ކޯޓުން ބޭރުކޮށްލި ޖިހާދުގެ މައްސަލައަކީ ކޮމިޝަނުން ތަހުގީގުކުރި މައްސަލައެއް ނޫން - އޭސީސީ
5 ޖުލައި 2020 ގައި މި މައްސަލަ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީއިން ބަލާފައިވާކަމަށް ބުނެފައިވޭ
ކުރީގެ ނައިބު ރައީސް އަބްދުﷲ ޖިހާދު - ޖިހާދުގެ މައްޗަށް އުފުލާފައިވާ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރެއްވި ކަމުގެ ދައުވާ ވަނީ ބޭރުކޮށްލާފައި
ކްރިމިނަލް ކޯޓުން ބޭރުކޮށްލާފައިވާ، ކުރީގެ ނައިބު ރައީސް އަބްދުﷲ ޖިހާދުގެ މައްސަލައަކީ އެންޓި ކޮރަޕްޝަން ކޮމިޝަނުން ތަހުގީގުކުރި މައްސަލައެއް ނޫން ކަމަށް އެ ކޮމިޝަނުން ބުނެފިއެވެ.
ކުރީގެ ނައިބު ރައީސް އަބްދުﷲ ޖިހާދުގެ މައްޗަށް އުފުލާފައިވާ ދައުލަތަށް ފައިދާއެއް ލިބެން އޮތް ކަމެއްގައި އެ ނޫން ގޮތަކަށް އަމަލުކުރެއްވި ކަމުގެ ދައުވާ ކްރިމިނަލް ކޯޓުން ވަނީ ބުރާސްފަތި ދުވަހު ބޭރުކޮށްލާފައެވެ.
މި މައްސަލައާއި ގުޅިގެން އޭސީސީން ބުނީ ކ. ފުށިދިއްގަރު ފަޅުން އެއްވެސް ފައިދާއެއް ނުލިބޭގޮތަށް ކޮރަޕްޝަނަށް މަގުފަހިވާގޮތަށް ބޭރު ބަޔަކަށް ދިންކަމަށް ބުނާ، މައްސަލަ އެންޓި-ކޮރަޕްޝަން ކޮމިޝަނުން ތަހުގީގުކޮށް، ކޮރަޕްޝަންގެ ކުށެއް އެކުލެވިގެން ނުވާ މައްސަލައެއް ކަމަށް، 16 ފެބްރުއަރީ 2016 ގައި ނިންމާފައިވާ ކަމަށެވެ.
އަދި އޭރު، ސިވިލް ކޯޓުން ހުކުމް ކުރުމާއި ގުޅިގެން، ކ. ފުށިދިއްގަރު ފަޅުގައި ޓުއަރިޒަމް ޒޯނެއް ތަރައްގީކުރުމުގެ ގޮތުން، އެއިރުގެ ސިޔާސަތުތަކާއި އެއްގޮތަށް ފަޅުގެ ބޮޑުމިނަށް ބަލައި، ދައުލަތުން އަކަފޫޓަކަށް ކަނޑައަޅާފައިވާ މިންވަރަކަށް އިކުއިޒިޝަން ކޮސްޓުގެ ގޮތުގައި ދައްކަންޖެހޭ ފައިސާ ދެއްކުމުން ނޫނީ، އެ ފަޅު ކުއްޔަށް ދީގެން ނުވާނެކަމަށް މި މައްސަލައިގައި، ޓުއަރިޒަމް މިނިސްޓްރީން ކޮމިޝަނަށް އަންގާފައިވާ ކަމަށެވެ.
އަދި މި މައްސަލަ ޕްރެޒިޑެންޝަލް ކޮމިޝަން އޮން ކޮރަޕްޝަން އެންޑް އެސެޓް ރިކަވަރީއިން، ރިވިއުކޮށް އެ މައްސަލައަކީ އެ ފަރާތުން އަލުން ބަލަން ނިންމާފައިވާ މައްސަލައެއްކަން ކޮމިޝަނަށް ސިޓީއަކުން 5 ޖުލައި 2020 ގައި އަންގާފައިވާ ކަމަށެވެ.
25 ޖުލައި 2024 ގައި ކްރިމިނަލް ކޯޓުން ނިންމި، ރައްޔިތުންނަށް ނުވަތަ ދައުލަތަށް ފައިދާއެއް ލިބެން އޮތްކަމެއްގައި އެނޫންގޮތަކަށް އަމަލުކުރުމުގެ މައްސަލައަކީ އެ ކޮމިޝަނުން ތަހުގީގުކޮށް ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ މައްސަލައެއް ނޫންކަމަށް ވެސް ކޮމިޝަނުން ވަނީ ބުނެފައެވެ.
