2034 ވަނަ އަހަރުގެ ވޯލްޑް ކަޕް ބޭއްވުމަށް ސައޫދީ އަރަބިއާއިން 15 ސްޓޭޑިއަމް ތައްޔާރުކުރާނެ ކަމަށް އެ ގައުމުން ބުނެފި އެވެ.
މީގެ ތެރެއިން 11 ސްޓޭޑިއަމަކީ މުޅިން އަލަށް ބިނާކުރާ ދަނޑުތަކެވެ. ދުނިޔޭގެ އެންމެ ގިނަ މީހުން ބަލާ އަދި އެންމެ ފޯރިގަދަ ކުޅިވަރު މުބާރާތް ކަމަށްވާ ވޯލްޑްކަޕް ބާއްވަން ނިންމާފައިވަނީ ސައޫދީ އަރަބިއާގެ ފަސް ސިޓީއެއްގަ އެވެ. އެއީ ވެރިރަށް ރިޔާދް އާއި ޖިއްދާ އަދި އަލް ކޯބާ އާއި އަބްހާގެ އިތުރުން މުޅިން އަލަށް ބިނާކުރަމުން އަންނަ ޒަމާނީ ސިޓީ ކަމަށްވާ ނިއޯމްގަ އެވެ. މި ސިޓީއަކީ 500 މިލިއަން ޑޮލަރު ހަރަދުކޮށްގެން ސައޫދީއިން ބިނާކުރަމުން އަންނަ ދުނިޔޭގެ އެންމެ ޒަމާނީ ސިޓީ ކަމަށް އެމީހުން ބުނެ އެވެ.
މި މުބާރާތަށް ސައޫދީ އަރަބިއާއިން ކަނޑައަޅާ ބަޖެޓަކީ ކޮބާކަން އަދި ނޭނގުނު ނަމަވެސް މިއީ ގަތަރުގައި 2022 ވަނަ އަހަރު ބޭއްވި ވޯލްޑްކަޕަށް އެ ގައުމުން ހޭދަކުރި 220 މިލިއަން ޑޮލަރަށްވުރެ ބޮޑު ބަޖެޓަކަށް ވާނެ ކަމަށް ގިނަ ބަޔަކު އުއްމީދުކުރެ އެވެ.
ޖުމުލަ 48 ގައުމު ކުޅޭ މުބާރާތަށް ސައުދީން ތައްޔާރުކުރާ ދަނޑުތަކުގެ ތެރެއިން އަށް ދަނޑު ހަދާނީ ރިޔާދުގަ އެވެ. މިއިން ކޮންމެ ދަނޑަކަށް ވެސް މަދުވެގެން 40000 މީހުންނަށް ވަދެވޭނެ އެވެ. އެންމެ ބޮޑު ދަނޑަކަށްވާނީ ރިޔާދުގައި ތައްޔާރުކުރާ ކިންގް ސަލްމާން ސްޓޭޑިއަމެވެ. މިތަނަށް 92000 މީހުންނަށް ކުޅިބަލަން ވަދެވޭނެ އެވެ.
2024 ވަނަ އަހަރަކީ ވޯލްޑްކަޕުގެ އިތުރުން އޭޝިއަން ގޭމްސް ވެސް ސައޫދީގައި ބާއްވާނެ އަހަރެވެ.
ތެލުގެ މުއްސަނދިކަން ލިބިފައިވާ ސައޫދީ އަރަބިއާއިން ބޭނުންވަނީ އެ ގައުމުގައި ބާއްވާ ވޯލްޑްކަޕަކީ މިހާތަނަށް ބާއްވާ އެންމެ ފެންވަރު ރަނގަޅު ވޯލްޑްކަޕަށް ހެދުމަށެވެ.
މިކަމުގައި އެންމެ އިސްކޮށް ހުންނެވީ ވަލީ އަހުދު ކިންގް މުހައްމަދު ބިން ސަލްމާނެވެ. އެ މަނިކުފާނަކީ ފުޓްބޯޅަ އަށް ވަރަށް ބޮޑަށް ލޯބި ކުރައްވާ ބޭފުޅެކެވެ. ގަތަރުގައި 2022ގައި ބޭއްވި ވޯލްޑްކަޕުގެ ނިންމުމުގެ ރަސްމިއްޔާތަށް ވެސް ވަލީއަހުދު މުހައްމަދު ވަޑައިގެންނެވި އެވެ. އިންނެވީ ފީފާގެ ރައީސް ޖިއާނީ އިންފަންޓީނޯގެ އެންމެ އަރިހުގަ އެވެ.
