ޓޫރިޒަމް އިންޑަސްޓްރީގެ މުވައްޒަފުންނަށް ހަފްތާއަކު 2 އޮފް ދިނުމަށް މައުރޫފް ގޮވާލައްވައިފި
30 ޖުލައި 2024 | އަންގާރަ 06:37ޤާނޫނުތައް ތަންފީޒުކޮށް ޤާނޫނުތަކަށް އަމަލުކުރާ މިންވަރު ދެނެގަތުމުގައި ބޮޑެތި ކަންްބޮޑުވުންތަކެއް އެބަހުރި
ކެންދޫ ދާއިރާގެ މެންބަރު މައުރޫފް ޒާކިރު
ވަޒީފާގެ ޤާނޫނަށް އިސްލާޙު ގެންނައިރު، ހަފްތާއަކު 2 އޮފް ޓޫރިޒަމް އިންޑަސްޓްރީގެ މުވައްޒަފުންނަށް ދިނުމަށް ކެންދޫ ދާއިރާގެ މެމްބަރު މައުރޫފް ޒާކިރު ގޮވާލައްވައިފިއެވެ.
އަންގާރަ ދުވަހުގެ ޖަލްސާގައި ވަޒީފާއާ ބެހޭ ޤާނޫނަށް ހުށަހަޅާފައިވާ އިސްލާޙަށް ބަހުސް ކުރައްވަމުން މައުރޫފް ވިދާޅުވީ، ރާއްޖޭގެ ޤާނޫނުތައް ތަންފީޒުކޮށް ޤާނޫނުތަކަށް އަމަލުކުރާ މިންވަރު ދެނެގަތުމުގައި ބޮޑެތި ކަންްބޮޑުވުންތަކެއް އެބަހުރި ކަމަށެވެ.
ވަކިން ޚާއްސަކޮށް ވަޒީފާއާ ބެހޭ ޤާނޫނުގައި ބަޔާންކޮށްފައިވާ ކަންކަން ތަންފީޒު ކުރުމުގައި ޤާނޫނީ އިދާރާތަކުން ފަސްޖެހިފައިވާކަން މައުރޫފް ފާހަގަ ކުރެއްވިއެވެ.
މައުރޫފް ވިދާޅުވީ، މިހާރުވެސް މިނިމަމް ވޭޖް ބޯޑު އެކުލަވާލައި ބައްދަލުވުންތައް ބާއްވަން ޖެހޭނެކަމަށް ވަޒީފާއާ ބެހޭ ޤާނޫނުގައި އޮންނާނެ ކަމަށާއި، ޖެނުއަރީން ފެށިގެން މިނިމަމް ވޭޖް ބޯޑުގެ ބައްދަލުވުމެއް ބޭއްވިފައިނުވާކަމަށެވެ.
އެއީ ކަންބޮޑުވުން އޮތް ކަމެއްކަން މައުރޫފް ފާހަގަ ކުރެއްވިއެވެ.
އޭގެ އިތުރުން، ގިނަވެގެން ދުވާލަކު މުވައްޒަފަކު ލައްވާ މަސައްކަތް ކުރެވޭނެ ވަގުތު ކަނޑައެޅުން ލަސްވެގެން ދިއުމަކީވެސް ކަންބޮޑުވުން އޮތް ކަމެއްކަމަށް މައުރޫފް ވިދާޅުވިއެވެ.
އޭގެ އިތުރުން، ގާތް މީހުންނަށް ވަޒީފާ ދިނުމުގެ ބޭނުމުގައި ވަޒީފާގެ އެއްބަސްވުންތައް އުވާލުން އިތުރުވެފައިވާކަން ފާހަގަ ކުރައްވައި މައުރޫފް ވަނީ އެކަމަށްވެސް ތަޅުމުގައި އަލިއަޅުވާލައްވާފައެވެ.
އޭގެ އިތުރުން ވަޒީފާގެ ޤާނޫނަށް އިސްލާޙު ގެންނައިރު، ހަފްތާއަކު 2 އޮފް ޓޫރިޒަމް އިންޑަސްޓްރީގެ މުވައްޒަފުންނަށް ދިނުމަށްވެސް މައުރޫފް ހުށަހެޅުއްވިއެވެ. އެއީ ޤާނޫނުގައި ލިއެގެން މުވައްޒަފުންނަށް ލިބިދޭންޖެހޭ ޙައްޤެއްކަމަށް މައުރޫފް ވިދާޅުވިއެވެ.
މައުރޫފް ވަނީ ޤާނޫނުތަކަށް ކިތަންމެ ވަރަކަށް އިސްލާޙު ހުށަހެޅިދާނެކަން ފާހަގަ ކުރައްވައި، އެ ޤާނޫނުތައް ތަންފީޒު ނުކުރެވޭނަމަ އެއީ ބޭނުމެއް ނެތްކަމެއްކަމަށް ވިދާޅުވެފައެވެ.
