އިސްލާމްދީން އެ އަސާސެއްގެ މައްޗަށް ބިނާވެފައިވާ އަސާސަކީ ތައުޙީދު ކަމަށާއި، ތައުޙީދުގެ ތިން ބައިގައި ވަރުގަދަޔަށް ހިފެހެއްޓުމަށް ހުކުރު ޚުތުބާގައި ގޮވާލައިފިއެވެ.

''ތައުޙީދު'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ އިސްލާމްދީނުގެ އަސާސަކީ ތައުޙީދު ކަމަށާއި، އެއީ އެންމެ ފުރަތަމަ ﷲ سُبْحَانَهُ وَتَعَالَى އެކަލާނގެ އަޅުތަކުންނަށް އެ ކަމަކަށް އީމާންވުމަށް އަމުރުކުރައްވައިފައިވާ ކަންތައް ކަމަށެވެ. އަދި، އެންމެހައި ޖިންނީންނާއި އިންސީން އެ ކަމަކަށް ޓަކައި ހެއްދެވުނު މަގުސަދު ކަމަށެވެ.

ތައުޙީދަކީ ﷲ سُبْحَانَهُ وَتَعَالَىގެ އެއްކައުވަންތަކަން ގަބޫލުކޮށް، ޝިރުކުގެ އެންމެހައި އަމަލަކުން ދުރުހެލިވެ ރައްކައުތެރިވުންކަން ފާހަގަކޮށް ޚުތުބާގައި ބުނީ ތައުޙީދުގެ ބައިތަކުގެ ތެރޭގައި ހިމެނޭ ތިން ބައިގައި ވެސް އެކަލާނގެ އެއްކައުވަންތަކޮށްގެން މެނުވީ މި މަތިވެރި އަގީދާ ހާސިލް ނުކުރެވޭނެ ކަމަށެވެ.

ވަރަށް ތަފްސީލްކޮށް ތައުޙީދުގެ ތިން ބައި ޚުތުބާގައި ހިއްސާކޮށްފައެވެ.

ކީރިތި ޤުރްއާނާއި، ކީރިތި ރަސޫލާ مُحَمَّدٌ صَلَّى اللهُ عَلَيْهِ وَسَلَّمَ ގެ ޙަދީޘްތަކުގެ އަލީގައި އިލްމުވެރިން ތައުޙީދު ބައްސަވާފައިވާއިރު ފުރަތަމަބަޔަކީ ރުބޫބިއްޔަތުގައި އެކަލާނގެ އެއްކައުވަންތަ ކުރުން ކަމަށާއި، އެއީ ﷲ سُبْحَانَهُ وَتَعَالَىއަށް ޚާއްސަވެގެންވާ ކަންކަމުގައި އެކަލާނގެއަށް ޝަރީކުކުރުމުން ދުރުހެލިވުން ކަމަށް ޚުތުބާގައި ފާހަގަކޮށްފައިވެއެވެ. އަދި ޚަލްގުކުރެއްވުމާއި، ދިރުއްވުމާއި، މަރުގެންނެވުމާއި، ރިޒުގުދެއްވުމާއި، ކައުނުގައިވާ ކަންކަން ތަދުބީރުކުރައްވައި ހިންގެވުމާއި މި އެންމެހައި ކަންކަން މިލްކުވެވޮޑިގެންވަނީ ހަމައެކަނި އެކަލާނގެއަށްކަމާއި، މިކަންކަމުގައި އެކަލާނގެއަށް އެއްވެސް ބައިވެރިޔަކު ނުވާކަމަށް ޝައްކެއްނެތި ގަބޫލުކުރުމެވެ.

ޚުތުބާގައި ބުނީ ތައުޙީދުގެ ދެވަނަ ބަޔަކީ ހުރިހައި އަޅުކަމެއް ހަމައެކަނި މާތް ﷲ އަށް އަދާކުރުން ކަމަށެވެ.

