އިންޑިއާގެ ކެރަލާ ސްޓޭޓްގައި ބިންގަނޑު ކަނޑައިގެން ގޮސް ކިސަޑު ފޭބުމުގެ ހާދިސާ އެއްގައި މަރުވި މީހުންގެ އަދަދު 151ށް އަރައިފި ކަމަށް ކެރަލާ ފުލުހުންނާ ހަވާލާދީ މީޑީއާ ރިޕޯޓްތައް ބުނެފިއެވެ.

ކިސަޑުގެ ތެރޭގައި ތާށިވެފައިވާ މީހުން ސަލާމަތް ކުރުމުގެ މަސައްކަތުގައި އެތައް ސަތޭކަ މީހުން ގެންދަނީ ހަރަކާތްތެރި ވަމުންނެވެ.

ބުދަ ދުވަހު އޮފިޝަލުން ހާމަކޮށްފައިވާ ގޮތުގައި ހާހަކަށް ވުރެ ގިނަ މީހުން ސަލާމަތް ކުރެވިފައިވާ ވާއިރު 187 މީހުން އަދިވެސް ވަނީ ނުފެނިފައެވެ.

ހާދިސާ ހިނގީ ވަޔަނާދް ޑިސްޓްރިކްޓަށް އަންގާރަ ދުވަހު ބޯކޮށް ކުރި ވިއްސާރަ އާ ގުޅިގެންނެވެ.

ވިއްސާރައިގެ ސަބަބުން އެ ސަރަހައްދުގައި ހުރި 400 ގޭގެ ތެރެއިން 300 ގެއަށް ގެއްލުން ލިބިފައިވާ ކަމަށް އޮފިޝަލުން ބުނެފައިވެއެވެ.

ހާދިސާ އާ ގުޅިގެން އިންޑިއާގެ ބޮޑުވަޒީރު ނަރެންދްރަ މޯދީ ވަނީ ހިތާމަ ފާޅު ކުރައްވާފައެވެ. އަދި ގެއްލުންވި ކޮންމެ އާއިލާ އަކަށް ދެ ލައްކަ އިންޑިއަން ރުޕީސްގެ އެހީ އެއް ދެއްވާނެ ކަމަށްވެސް ވިދާޅުވިއެވެ.

2018 ވަނަ އަހަރު ކެރަލާގައި ހިނގި ބިންގަނޑުކަނޑައިގެން ދިއުމުގެ ހާދިސާ އެއް ގައި އެ ސްޓޭޓުން 500 މީހުން މަރުވި ކަމަށް ރެކޯޑް ކުރެވިފައިވެއެވެ.