ޗެލްސީން ގަލެގާ ތަޅު އަޅުވައިފި

އެތްލެޓިކޯ މެޑްރިޑަށް ދާން އުޅޭ މިޑްފީލްޑަރު ކޯނާ ގަލެގާ ދިޔަނުދީ ޗެލްސީން އޭނާ ތަޅު އަޅުވައިފި އެވެ.

ޗެލްސީއާއެކު ގަލެގާ ހަދާފައިވާ ކޮންޓްރެކްޓްގައި ބާކީ އަދި އެއް އަހަރު އެބައޮތެވެ. މިހެންވެ އޭނާއަށް އެތްލެޓިކޯ އަށް ކުޅެން ދެވޭނީ ޗެލްސީގެ ރުހުން ލިބިއްޖެނަމަ އެވެ.

މައްސަލަ ޖެހިގެން އުޅެނީ ދެ ކުލަބުން ވެސް އޭނާ ބޭނުންވުމުންނެވެ. ޗެލްސީން ވަނީ ގަލެގާ އަށް އާ ކޮންޓްރެކްޓެއް ވެސް ހުށަހަޅައިފަ އެވެ. ނަމަވެސް ދެ އަހަރު ދުވަހަށް ދިން ކޮންޓްރެކްޓާމެދު ގަލެގާ ހިތްހަމަނުޖެހެ އެވެ. އޭނާ ބޭނުންވަނީ ޗެލްސީގެ އެހެން ކުޅުންތެރިންނަށް ވެސް ދީފަައިވާ ފަދައިން ދިގު މުއްދަތެއްގެ ކޮންޓްރެކްޓެކެވެ. ނަމަވެސް މިކަން ކުރުމަށް ޗެލްސީ އަށް އަދި އެއްބަހެއްނުވެވެ އެވެ.

ސްޕޭނުގެ އެތްލެޓިކޯ އިން އޭނާ ގަތުމަށް ޗެލްސީ އަށް ހުށަހަޅާފައިވަނީ 24 މިލިއަން ޕައުންޑެވެ. މި އަގަށްވުރެ ބޮޑަށް ޗެލްސީން ބޭނުންވަނީ ކުޅުންތެރިޔާ ހިފަހައްޓާށެވެ. ސަބަބަކީ އޭނާ މަޑުކުރުވައިފިނަމަ ކުރިއަށް އޮތް ސީޒަން ނިމުމުގެ ކުރިން އައު ކޮންޓްރެކްޓްގައި ސޮއިކުރަން ވަގުތު ލިބޭނެތީ އެވެ. އަނެއްކޮޅުން އެތްލެޓިކޯއިން ވަނީ ގޮތެއް ނިންމަން މި ހަފުތާގެ ނިޔަލަކަށް ގަލެގާ އަށް ފުރުސަތު ދީފަ އެވެ.

މިހެންވެ އިނގިރޭސި ގައުމީ ޓީމުގެ މިޑްފީލްޑަރު ވަނީ ޗުއްޓީ ކުރުކޮށްލުމަށްފަހު ކުލަބާއެކު މަޝްވަރާއަށް އައިސްފަ އެވެ. ޓީމުގެ ފަރިތަކުރުންތަކަށް އިއްޔެ އޭނާ ނުކުންނަން އޮތް ނަމަވެސް ގަލެގާ މުޅި ދުވަސް ހޭދަކުރީ ޓީމުގެ އޮފިޝަލުންނާއެކު މަޝްވަރާ ކުރުމުގަ އެވެ.

ޗެލްސީން މިހާރު ނިންމާފައިވަނީ ގަލެގާ ކޮންޓްރެކްޓް އާނުކުރާނަމަ މި ސީޒަނުގައި އޭނާ އަށް ފުރަތަމަ ޓީމުން ޖާގަ ނުދޭ ގޮތަށެވެ. މިއީ ވެސް އޭނާ ކުލަބުގައި ބަހައްޓަން ފާޑަކަށް މަޖުބޫރުކުރުވުމެކެވެ.