ތޫނު އެއްޗަކުން ހަމަލާދީ މ. ސަރުމާގެ، ފާތިރު މުހައްމަދު މަރާލި މައްސަލައިގައި ދައުވާ އުފުލާފައިވާ އިރުފާން ރުޝްދީގެ މައްޗަށް ކުރާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި އޭނާގެ މައްޗަށް އުފުލާފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.

މި މައްސަލަ ކުރިން ބައްލަވަމުން ގެންދެވީ ކްރިމިނަލް ކޯޓުގެ އޭރުގެ އިސްގާޒީ އަހުމަދު ޝަކީލެވެ. ނަމަވެސް ޝަކީލު ހައިކޯޓުގެ ފަނޑިޔާރުކަމަށް އައްޔަނު ކުރައްވާފައިވާތީ މިހާރު މި މައްސަލަ ބައްލަވަނީ ގާޒީ އިބްރާހިމް ޛިހުނީއެވެ.

އުމުރުން 14 އަހަރުގެ ފާތިރު މަރާލާފައިވަނީ 2016 ވަނަ އަހަރުގެ ޖޫން މަހުގެ ތިން ވަނަ ދުވަހުގެ ރޭ 9:20 ހާއިރު އެވެ.

އަންގާރަ ދުވަހު އިފްތިތާޙީ ބަޔާން އިއްވަވަމުން ދައުލަތުގެ ވަކީލު ވިދާޅުވީ، ފާތިރު މަރާލާފައިވަނީ ގޭންގް މާރާމާރީއެއްގެ ތެރެއިން ކ. ކާށިދޫ، ރަންފަރު، އަހުމަދު އިރުޝާން ހިލްމީ މަރާލި މައްސަލައިގެ ބަދަލު ހިފުމުގެ ގޮތުން ކަމަށެވެ.

ފާތިރު މަރާލި މީހާއަށް އިރުފާން އެހީތެރިކަން ފޯރުކޮށްދީފައިވާކަމަށް ދައުލަތުން ބުނެއެވެ. އެގޮތުން ޙަމަލާދިން ތަނުގައި ހުރެ، ޙަމަލާ ދިނުމުން އެކަން ކުރި ފަރާތް ގޮވައިގެން ފާތިރު އެތަނުން ގޮސްފައިވާކަންވެސް ދައުލަތުން ފާހަގަކުރިއެވެ.

މި ކުށް ސާބިތުވެއްޖެ ނަމަ އަންނާނީ 15 އަހަރާއި 25 އަހަރުގެ ޖަލު ޙުކުމެއްކަމަށް ދައުލަތުގެ ވަކީލު ވިދާޅުވިއެވެ.

އިފްތިތާޙީ ބަޔާން އިއްވަވަމުން ދިފާއީ ވަކީލު ވިދާޅުވީ، މި މައްސަލަ ގޮސްފައިވަނީ ނުހަނު ތައައްސުބުގެ ދަށުން ކަމަށެވެ.

ދެފަރާތުން އިފްތިތާޙީ ބަޔާން އިއްވުމާއެކު މިވަނީ މި މައްސަލައިގެ ޝަރީއަތް ފެށިފައެވެ. އެގޮތުން އަންގާރަ ދުވަހު ހެކިބަސް ނެގުންވެސް ކުރިއަށް ގެންގޮސްފައިވެއެވެ.

މި އަޑުއެހުމުގައި ހާޒިރުވި ހެކިވެރިޔާއަކީ ސީން އޮފް ކްރައިމް އޮފިސަރެކެވެ. އޭނާ ވިދާޅުވީ، އެ ގޭގައި ގިނަ އަދަދެއްގެ ލޭތަކެއް ހުރިކަމަށް މައުލޫމާތު ލިބުމުން އެ ސީނަށް ގޮސް ސީންގެ ފޮޓޯ ނަަގައި، ހެކިތައް ނަގާފައިވާ ކަމަށެވެ.

ސީނަށް ދިޔައިރު އެތަނުގައި މައްސަލައިގެ ތަހުގީގު އޮފިސަރުވެސް ހުންނެވިކަމަށް އޭނާ ވިދާޅުވިއެވެ.

އޭނާ ވިދާޅުވީ، ގޭގެ ސިޑިމަތީގަޔާއި ގޭތެރޭގައި ގިނަ އަދަދެއްގެ ލޭ ހުރި ކަމަށެވެ.

އޭނާ ވަނީ ސީނުން މާއްދީ ހެކީގެ ގޮތުގައި ލޭގެ ސާމްޕަލްއާއި، ފައިވާނަކާއި، އަނިޔާ ލިބުނު ކުއްޖާގެ އަންނައުނާއި، ބައެއް އިތުރު ސާމާނު ނަގާފައެވެ.

މި އަޑުއެހުމުގައި ދެން ހާޒިރުކުރި ހެކިންގެ ހެކިބަސް ނެގިފައެއް ނުވެއެވެ. އެހެންކަމުން ދެން އޮންނަ އަޑުއެހުމެއްގައިވެސް އޮންނާނީ ހެކިބަސް ނެގުމެވެ.