އިންޓަވަލް ގަޑީގައި ގާޑިއޯލާ ދެން މާ ގިނަ ވާހަކަ ނުދައްކާނެ

ކުރިއަށް އޮތް ފުޓްބޯޅަ ސީޒަނުގައި އިންޓަވަލް ގަޑީގައި މާގިނަ ވާހަކަ ނުދައްކާނެ ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

ފާއިތުވެދިޔަ ހަތަރު ސީޒަނުގައި ޕްރިމިއާ ލީގު ސިޓީ އަށް ކާމިޔާބުކޮށްދިން ކޯޗު މި ގޮތަށް ނިންމީ އޭނާގެ ކުލަބު ޕްރިމިއާ ލީގުގެ ގަވައިދާ ހިލާފުވުމުން ޖޫރިމަނާ ކުުރުމުންނެވެ. ސިޓީ ޖޫރިމަނާ ކުރީ އިންޓަވަލް ގަޑިއަށްފަހު ދެ ވަނަ ހާފަށް ދަނޑަށް ނުކުންނަންޖެހޭ ވަގުތަށްވުރެ ފަހުން 22 މެޗެއްގައި ދަނޑަށް ނުކުމެފައިވާތީ އެވެ. ސިޓީ ޖޫރިމަނާކޮށްފައިވަނީ 2.9 މިލިއަން ޕައުންޑުންނެވެ.

އެމެރިކާގައި ޕްރީ ސީޒަން ހަދަމުންދާ ޓީމުގެ ކުޅުންތެރިންނާ ބެހޭ ގޮތުން ގާޑިއޯލާ ބުނީ ކުރީ ސީޒަނަށްވުރެ ފަށަން އުޅޭ ސީޒަނުގައި ސިޓީ ފެންނާނީ ވަރުގަދަކޮށް ކަމަށެވެ. ނަމަވެސް އޭނާ ވަނީ އާޖެންޓީނާގެ ފޯވަޑް ހޫލިއަން އަލްވަރާޒްގެ ކުރިމަގާމެދު ވާހަކަ ދައްކަން އިންކާރުކޮށްފަ އެވެ.

އާޖެންޓީނާ އަށް 2022ގެ ވޯލްޑްކަޕާއި މި އަހަރުގެ ކޮޕާ އެމެރިކާ ކާމިޔާބުކޮށްދިން އަލްވާޒް އަކީ މިދިޔަ ތިން ސީޒަނުގައި ވެސް ސިޓީގައި މޮޅަށް ކުޅުނު ކުޅުންތެރިއެކެވެ. ނަމަވެސް ގަވައިދުން ފުރަތަމަ 11ގައި ކުޅެން ފުރުސަތު ނުލިބޭތީވެ އޭނާ ދަނީ އެހެން ޓީމަކަށް ބަދަލުވުމަށް މަސައްކަތް ކުރަމުންނެވެ. މި ގޮތުން ސްޕޭނުގެ އެތްލެޓިކޯ މެޑްރިޑާއި އާޖެންޓީނާގެ ކުލަބުތަކުން ވެސް ވަނީ އަލްވާޒަށް ޝައުގުވެރިކަން ފާޅުކުރަމުންނެވެ. ގާޑިއޯލާ ބުނީ އޭނާގެ ޓީމުފެ ކޮންމެ ކުޅުންތެރިއަކު ވެސް ހިތްހަމަޖެހިގެން ކުޅެން ބޭނުންވާ ކަމަށާއި އެކަމަށްޓަކައި އޭނާ އަށް ކޮށްދެންވެން އޮތް ކަމެއްވިއްޔާ ކޮށްދޭނެ ކަމަށެވެ. ނަމަވެސް ވަކިވަކި ކުޅުންތެރިންގެ ކުރިމަގާމެދު ވާހަކަ ދައްކަން ބޭނުންނުވާ ކަމަށެވެ.