ސާޖިއޯ ރޮބާޓޯ ބާސެލޯނާ ދޫކޮށްލަނީ

ބާސެލޯނާގެ ކެޕްޓަން އަދި ޑިފެންޑަރު ސާޖިއޯ ރޮބާޓޯ ޓީމު ދޫކޮށްލަން ގާތްގަނޑަކަށް ނިންމައިފި އެވެ.

ސްޕޭނުގެ ނޫސްތަކުން ބުނާ ގޮތުގައި މެދުތެރެއަށް ވެސް ކުޅޭ ކުޅުންތެރިޔާ ބަދަލުވުން އެންމެ ގާތީ އިނގިރޭސި ޕްރެމިއާ ލީގަށެވެ. ސަބަބަކީ ގައުމުން ބޭރުގައި ކުޅުމުގެ ތަޖުރިބާކޮށްލަން ބޭނުންވާތީ އެވެ. ނަމަވެސް ސްޕޭނުގެ ވެލެންސިއާ އާއި ސެވިއްޔާ ފަދަ ކުލަބުތަކުން އޭނާގެ ސޮއި ހޯދަން ވަނީ ހުށަހަޅާފަ އެވެ.

ރޮބާޓޯ ކުރިން ނިންމައިގެން ހުރީ ބާސެލޯނާގައި މަޑު ކުރުމަށެވެ. ނަމަވެސް އޭނާ ވިސްނުން ބަދަލުކުރީ އާ ސީޒަން ފަށަން މަހަކަށްވުރެ ކުޑަތަންވިއިރު ވެސް އޭނާގެ ކޮންޓްރެކްޓް އައު ކުރުމާމެދު ބާސެލޯނާ އަށް ގޮތެއް ނުނިންމުމުންނެވެ. ބާސެލޯނާއިން މިދިޔަ ސީޒަނުގެ މެދުތެރެއިން ނިންމީ ހުސްވި ސީޒަނަށް ފަހު ރޮބާޓޯ ދޫކޮށްލުމަށެވެ. އެއީ އެކަށީގެންވާ ވަރަށް ފުރަތަމަ 11ގައި ނުކުޅެވި ގިނައިން ބެންޗުގައި އިންނަން ޖެހޭތީ އެވެ. ނަމަވެސް ފަހުން އޭނާގެ ކޮންޓްރެކްޓް އާކުރަން ނިންމީ އޭރުގެ ކޯޗު ޒަވީ ހަނާންޑޭޒް ބޭނުންވުމުންނެވެ.

އެކަމަކު ޒަވީ ވަކިކުރުމުން ބާސެލޯނާގެ ކޯޗަކަށް މިހާރު ހުރީ ޖަރުމަނުގެ ކޯޗު ހަންސީ ފްލިކެވެ. އޭނާ ވެސް ރޮބާޓޯގެ ކޮންޓްރެކްޓާމެދު ވަކި ގޮތެއް ނުކިޔަ އެވެ.

ބާސެލޯނާގެ ލަމާސީއާއިން ތަމްރީނުވެ، ސީނިއާ ޓީމާ 2010 ވަނަ އަހަރު ގުޅުނު ކުޅުންތެރިޔާ އަށް ކެޕްޓަންކަން ދިނީ ކުރީގެ ކެޕްޓަން ސާޖިއޯ ބުސްޓެކްޓް ޓީމު ދޫކޮށްލުމުންނެވެ.

އުމުރުން 32 އަހަރުގެ ރޮބާޓޯ ގިނަ ބަޔަކު ފާހަގަކުރަނީ ޗެމްޕިއަންސް ލީގުގައި ޕީއެސްޖީ އަތުން 4-0ގެ ފަހަތުގައި އޮއްވައި ދެ ވަނަ ލެގުގައި 6-5އިން ބާސެލޯނާ މޮޅުކޮށްދިން ލަނޑު ފަހު ވަގުތުގައި ޖަހައިދިން ކުޅުންތެރިޔާގެ ގޮތުގަ އެވެ. ނަމަވެސް އޭނާގެ އަގު އެކަށީގެންވާ ގޮތަކަށް ވަޒަން ނުކުރާކަމަށް ބުނެ ރޮބާޓޯ ވަނީ މީގެ ކުރިން ހިތްހަމަނުޖެހުން ފާޅުކޮށްފަ އެވެ.