ތައުޙީދުލްއުލޫހިއްޔާއަކީ އަޅުކަމުގެ ގޮތުން ކުރެވޭ ހުރިހައި ކަމެއް އެކަލާނގެއަށް ޚާލިސްކުރުމާއެކު އަޅުކަމުގެ އެއްވެސް ކަމެއްގައި އެކަލާނގެ ފިޔަވައި އެހެން ފަރާތެއް ބައިވެރިކުރުމަކާނުލައި އަޅުކަންކުރުމެވެ. ނަމާދުކުރުމާއި، ރޯދަހިފުމާއި، ދުއާކުރުމާއި، ނަދުރުބުނުމާއި، ގުރުބާންކުރުމާއި، ބިރުވެތިވުމާއި، ކަންކަމުގައި ވާތްގަށް އެދި ދެންނެވުމާއި، އަޅުކަމުގެ ގޮތުން ކުރާ މި ފަދަ ހުރިހައި އަމަލެއް ހަމައެކަނި އެކަލާނގެއަށް ޚާލިސްކުރުން ކަމަށް ޚުތުބާގައި ބުނެފައިވެއެވެ. ﷲ سُبْحَانَهُ وَتَعَالَى ފޮނުއްވި އެންމެހައި ނަބީ ބޭކަލުންނާއި ރަސޫލުބޭކަލުން، އެބޭކަލުންގެ ގައުމުގެ މީސްތަކުންނަށް އެންމެ ބޮޑަށް ގޮވައިލައްވާން ޖެހިވަޑައިގަތީ ތައުޙީދުގެ މި ބަޔަށް ކަމަށް ޚުތުބާގައި ބުނެފައިވެއެވެ.

މީގެ އިތުރުން ޚުތުބާގައި ބުނީ ތައުޙީދުގެ ތިންވަނަ ބަޔަކީ ތައުޙީދުލްއަސްމާއި ވައްޞިފާތި ކަމަށެވެ. މާތް ﷲގެ އިސްމުފުޅުތަކާއި ސިފަފުޅުތަކުގައި އެކަލާނގެ އެއްކައުވަންތަކުރުމެވެ. އެންމެ ފުރިހަމަވެގެންވާ، މަތިވެރި ނަންފުޅުތަކާއި ސިފަފުޅުތަކެއް ލިބިވޮޑިގެންވަނީ ހަމައެކަނި އެކަލާނގެއަށްކަން ގަބޫލުކުރުމެވެ. ތައުޙީދުގެ މި ބަޔަށް އީމާންވުމުގައި ވަރަށް މުހިންމު ދެ އަސާސެއް ހިމެނޭކަން ފާހަގަކޮށް ޚުތުބާގައި ބުނީ ފުރަތަމަ އަސާސަކީ ﷲ سُبْحَانَهُ وَتَعَالَى އެކަލާނގެ ޛާތުފުޅަށް ނިސްބަތްކުރައްވައިފައިވާ ސިފަފުޅުތަކާއި، އަދި ނަބިއްޔާ مُحَمَّدٌ صَلَّى اللهُ عَلَيْهِ وَسَلَّمَގެ ޙަދީޘް ބަސްފުޅުތަކުގައި އައިސްފައިވާ އެކަލާނގެ ސިފަފުޅުތަކަށް އީމާންވުމެވެ. އެ ނަންފުޅުތަކާއި ސިފަފުޅުތައް ސާބިތުކުރާންވާނީ އެކަލާނގެ މަތިވެރިވަންތަކަމާއި ފުރިހަމަވަންތަކަމާ ލާއިޤުވެގެންވާ ގޮތުގެ މަތީންނެވެ. ދެވަނަ އަސާސަކީ އެންމެހައި މަހުލޫގުންގެ އުނިސިފަތަކާއި އެއް ވައްތަރުވުމުން އެކަލާނގެ ހުސްދުރުވެވޮޑިގެންވާކަން ގަބޫލުކުރުން ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ތައުޙީދުގެ މަތިވެރި އަސާސުގައި ހިފަހައްޓައިފި ނަމަ، އަހުރެމެންނަކީ ކާމިޔާބުވެފައިވާ ބަޔަކަށްވާނެ ކަމަށާއި، އަހުރެމެން ކުރާ ކޮންމެ އަމަލެއް الله سُبْحَانَهُ وَتَعَالَىއަށް ޚާލިސްކޮށް ޝިރުކުން އެއްކިބާ ކުރެވިއްޖެ ނަމަ، ސީދާމަގުގައި ފައިތިލަ ސާބިތުކޮށްފައިވާ ބާއްޖަވެރި ބަޔަކަށް ވާނެ ކަމަށެވެ. ނަމަވެސް މި މަތިވެރި އަގީދާ ދޫކޮށް ބާތިލު އަގީދާތަކަށް ތަބާވެ، الله سُبْحَانَهُ وَتَعَالَىގެ މަގަށް ފުރަގަސްދީ، ކުރާ އަމަލުތަކުގައި ޝިރުކު ހިމެނިއްޖެ ނަމަ، ހުރިހާ އަމަލުތަކެއް ބާތިލުވެ، ގެއްލެނިވެގެން ހިނގައިދާނެ ކަމަށް ޚުތުބާގައި ބުނެފައިވެއެވެ.