިވަޑައިގެންފި
7 އޯގަސްޓު 2024 | ބުދަ 18:22މި ބިލު ކޮމެޓީގައި އޮންނަތާ 59 ދުވަސް ވަނީ ވެފައި
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް
އިޒްރޭލުގެ ޕާސްޕޯޓު މަނާކުރާ ބިލްގެ މަސައްކަތް ކުރިއަށް ނުދާ ސަބަބު ސާފުކޮށްދިނުމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް އެދިވަޑައިގެންފިއެވެ.
މި ބިލު ހުށަހެޅުއްވި މެމްބަރު މީކާއިލް ވަނީ ބުދަ ދުވަހު ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ އަށް ސިޓީ ފޮނުއްވަވައި، ބިލުގެ މަސައްކަތް ކުރިއަށް ނުދިއުމާއި، މި ބިލުގެ މަސައްކަތް ކޮމެޓީގައި އެޖެންޑާ ވެސް ނުކޮށްވާ ސަބަބު ސާފުކޮށްދެއްވުން އެދިވަޑައިގެންފައެވެ.
މެންބަރު މީކާއީލް ވިދާޅުވީ އިޒްރޭލް ޕާސްޕޯޓުގައި ރާއްޖެ އެތެރެ ނުވެވޭނެކަން ކަށަވަރު ކުރުމަށް ހުށަހެޅި ބިލު 241 ކޮމިޓީގައި އެޖެންޑާ ނުކޮށް ބާއްވާފަ އޮންނަތާ މިއަދަށް 59 ދުވަސް ވެފައިވާ ކަމަށެވެ.
މިސިޓީގައި މީކާއީލް ވިދާޅުވެފައިވަނީ 29 މެއި 2024 ގައި މަޖިލީހަށް ހުށަހެޅި، 10 ޖޫން 2024 ވަނަ ދުވަހު (20 ވަނަ ރައްޔިތުންގެ މަޖިލީހުގެ 4 ވަނަ ޖަލްސާގައި) ދިވެހިރާއްޖޭގެ އިމިގްރޭޝަންގެ ގާނޫނު އަށް އިސްލާހު ގެނައުމުގެ ބިލު މަޖިލީހުން ބަލައިގަތުމަށް ފާސްވެ، ސަލާމަތީ ޚިދުމަތްތަކާބެހޭ ކޮމެޓީއަށް ފޮނުވާފައިވާ ކަމަށެވެ.
މި ބިލު ކޮމެޓީގައި އޮންނަތާ 59 ދުވަސް ވެގެންދިޔައިރު ވެސް މި ބިލުގެ އެއްވެސް މަސައްކަތެއް ކުރިއަށް ނުގޮސް އެންމެ ކުޑަ މިނުން މި ބިލުގެ މަސައްކަތް ކޮމެޓީގައި އެޖެންޑާ ވެސް ނުކޮށްވާ ސަބަބު ސާފުކޮށްދެއްވުމަށް އެދޭ ކަމަށެވެ.
އިޒްރޭލް ޕާސްޕޯޓް މަނާ ކުރުމަށް ރާއްޖޭގެ އިމިގްރޭޝަން އާ ބެހޭ ގާނޫނަށް އިސްލާހް ގެނައުމަށް ރައްޔިތުންގެ މަޖިލީހަށް ހުށަހެޅި ބިލު ކޮމެޓީގައި އޮތް އިރު އޭގެ ފަހުން މަޖިލީހަށް ހުށަހެޅުނު ސަމޯއާ އެގްރީމެންޓްގެ މައްސަލަ މަޖިލީހުން ވަނީ ފާސްކޮށްފައެވެ.
ރައީސް އޮފީހުން 2 ޖޫން 2024 ގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވަނީ އިޒްރޭލު މީހުން ރާއްޖެ އަށް އެތެރެވޭ ގޮތަށް އޮންނަ އޮތުން ބަދަލުކުރަން ގާނޫނު އިސްލާހު ކުރަން ސަރުކާރުން އެ ދުވަހު ނިންމިކަން އިއުލާން ކުރައްވާފައެވެ. ނަމަވެސް އޭގެފަހުން މިއަދާ ހަމައަށް މި ބިލާ ގުޅޭ އެއްވެސް މަސައްކަތެއް ސަރުކާރުން ކޮށްފައިނުވެއެވެ.
