ލަންކާގައި ސްވައިން ފްލޫ ފެތުރޭ ކަމަށް ބުނެ ފަތުރަނީ ދޮގެއް: ލަންކާ ހޮސްޕިޓަލް
ސްވައިން ފްލޫގެ އަލާމަތްތަކުގެ ތެރޭގައި އާދައިގެ ރޯގާއަކުން ފެންނަ ހުރިހާ އަލާމަތްތައް ފެންނާނެއެވެ. އެގޮތުން ހުން އައުމާއި، ކެއްސުން، ކަރުގައި ރިއްސުން، ނޭފަތުން ފެން އައުމާއި، ނޭފަތް ބެދުން، ގައިގައި ރިއްސުން، ބޮލުގައި ރިއްސުން، ހީކެރުވުން އަދި ވަރުބަލިވުން ހިމެނެއެވެ.
އާއްމު ރައްޔިތުން ޕެނިކް ނުވުމަށް އިލްތިމާސްކޮށްފައިވޭ
ސްރީ ލަންކާ ހޮސްޕިޓަލް - 2009 ވަނަ އަހަރުގެ ތެރޭގައި ސްވައިން ފްލޫ މުޅި ދުނިޔޭގައި ފެތުރުނު
ސްރީލަންކާގައި ސްވައިން ފްލޫ ނުވަތަ އެޗް1އެން1 ވައިރަސް ފެތުރޭ ކަމަށް ބުނެ ދައުރުވާ ޚަބަރު ލަންކާ ހޮސްޕިޓަލުން ދޮގުކޮށްފިއެވެ.
ލަންކާގައި ސްވައިން ފްލޫ ވަރަށް ބޮޑަށް ފެތުރި ލަންކާގެ ހޮސްޕިޓަލްގައި ގިނަ ބަޔަކު އެޑްމިޓްކޮށްގެން ފަރުވާ ދެމުންދާ ކަމަށް ބުނެ ސޯޝަލް މީޑިއާގައި ދަނީ ޕޯސްޓުތަކެއް ދައުރު ކުރަމުންނެވެ.
އެކަމާ ގުޅޭގޮތުން ލަންކާ ހޮސްޕިޓަލްގެ މެނޭޖްމަންޓުން ބުނީ ސްވައިން ފްލޫ ޖެހިގެން ފަރުވާ ދެމުންދާ ކަމަށް ނުވަތަ އެޑްމިޓް ކުރެވިފައިވާ ކަމަށް ބުނެ ސޯޝަލް މީޑިއާގައި ދައުރުވަމުންދާ ރިޕޯޓުތަކަކީ މުޅިން ދޮގު ވާހަކަތަކެއް ކަމަށެވެ. އަދި ދައުރުވަމުންދާ ޕޯސްޓުތަކާ ގުޅިގެން އާއްމު ރައްޔިތުން ޕެނިކް ނުވުމަށް އިލްތިމާސްކޮށްފައިވެއެވެ.
ސްވައިން ފްލޫގެ އަލާމަތްތަކުގެ ތެރޭގައި އާދައިގެ ރޯގާއަކުން ފެންނަ ހުރިހާ އަލާމަތްތައް ފެންނާނެއެވެ. އެގޮތުން ހުން އައުމާއި، ކެއްސުން، ކަރުގައި ރިއްސުން، ނޭފަތުން ފެން އައުމާއި، ނޭފަތް ބެދުން، ގައިގައި ރިއްސުން، ބޮލުގައި ރިއްސުން، ހީކެރުވުން އަދި ވަރުބަލިވުން ހިމެނެއެވެ.
ލަންކާއަކީ ގިނަ އަދަަދެއްގެ ދިވެހިން ވެސް ދިރިއުޅޭ ގައުމެކެވެ.
2009 ވަނަ އަހަރުގެ ތެރޭގައި ސްވައިން ފްލޫ މުޅި ދުނިޔޭގައި ފެތުރުނެވެ. އަދި ގިނަ އަދަދެއްގެ ބަޔަކު މިބަލީގައި މަރުވެފައިވެއެވެ.
