ރާއްޖެއަށް ބޭނުންވާ އަސާސީ މުދާ ބަރުކުރަން އިންޑިއާ އިން އިތުރު ދެ ބަނދަރެއް ހަމަ ޖައްސައިފި
މި ބަދަލާއެކު ޖުމްލަ ހަ ބަނދަރަކުން ރާއްޖެއަށް އިންޑިއާ އިން ގެންނަ މުދާ ބަރުކުރުމުގެ އިންތިޒާމް ހަމަ ޖެހިގެންދާނެއެވެ.
ކަނދްލާ ޕޯޓު
ރާއްޖެއަށް ބޭނުންވާ އަސާސީ މުދާ ބަރުކުރަން އިންޑިއާ ގެ އިތުރު ދެ ބަނދަރެއް ބޭނުން ކުރަން އިންޑިއާގެ މައި ސަރުކާރުން ހަމަ ޖައްސައިފިއެވެ.
އަލަށް ހަމަ ޖެއްސި ދެ ބަނދަރަކީ ކަންދްލާ ބަނދަރާއި ވިޝާކަޕަތްނާމް ބަނދަރެވެ.
އިންޑިއާ ގެ މިނިސްޓްރީ އޮފް ކޮމާސް އެންޑް އިންޑަސްޓްރީ އިން 1 އޮގަސްޓް 2024 ގައި ގެޒެޓް ކޮށްފައިވާ އިއުލާނެއްގައި ބުނެފައިވަނީ އެ ގައުމުގެ ފޮރިން ޓްރޭޑް ގާނޫނުގެ ދަށުން އިންޑިއާ އިން ބޭރު ކުރުން މަނާ ކޮށްފައިވާ ނުވަތަ ކޮންޓްރޯލް ކޮށްފައިވާ ބާވަތްތަކުގެ ތެރެއިން ރާއްޖެ އަށް އެކްސްޕޯޓް ކުރުމުގެ ހުއްދަ ދީފައިވާ ބާވަތްތައް އެކްސްޕޯޓް ކުރުމަށް އިތުރު ދެ ބަނދަރެއް ހަމަޖައްސައިފި ކަމުގައެވެ.
އިތުރު ކުރި މި ދެ ބަނދަރަކީ މީގެ ކުރިން މިފަދަ ބާވަތްތައް ރާއްޖެއަށް އެކްސްޕޯޓް ކުރުމަށް ހުއްދަ ދީފައިވާ ހަތަރު ބަނދަރުގެ އިތުރަށް އިތުރު ކުރެވުނު ދެ ބަނދަރު ކަމަށްވެސް އެ އިއުލާނުގައި ބުނެފައިވެއެވެ.
އެހެން ކަމުން އިތުރު ކުރި ދެ ބަނދަރާ އެކު ކުރިއަށް އޮތް އަހަރު ޖުމްލަ ހަ ބަނދަރުން ރާއްޖެއަށް އިންޑިއާ އިން ގެންނަ އަސާސީ މުދަލުގެ ބާވަތްތައް ބަރު ކުރުމަށް ބޭނުން ކުރެވޭނެ އިންތިޒާމް ހަމަ ޖެހިގެންދާނެއެވެ.
