އެމްބާޕޭ އައުމުން ބެލިންހަމްގެ މުހިންމުކަން ކެނޑުނީތަ؟

ރެއާލް މެޑްރިޑުގައި އިނގިރޭސި އެޓޭކިން މިޑްފީލްޑަރު ޖޫޑް ބެލިންހަމްގެ މުހިންމުކަން ކުޑަނުވާނެ ކަމަށް ކޯޗު ކާލޯ އެންޗެލޯޓީ ބުނެފި އެވެ.

އޭނާ މިހެން ބުނީ ހުސްވި ސީޒަނުގައި މޮޅަށް ކުޅުންތެރިޔާ އަށް ފޯނު ކުރުމުން އެ ފޯނަށް ޖަވާބު ނުދީ ހުރި މައްސަލަ ފެންމަތިވުމުންނެވެ. އެންޗެލޯޓީ ބުނީ މިވަގުތު ޗުއްޓީގައި ހުރި ބެލިންހަމަށް އޭނާ ފޯނު ކުރުމުން ޖަވާބު ނުދިނުމުގެ އިތުރަށް ފަހުން ނުވެސް ގުޅާ ކަމަށެވެ. ނަމަވެސް ބްރެޒިލްގެ ފޯވަޑް ވިނީޝިއަސް ލައްވައި ގުޅުމުން ސިކުންތުކޮޅެއްގެ ތެރޭގައި ބެލިންހަމް ފޯނު ނެގި ކަމަށާއި އޭނާ އަށް ބެލިންހަމާ ވާހަކަ ދެކެވުނީ އެ ފޯނު ކޯލުން ކަމަށެވެ.

އެންޗެލޯޓި ބުނީ ބެލިންހަމަކީ ހުސްވި ސީޒަނުގައި އެންމެ މޮޅަށް ކުޅުނު އެއް ކުޅުންތެރިޔާ ކަމަށާއި ޓީމުގައި އޮތް އޭނާގެ ދައުރަށް ބަދަލެއް ނާންނަ ކަމަށެވެ. ނަމަވެސް ސްޕޭނުގެ ބައެއް މީޑިއާތަކުން ބުނަނީ ފްރާންސްގެ ފޯވަޑް އަދި ކެޕްޓަން ކީލިއަމް އެމްބާޕޭ ރެއާލް އަށް އައުމުން ޓީމުގެ ކުރި އަތުރާނެ ގޮތަކާމެދު ބެލިންހަމް ކަންބޮޑުވެފައިވާ ކަމަށެވެ. މި ގޮތުން އޭނާ އެންމެ ބޮޑަށް ކަންބޮޑުވަނީ އެޓޭކިން ރޯލެއް ނުލިބިދާނެތީ އެވެ. ސަބަބަކީ ރެއާލްގައި އެޓޭކިން ކުޅުންތެރިން އާދަޔާ ހިލާފަށް އިތުރުވެފައިވާތީ އެވެ.

ނަމަވެސް އެންޗެލޯޓީ ބުނީ މިދިޔަ މަހު ނިމުނު ޔޫރޯ ފުޓްބޯޅަ މުބާރާތުގައި އިނގިރޭސި ގައުމީ ޓީމުގައި ވެސް ފްރީ ރޯލެއް ދިނުމުން ބެލިންހަމް ދެއްކި ކުޅުމާމެދު ވަރަށް ހިތްހަމަޖެހިފައި ހުރި ކަމަށާއި ރެއާލްގައި އޭނާގެ ރޯލަށް ބަދަލު އަންނާނެ ޖާގަ ނެތް ކަމަށެވެ.

މިދިޔަ ސީޒަނުގައި ބެލިންހަމް ވަނީ 23 ގޯލު ޖަހައިފަ އެވެ. އޭނާ އެންމެ ކުޅޭ ހިތްވަނީ ފޯވަޑެއްގެ ފަހަތުންނެވެ. ނަމަވެސް ރެއާލްގައި އެމްބާޕޭ އާއި ވިނީޝިއަސް އާއި ބްރެޒިލްގެ ފޯވަޑް ރޮޑްރީގޯ އާއި އެންޑްރިކް އަދި ތުރުކީގެ އަރްދާ ގުލާ އާއި ސްޕޭނުގެ ފޯވަޑް ހޮސެލޫ ފަދަ ކުޅުންތެރިން ތިބުމުން ބެލިންހަމަށް ލިބޭ ވަގުތު މަދުވެދާނެ ކަމުގެ ކަންބޮޑުވުން އޭނާ ގެންގުޅެ އެވެ.