އެމެރިކާ، ފްރާންސް، އިނގިރޭސިވިލާތުގެ ރައްޔިތުންނަށް ލުބްނާން ދޫކޮށް ވަގުތުން ދިއުމަށް އެ ގައުމުތަކުގެ ސަރުކާރުތަކުން އަންގައިފިއެވެ.
އެމެރިކާގެ ރުހުން ލިބިގެން އިޒްރޭލުން ހަމާސްގެ ވެރިޔާ އިސްމާއީލް ހަނިއްޔާ މިދިޔަ ބުދަ ދުވަހު އަވަހާރަ ކޮށްލުމާ ގުޅިގެން މެދުއިރުމަތީގެ މަސްރަހް ނުތަނަވަސް ވަމުން ދާއިރު، އިޒްރޭލާ ދެކޮޅަށް ވަރުގަދަ ހަނގުރާމަ އެއް އީރާނުން އިސްވެ އޮވެ ކޮންމެ ވަގުތެއްގައިވެސް ފަށާފާނެ ކަމަށް ވަނީ ބެލެވިފައެވެ.
އީރާނުގައި ހުންނަވަނިކޮށް ހަނިއްޔާ އަވަހާރަކޮށްލިއިރު އޭގެ ގަޑީއިރު ތަކެއް ކުރިން ލުބުނާނަށް ހަމަލާދީ ހިޒްބުﷲ ގެ އިސް ކޮމާންޑަރެއް ކަމަށްވާ ފުއާދް ޝުކްރު އިޒްރޭލުން ވަނީ އަވަހާރަކޮށްލާފައެވެ.
ގާތްގާތުގައި ދިން މި ދެހަމަލާގެ ބަދަލު ހިފާނެ ކަމުގެ އިންޒާރު އީރާނުންނާއި ހިޒްބުﷲ އިން އިޒްރޭލަށް ވަނީ ދީފައެވެ.
އިޒްރޭލްގެ އެންމެ ގާތް މަދަދުވެރިޔާ އެމެރިކާ އިން އެ ގައުމުގެ ރައްޔިތުން ލުބުނާނުން "ޓިކެޓް ލިބެން އޮތް ގޮތަކަށް ހޯދައިގެން އަވަހަށް ފުރުމަށް" އެންގި އިރު، އިޒްރޭލް ދިފާއު ކޮށް ދިނުމަށް އިތުރު ހަނގުރާމަމަތީ މަނަވަރަކާއި ފައިޓަރ ޖެޓް ތައް މެދުއިރުމަޗަށް ފޮނުވާނެ ކަމަށް ވަނީ ބުނެފައެވެ.
މަސްރަހް ދުވަހެއް ދުވަހަކަށް ހޫނުވަމުންދާއިރު ކެނެޑާ އިން ވަނީ ރައްކާތެރި ކަމުގެ ފިޔަވަޅެއްގެ ގޮތުން އިޒްރޭލަށް ދަތުރު ނުކުރުމަށް ކެނެޑާ ރައްޔިތުންނަށް އިރުޝާދު ދީފައެވެ.
އަނެއްކޮޅުން، ޑަޗް އެއަރލައިން އާއި، ލުފްތާންސާ، އެމިރޭޓްސް، އެއަރފްރާންސް، ޓާކިޝް އެއަރލައިންސް، ސިންގަޕޯރ އެއަރލައިންސް އަދި ސްވިސް އެއަރލައިން ގެ ދަތުރުތައް އިޒްރޭލަށާއި، އީރާނަށާއި، ލުބުނާނަށް ކުރުން ވަނީ ހުއްޓާލާފައެވެ.
