ހައްގު ހޯދުމަށް މުޒާހަރާ ކުރާ މަސްވެރިން ދޯނިތަކުން މިސަރުކާރުން މަސް ނުގަނޭ: ޔާމީން
މަސްކިލޯއެއް ގަންނަ އަގު ވަނީ ދަށްކޮށްފައި
ބޮޑުކަންނެލީގެ މަސްވެރިން ކުރިއަށް ގެންދިޔަ މުޒާހަރާގެ ތެރެއިން
ހައްގު ހޯދުމަށް މުޒާހަރާ ކުރާ މަސްވެރިން ދޯނިތަކުން މިސަރުކާރުން މަސް ނުގަންނަ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
މިދިޔަ ބުރާސްފަތި ދުވަހުގެ ރޭ ކުރިއަށް ގެންދިޔަ ޕީއެންއެފް ޖަލްސާގެ އޯޑިއަންސްގައި އިންނަވައި ޔާމީން ވަނީ މަސްވެރިންގެ ހައްގުތަކަށް މިސަރުކާރުން އަރައިގަނެފައިވާ ކަމަށް ވިދާޅުވެފައެވެ.
ޔާމީން ވިދާޅުވީ ހައްގު ހޯދުމަށް ނުކުންނަ މީހުން ފުލުހުންނަށް ނުކިޔަމަންތެރިވުމުގެ ތުހުމަތުގައި ޖަލަށް ނުލާ ކަމަށާއި، ނަމަވެސް ބާނާ މަސް ކުށްވެރިވާ ކަމަށެވެ. އެގޮތުން މުޒާހަރާއަށް ނުކުންނަ މަސް ދޯނިތަކުން ބާނާ މަސް މިސަރުކާރުން ނުގަންނަ ކަމަށް ޔާމީން ވިދާޅުވިއެވެެ. އަދި މިސަރުކާރުގެ ސިޔާސަތު މިހައި ދަށަށް ދިއުމުން ރައްޔިތުންނަށް ގަރުދިޔަ ކޮޅެއް ކާންލިބޭނެ ކަމާމެދު ޔާމީން ވަނީ ސުވާލު އުފައްދަވާފައެވެ.
ޔާމީން ވިދާޅުވީ މިފްކޯގައި މަސް ނެތް ކަމަށާއި، ރޯމަސް ކިލޯއެއްގެ އަގުހުރީ 80 ރުފިޔާއަށްވުރެ މަތީގައި ކަމަށެވެ.
ރައީސް ޑރ.މުހައްމަދު މުއިއްޒު ވެރިކަމަށް އައީ މަސްވެރިންގެ ހައްގުތައް ހޯދައި، މަސްވެރިން ބާނާ މަހަށް ވަގުތުން ފައިސާ ދޭނެ ކަމުގެ ވައުދުފުޅާއެކުއެވެ. ނަމަވެސް މަހުގެ ކިލޯ ގަންނަ އަގުދަށްކޮށް، ތެލުގެ އަގު އިންތިހާއަށް ބޮޑުކޮށްފައިވާ ކަމަށާއި، ތެޔޮ އަގުބޮޑުވުމާއެކު ގިނަ ދޯނިތައް މަހަށް ނުފުރާ ކަމަަށް ޔާމީން ވިދާޅުވިއެވެ.
ހައްގު ހޯދުމަށް މުޒާހަރާ ކުރާ މަސްވެރިން ދޯނިތަކުން މިސަރުކާރުން މަސް ނުގަންނަ ކަމަށް ޔާމީން ވިދާޅުވެފައިވާއިރު، މިފަހުން ގިނަ ބޮޑުކަންނެލި މަސްވެރިންގެ މާލެ އަދި ހުޅުމާލޭގައި މުޒަހާރާކޮށްފައެވެ. އަދި އައްޑޫ ސިޓީ މަސްވެރިންނާއި ކުޑަހުވަދޫ މަސްވެރިން ވަނީ ސިލްސިލާ މުޒަހާރާތަކެއް ކުރިއަށް ގެންގޮސްފައެވެ.
މަސްވެރިން ކިރުވާ މަހުގެ ފައިސާ ލިބެނީ ވެސް މުޒާހަރާކޮށްގެން ކަމަށް މަސްވެރިން ބުނެއެވެ. މިއީ މި ފަހުގެ ތާރީޚެއްގައި މި ރާއްޖެ އައި އެންމެ ހުދުމުހުތާރު ވެރިކަން ކަމަށް އައްޑޫގައި މުޒާހަރާ ކުރި މަސްވެރިން ބުނެފައިވެއެވެ.
