ވިނަރެސް ފްލެޓުތަކަށް އެޕްލައި ކުރުމުގެ ފުރުސަތު ހުޅުވާލާފައިވާ ކަމަށް ބުނެ ދައުރުކުރަމުންދާ ލިންކަކީ ބޮޑު ސްކޭމެއް

ވިނަރެސް ފްލެޓުތަކަށް އެޕްލައި ކުރުމުގެ ފުރުސަތު ހުޅުވާލާފައިވާ ކަމަށް ބުނެ ދައުރުކުރަމުންދާ ލިންކަކީ ބޮޑު ސްކޭމެއް ކަމަށް ފުލުހުން ބުނެފިއެވެ.

ފުލުހުން ބުނީ ވިނަރެސް ފްލްޓްތަކަށް ރާއްޖޭގެ ކޮންމެ ރައްޔިތަކަށްވެސް އެޕްލައި ކުރުމުގެ ފުރުސަތު ހުޅުވާލާފައިވާ ކަމަށާއި އިތުރު މައުލޫމާތު ވެބްސައިޓުން ލިބޭނެކަމަށް ބުނެ ލިންކަކާއެކު ފޮނުވަމުންދާ މެސެޖަކީ ސައްހަ މެސެޖެއް ނޫން ކަމަށެވެ.

މި ލިންކު މެދުވެރިކޮށް ފޭސްބުކް އަދި އިންސްޓަގްރާމް ހެކްކޮށް ފްރެންޑް ލިސްޓުގައިވާ ފަރާތްތަކުގެ އަތުން ފައިސާ ހޯދަމުންދާކަން ފާހަގަކުރެވިފައިވާ ކަމަށް ފުލުހުން ބުނެއެވެ.

މީގެ އިތުރުން މިފަދަ ލިންކުތަކަށް ސަމާލުވުމަށް ވެސް ފުލުހުން ވަނީ އިލްތިމާސްކޮށްފައެވެ.

ސްކޭމްގެ ގިނަ މައްސަލަތައް ފެންމަތިވަމުންދާއިރު، ތަފާތު އެކި ގޮތްގޮތަށް އޮޅުވާލައިގެން ދަނީ ފައިސާ ހޯދަމުންނެވެ. ފޯނަށް އަންނަ އޯޓީޕީ ހިއްސާ ނުކުރުމަށާއި، ގޮތް ނޭނގޭ ލިންކުތަކަށް ނުވަނުމަށް ތަކުރާރުކޮށް ކަމާގުޅޭ އިދާރާތަކުން ދަނީ އިލްތިމާސްކުރަމުންނެވެ.

ސްކޭމްގެ މައްސަލަތަކާއި ގުޅިގެން މި އަހަރުގެ މިހާތަނަށް 300 އެކައުންޓް ބަންދުކޮށްފައިވާ ކަމަށް ބޭންކް އޮފް މޯލްޑިވްސް އިން ވަނީ ބުނެފައެވެ. އަދި 2021ން ފެށިގެން 31 ޖެނުއަރީ 2024އާ ހަމައަށް މިހާތަނަށް ގެއްލުނު ފައިސާގެ އަދަދު ގާތްގަނޑަކަށް 57.8 މިލިއަނަށް ވުރެ އިތުރު ކަމަށް ފުލުހުން ބުނެފައިވެއެވެ.