އެމެރިކާ އަށް ދަތުރު ކުރި އެއަރ އިންޑިއާގެ ބޯޓެއް ކުއްލި ގޮތަކަށް ރަޝިއާ ގައި ޖައްސައިފި
ބޯޓު ޖެއްސީ ސްމޯކް ޑިޓެކްޓަރެއް އެލާމް އެޅުމުން ކަމަށް ބަޔާނެއްގައި ބުނެފައިވެއެވެ.
އެއަރ އިންޑިއާ އިން ބުނީ ފަސިންޖަރުން މުމްބާއީއަށް ގެނައުމަށް ރިލީފް ފްލައިޓަކަށް ކްލިއަރެންސް ލިބިފައިވާ ކަމަށް
އެމެރިކާ އަށް ދަތުރު ކުރި އެއަރ އިންޑިއާގެ ބޯޓެއް ކުއްލި ގޮތަކަށް ރަޝިއާ ގެ ކްރަޒްނިޔާސްކް އެއަރޕޯޓްގައި ޖައްސައިފިއެވެ.
ނިއުދިއްލީ އިން ފުރައިގެން ސެންފްރެންސިސްކޯ އަށް ހުކުރު ދުވަހު ދަތުރު ކުރި އެއަރ އިންޑިއާގެ ބޯޓު ރަޝިއާގެ ވައިގެ ބަނދަރުގައި ޖެއްސީ ފަޅުވެރިއަކަށް ބޯޓުގެ ކާގޯ ބަހައްޓާ ސަރަހައްދުން މައްސަލައެއް ފާހަގަ ކުރެވިގެން ކަމަށް އެއަރލައިން އިން ބުނެފައިވެއެވެ.
އެހެން ބަޔާނެއްގައި ބޯޓު ޖެއްސީ ސްމޯކް ޑިޓެކްޓަރެއް އެލާމް އެޅުމުން ކަމަށް ބުނެފައިވެއެވެ.
މިއީ މި ދިޔަ އަހަރެއްހާ ދުވަހުގެ ތެރޭގައި މި ރޫޓުން ދަތުރުކުރި އެއަރ އިންޑިއާގެ ބޯޓަކަށް މިފަދަ ހާދިސާ އެއް ކުރިމަތިވި ދެވަނަ ފަހަރުކަން މީޑިއާ ރިޕޯޓްތަކުގައި ފާހަގަ ކޮށްފައިވެއެވެ.
ބޯޓުން ދަތުރުކުރި ފަސިންޖަރުން އެއަރޕޯޓުގައި ތާށިވެފައިވާ ކަމަށާއި، ދަތުރުކުރި މީހުން ބަލައި އެއަރ އިންޑިއާގެ އެހެން ބޯޓެއް މުމްބާއީ އިން ރަޝިއާ އަށް ދަތުރު ކުރުމަށް ތައްޔާރުވަމުންދާ ކަމަށް ޚަބަރުތައް ބުނެއެވެ.
