ޔޫތް މިނިސްޓްރީގެ ދަށުން މަސައްކަތްކުރާ ބައެއް މުވައްޒަފުންނަށް ގޮނޑިއެއް، ސިސްޓަމެއް ނެތް، ފާހަނާ އަށް ދާން ޖެހެނީ ގެއަށް

މިނިސްޓްރީ އޮފް ޔޫތް އެމްޕަވަރމެންޓް، އިންފޮރމޭޝަން އެންޑް އާޓްސްގެ ދަށުން މަސައްކަތްކުރާ ބައެއް މުވައްޒަފުން މަސައްކަތް ކުރާނެ މާހައުލެއް ނެތި އެކަމުގެ ޝަކުވާ މުވައްޒަފުން ކުރަން ފަށައިފިއެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި އެ ވުޒާރާގެ މުވައްޒަފުންނަށް ލިބެންޖެހޭ އަސާސީ ހައްގުތައް ވެސް ފުރިހަމަ އެއް ނުވެއެވެ. އެގޮތުން ކުޑަމިނުން ފާހާނާއަށް ދެވޭނެ އިންތިޒާމްވެސް މަސައްކަތް ކުރާ މާހައުލުގައި ބައެއް މުވައްޒަފުންނަށް ހަމަޖެހިފައި ނެތް ކަމަށް ވަނީ އެނގިފައެވެ. އެ މުވައްޒަފުން ފާހާނާ އަށް ދާންވުމުން ދާން ޖެހެނީ ގެއަށް ކަަމަށް ވަނީ މައުލޫމާތު ލިބިފައެވެ.

އެގޮތުން އެންސީއޭގެ މުވައްޒަފުން އުޅެން ޖެހިފައި ވަނީ ވަރަށް ދަތި ހާލަތުގައި ކަމަށް ވަނީ އެނގިފައެވެ. ހަ މަސް ދުވަސް ވެގެން ދިޔައިރު ވެސް އިށީންނާނެ ގޮނޑި އެއް ނެތި ބައެއް މުވައްޒަފުން ތިބި ކަމަށް ވަނީ މައުލޫމާތު ލިބިފައެވެ. ބައެއް މުވައްޒަފުންނަށް މަސައްކަތް ކުރާނެ ސިސްޓަމެއް ވެސް ދީފައެއް ނުވެއެވެ. ސިސްޓަމްތައް ލިބުނު މުވައްޒަފުންނަށް ވެސް ސޮފްޓްވެއަރތައް އަޕްޑޭޓް ނުކޮށް ހުރުމުގެ ސަބަބުން ވަނީ މަސައްކަތް ކުރެވޭ ގޮތް ނުވެފައެވެ. އަދި އޮފީހަށް އަމިއްލަ ލެޕްޓޮޕާއި ޓެބްލެޓް ގެނައި ނަމަވެސް އިންޓަރނެޓް ވެސް އެ އޮފީހުގެ ބައެއް އިދާރާތަކަށް ރަނގަޅަށް ނުލިބޭ ކަމަށް ރާއްޖެއެމްވީ އަށް ވަނީ އެނގިފައެވެ. ބައެއް މުވައްޒަފުން މަސައްކަތް ކުރަމުން ދަނީ އަމިއްލަ ހޮޓްސްޕޮޓްގައެވެ.

އަދި އޮފީހުގައި އެންމެންނަށް ބޭނުންވާ ވަރަށް ޕަވަރ ކޯޑް ނެތުމުން ގެއިން ބައެއް މުވައްޒަފުން އަންނަނީ ޕަވަރ ކޯޑްވެސް ހިފައިގެންނެވެ.

މި ކަމާއި ގުޅިގެން އެ ވުޒާރާ އަށް އައްޔަންކޮށްފައިވާ ސިޔާސީ މުވައްޒަފުން ވެސް ވަނީ ސިޔާސީ އެޕޮއިންޓީސް ހިމެނޭ ވަޓްސްއެޕް ގްރޫޕެއްގައި އެކަމުގެ ނުރުހުން ފާޅުކޮށްފައި ކަމަށް ވަނީ އެނގިފައެވެ.