"އޮޕަރޭޝަން ކުރަނގި" މުޅި ރާއްޖެއަށް ފުޅާ ކޮށްފި
މި އޮޕަރޭޝަން ފުޅާ ކޮށްފައި ވަނީ ކައުންސިލްތަކުގެ އެހީ އާއި އެކު ބިދޭސީންގެ މައުލޫމާތުތައް އެއް ކުރާ ގޮތަށް
ނެޝަނަލް ރަޖިސްޓްރޭޝަން ސިސްޓަމް "ނާރެސް ޕޯޓަލް" އިފްތިތާހްކުރުމުގެ ރަސްމިއްޔާތުގެ ތެރެެއިން
"އޮޕަރޭޝަން ކުރަނގި" މުޅި ރާއްޖެއަށް ފުޅާ ކޮށްފިއެވެ.
މިއީ، ރާއްޖޭގައި އުޅެމުން އަންނަ ހުރިހާ ބިދޭސީންގެ މައުލޫމާތު އެއް ކުރުމަށް ފަށާފައިވާ ޕްރޮގްރާމެކެވެ.
މިދިޔަ މެއި މަހުގެ ދެވަނަ ދުވަހު ފެށި އެ ޕްރޮގްރާމަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފުލުހުންނާއި މޯލްޑިވްސް އިމިގްރޭޝަނާއި ގުޅިގެން ކުރިއަށްގެންދާ ޕްރޮގްރާމެކެވެ.
އެންމެ ފުރަތަމަ ކ. ހިންމަފުށީގަ ފެށި މި ޕްރޮގްރާމް މިހާރު ކ. މާފުށީގައިވެސް ވަނީ ކުރިއަށް ގެންގޮސްފައެވެ.
މި އޮޕަރޭޝަން ފުޅާ ކޮށްފައި ވަނީ ކައުންސިލްތަކުގެ އެހީ އާއި އެކު ބިދޭސީންގެ މައުލޫމާތުތައް އެއް ކުރާ ގޮތަށެވެ.
އޮޕަރޭޝަން ކުރަނގި ފޭސް-2 އިފްތިތާހް ކޮށްދެއްވާފައިވަނީ ރައީސް ޑރ. މުހައްމަދު މުއިއްޒެވެ.
މީގެ އިތުރުން މި އޮޕަރޭޝަންގެ ދަށުން ބިދޭސީންގެ މައި ދަފްތަރެއް އެކުލަވާލެވޭނެއެވެ. މިހާރު ކައުންސިލްތަކަށް ވަނީ ފިންގާ ޕްރިންޓް މެޝިންތަކެއް ހަދިޔާ ކޮށްފައެވެ.
މި އޮޕަރޭޝަން އަކީ ގަވާއިދާ ހިލާފަށް އުޅެމުންދާ ބިދޭސީން މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމުގެ މަޤްސަދުގައި ކުރިއަށް ގެންދާ އޮޕަރޭޝަނެކެވެ. މި އޮޕަރޭޝަންގެ ދަށުން ރާއްޖޭގައި ވަޒީފާ އަދާ ކުރާ ބިދޭސީންގެ އިނގިލީގެ ނިޝާން އެއްކޮށް، އެ ބިދޭސީ މީހާާ ވަޒީފާ އަދާ ކުރަނީ ރާއްޖޭގައި ހެދިފައި ހުރި ގާނޫނާއި ގަވާއިދުގެ ދަށުންތޯ ނުވަތަ ނޫންތޯ ޔަޤީން ކުރެވޭނެއެވެ. މި އޮޕަރޭޝަންގެ ދަށުން ކައުންސިލް އިދާރާތަކުގެ އެހީތެރިކަމާއި އެކު ބިދޭސީންގެ ބަޔޯމެޓްރިކްސް ނެގުމުގެ މަސައްކަތްްތަކާއި އެ މީހުންގެ ސައްހަކަން ކަށަވަރު ކުރުމުގެ މަސައްކަތް ކުރިއަށް ގެންދާނެއެވެ.
