ބަޑިޖެހުމުން ފިލަންދުވާ ޒަމާނެއްގައި ސިފައިން އައްޔަކަސް އަދިރިއަކަސް ކިޔާފައި ނުދުވާނެ، މިހާރުވެސް އެ ހިތްވަރު ހުންނާނެ
ކުރީގެ ޗީފް އޮފް ޑިފެންސް ފޯސް މޭޖަރ ޖެނެރަލް ރިޓަޔަރޑް މޫސާ އަލީ ޖަލީލު
ދިވެހި އަސްކަރިއްޔާއިން ގައުމު އޮޔާދާން ދޫކޮށްލާފައި ބަލަން ތިބޭނެކަމަށް ގަބޫލު ނުކުރައްވާ ކަމަށް ކުރީގެ ޗީފް އޮފް ޑިފެންސް ފޯސް މޭޖަރ ޖެނެރަލް ރިޓަޔަރޑް މޫސާ އަލީ ޖަލީލު ވިދާޅުވެއްޖެއެވެ.
މިނިވަން ދުވަހުގެ ހާއްސަ މެހެމާނެއްގެ ގޮތުުން ރާއްޖެޓީވީގެ ފަށާއިރު ޕްރޮގްރާމުގައި ވާހަކަދައްކަވަމުން، ނޮވެމްބަރު 3 ގެ ހާދިސާއަށް އިޝާރާތްކުރައްވާ މުސާ އަލީ ޖަލީލު ވިދާޅުވީ އެދުވަހުވެސް ދިވެހި ސިފައިން ތިބީ ނުކުމެ ސާބިތުކަންމަތީ ދިވެހި ގައުމު ސަލާމަތްކުރުމަށް ކަމަށެވެ. އަދި އެ ދުވަހު ސިފައިންގެއާއި ގައުމުގެ ދިފާއުގައި ނުކުތް ހުރިހާ ސިފައިންނެއް އަނބުރާ ނާންނާނެކަންވެސް އެނގިވަޑައިގެންނެވި ކަމަށާއި، ނަމަވެސް އެއީ ހިތްވަރުކަމަށް މޫސާ އަލީ ޖަލީލު ވިދާޅުވިއެވެ.
ތަމަޅަ ހަނގުރާމަވެރިންނާއި ދެކޮޅަށް ނުކުތް 18، 20 އަހަރުގެ ޒުވާނުންނަށް އިޝާރާތްކުރައްވާ މޫސާ އަލީ ޖަލީލު ވިދާޅުވީ އެކުދިންގެ ހިތްވަރު ވަރުގަދަ ކަމަށެވެ. އަދި ބަޑިޖެހުމުން ފިލަންދުވާ ޒަމާނެއްގައި ސިފައިން އައްޔަކަސް އަދިރިއަކަސް ކިޔާފައި ނުދުވާނެ ކަމަށާއި، އެއަށްވުރެ އެ ޒުވާނުން ހިތްވަރުގަދަކަމަށެވެ.
މޫސާ އަލީ ޖަލީލު ވިދާޅުވީ އަސްކަރިއްޔާގެ ސިފައިން ގައުމު އޮޔާދާން ދޫކޮށްފައި ތިބެދާނެކަމަށް ގަބޫނުކުރައްވާ ކަމަށެވެ. އަދި ދެވަނަ ނޮވެމްބަރު 3 އަޔަސް ދިވެހި އަސްކަރިއްޔާއިން ދުލެއް ނުދޭނެ ކަމަށެވެ.
