ގާޒާ ސްޓްރިޕް ގައި ޕޯލިއޯ ފެތުރެމުންދާ ކަމަށް ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިން ބުނެފިއެވެ.
އެ ޖަމްއިއްޔާގެ ތަރުޖަމާނަކު އަލްޖަޒީރާ އާ ވާހަކަ ދައްކަމުން ބުނީ، ކުޑަ ކުދިންނަށް ވެކްސިން ދިނުމުގެ މަސައްކަތް ކުރުމަށް ހަނގުރާމަ ހުއްޓާލަން ޖެހޭ ކަމަށެވެ. އަނެއް ކޮޅުން ގާޒާ ގެ ހެލްތް މިނިސްޓްރީން ބުނެފައިވަނީ ބަލި ފެތުރުން ކޮންޓްރޯލް ކުރުމަށް ވެކްސިން ދެވޭނެ ގޮތެއް އަވަހަށް ހޯދުން މުހިންމު ކަމުގައެވެ.
ގާޒާގެ ހެލްތް މިނިސްޓްރީން އާންމު ކޮށްފައިވާ ބަޔާނެއްގައި ބުނެފައިވަނީ، ޕޯލިއޯ ބަލި ގާޒާގައި ފެތުރެމުން ދިއުމަކީ އާންމު ސިއްހަތައް ހުރި ބޮޑު ނުރައްކަލެއް ކަމަށާއި، ބަލި ކޮންޓްރޯލް ނުކުރެވިއްޖެ ނަމަ އަވަށްޓެރި ގައުމު ތަކަށް ބަލި ފެތުރުމުގެ ނުރައްކާ އޮތް ކަމުގައެވެ.
ގާޒާގެ ހެލްތް މިނިސްޓްރީން ބުނެފައިވަނީ ޕޯލިއޯ ގާޒާ އިން ބަލި ފެންނަން މެދުވެރިވީ އިޒްރޭލުން ގާޒާގައި ހިންގަމުންދާ ހަނގުރާމައިގެ ސަބަބުން އާންމު ސާފު ތާހިރު ކަން ގެއްލުމުގެ ސަބަބުން ކަމަށެވެ.
ގާޒާ އިން ޕޯލިއޯ ފެނުމަކީ ދުނިޔޭން މި ބަލި ނައްތާލުމަށް ބައިނަލް އަގްވާމީ ފެންވަރުގައި ކުރެވެމުންދާ މަސައްކަތައް ފަހަތައް އެޅުނު ފިޔަވަޅެއް ކަމަށް ވެސް ގާޒާ ގެ ހެލްތް މިނިސްޓްރީން ބުނެފައިވެއެވެ.
ގާޒާ އިން ޕޯލިއޯ ވައިރަސް ފެނުމާއެކު ޑަބްލިޔުއެޗްއޯ އިން ބުނެފައިވަނީ ޕޯލިއޯ ވެކްސިންގެ އެއް މިލިއަން ޑޯޒް ގާޒާ އަށް ފޯރުކޮށް ދިނުމުގެ މަސައްކަތް ކުރަމުންދާ ކަމަށެވެ.
ގާޒާ އަށް ބޭނުންވާ އެހީގެ ތަކެއްޗާއި ބޭހާއި އާންމު ސާފު ތާހިރު ކަމަށް ބޭނުންވާ ތަކެތި އެ ތަނަށް އެތެރެ ކުރުމުގައި ވެސް އިޒްރޭލް ސިފައިން ގެންދަނީ ހުރަސް އަޅަމުންނެވެ.
ފަލަސްތީނުގެ ސިއްހީ އޮފިޝަލުން ހާމަ ކޮށްފައިވާ ގޮތުގައި ޓެންޓް ތަކުގައި ތޮއްޖެހިގެން ގިނަ އަދަދެއްގެ ބަޔަކު އުޅެން ޖެހުމުގެ ސަބަބުން، ރައްކާތެރި ގޮތުގައި ނަޖިސް ނައްތާލެވޭނެ ގޮތެއް ވެސް ނެތް ކަމަށާއި، ގާޒާ ގެ ނަޖިސްފެން ޓްރީޓް ކުރާ ނިޒާމުވެސް ތެޔޮ ހުސްވެގެން ހުސްވި ހަފްތާ އިން ފެށިގެން ނިއްވާލާފައިވާ ކަމުގައެވެ.
ޕޯލިއޯ ފެތުރުމުގެ ނުރައްކަލުގެ އިތުރުން ފާނާބަސަންދު ފަދަ ގައިންގަޔަށް އަރާ ބަލިތައް މިހާރުވެސް ދަނީ ފެތުރެމުން ކަމަށް ސިއްހީ އޮފިޝަލުން ބުނެފައިވެއެވެ.
