ފްރާންސްގެ ވެރިރަށް ޕެރިހުގައި މިހާރު ކުރިއަށްދާ އޮލިމްޕިކްސް ކުޅިވަރު މުބާރާތް ހުޅުވުމުގެ ރަސްމިއްޔާތަކީ މިހާތަނަށް އެންމެ ގިނަ ބަޔަކު ބެލި، އެންމެ ރީތި އޯޕަނިން ސެރެމަނީ ކަމުގައިވެއްޖެ އެވެ.

އެންބީސީ ސްޕޯޓްސްން ބުނާ ގޮތުގައި ހުކުރު ދުވަހުގެ ރޭ ފްރާންސްގެ ސެން ކޯރުގައި ބޭއްވި ރަސްމިއްޔާތު 28.6 މިލިއަން މީހުން ވަނީ ބަލާފަ އެވެ. މީގެ ކުރިން ޔޫރަޕުގައި ބާއްވައިގެން އެންމެ ގިނަ ބަޔަކު ބެލި އޮލިމްޕިކްސް އޯޕަނިން ސެރެމަނީ އަކީ 2012 ވަނަ އަހަރު ލަންޑަނުގައި ބޭއްވި ގޭމްސް އެވެ.

"(ހުރު ދުވަހުގެ) ރޭގެ ހުޅުވުމުގެ ރަސްމިއްޔާތަކީ މިހާތަނަށް އެންމެ މަތީ ތަރުހީބެއް އަދި އެންމެ ގިނަ ބަޔަކު އިވެންޓް އޮލިމްޕިކްގެ ތާރީހުގައި. އެންބީސީގެ ޕްލެޓފޯމްތަކުން މި އެވެންޓް ރެކޯޑް އަދަދަކަށް ބެލި،" އެންބީސީގެ ރައީސް ރިކް ކޯޑެއްލާ ވިދާޅުވި އެވެ.

ޖަޕާނުގައި 2021 ވަނަ އަހަރު ބޭއްވި އޮލިމްޕިކްސް ހުޅުވުން ބެލީ 17.9 މިލިއަން މީހުންނެވެ. އަދި ބްރެޒިލްގައި ބޭއްވި ރިއޯ އޮލިމްޕިކްސް ހުޅުވުން ބަލާފައިވަނީ 26.5 މިލިއަން މީހުންނެވެ.

އެންބީސީން ބުނީ ޕެރިސް 24 އޮލިމްޕިކްސް ހުޅުވުން ސްޓްރީމްކޮށްގެން 2.5 މިލިއަން މީހުން ބެލި ކަމަށާއި މިއީ ވެސް ރެކޯޑެއް ކަމަށެވެ.

ޕެރިސް އޮލިމްޕިކްސް އަކީ މިހާތަނަށް ދަނޑެއްގައި ނުބާއްވާ ފުރަތަމަ ހުޅުވުމުގެ ރަސްމިއްޔާތެވެ. މިކަމާ އެކިފަރާތްތަކުގެ ހިޔާލު ތަފާތުވެފައިވާއިރު ފްރާންސްގެ އިދާރާތަކުން ބުނީ ސެން ކޯރުގައި ބޯޓުތަކުގައި އެތްލީޓުން އުފުލައިގެން ބޭއްވި ޕްރޭޑަކީ ޒަމާނީ ވަންތަކަން ދައްކުވައިދިން ކަމެއް ކަމަށެވެ. އަދި އޮލިމްޕިކްސް ހުޅުވުމަކީ އަބަދު އެއްގޮތަކަށް އޮންނަންޖެހޭ ކަމެއްނޫން ކަމަށާއި ޒަމާނާއެކު ބަދަލު އަންނަންޖެހޭނެ ކަމަށެވެ.