ގަރުދިޔަ ކައްކައިގެން ކެވޭނީ ވެސް ފްލެޓުތައް ދޫކޮށްގެން ކަމަށާއި، ސަރުކާރުން ޖަވާބުދާރީވުމަށް މުޒާހަރާގެ ބައިވެރިން ބުނެފިއެވެ.
ބުރާސްފަތި ދުވަހުގެ ރޭ 8:45 ގައި ލޮނުޒިޔާރަތްކޮޅުގައި ވަނީ ފުލެޓާއި ގޯތި މައްސަލައިގައި ސުލްހަވެރި މުޒާހަރާއެއް ކުރިއަށް ގެންގޮސްފައެވެ. މި މުޒާހަރާގައި ގިނަ އަދަދެއްގެ އާއްމު ރައްޔިތުން ބައިވެރިވެފައިވެއެވެ. މުޒާހަރާގެ ބައިވެރިން ތިބީ އެކިއެކި ޝުއޫރުތައް ލިޔެފައިވާ ބެނަރތަކާއި ޕޯސްޓަރުތައް ހިފައިގެންނެވެ.
މުޒަހާރާގެ ބައިވެރިން ވަނީ އެމީހުންގެ ޝުއޫރުތައް މީޑީއާތަކާ ހިއްސާކޮށްފައެވެ. އެ މީހުން ބުނެފައިވަނީ ރައީސް ޑރ.މުހައްމަދު މުއިއްޒު ވިދާޅުވި ގޮތަށް ރައްޔިތުންނަށް ލިބިފައި އޮތް އެއްޗެއް ލިބިފައި އޮތްތާކުން ދެއްވަންޖެހޭ ކަމަށެވެ. ރައްޔިތުންނަށް ދޫކޮށްފައިވާ އެގްރިމެންޓްތައް ހުސްލިޔުމެއްގެ ގޮތުގައި ދޫނުކުރުމަށް މުޒާހަރާގެ ބައިވެރިން ގޮވާލާފައިވެއެވެ.
ބައެއް މީހުން ބުނެފައިވަނީ 49 އަހަރު ފަހުން ލިބުނު ބޯހިޔާވަހިކަމަށް ވެސް މިސަރުކާރުން ހުރަސްއަޅާފައިވާ ކަމަށާއި، ފްލެޓު ދޫކުރުން ލަސްވާ ކޮންމެ ދުވަހަކީ އެމީހުންގެ ހައްގުތައް ގެއްލިގެންދާ ދުވަހެއް ކަމަށެވެ. ދިރިއުޅެމުން ގެންދަނީ ވަރަށް ދަތިހާލުގައި ކަމަށާއި، ކުލި ދައްކުމަށްފަހު އިތުރު ކަމެއް ކުރުމަށް އަތުގައި ފައިސާ ނުހުންނަ ކަމަށެވެ. އަދި ގަރުދިޔައާއި ބަތާއި ކެއްކެން ވެސް އޮތީ ބޯހިޔާވަހިކަން ލިބިގެން ކަމަށެވެ.
![](https://dyncz33htw1ec.cloudfront.net/posts/f4a8b067-5ea6-44ad-8484-5ae20ab6ef80.png)
މީގެ އިތުރުން ދަރިން ބޮޑެތިވެ ގިނަ ބަޔަކު އެއްތަނެއްގައި ދިރިއުޅެމުން ޖެހުމުން އިޖްތިމާއީ ގިނަ މައްސަލަތައް ކުރިމަތިވަމުންދާ ކަމަށް އެމީހުން ބުނެއެވެ.
މުޒާހަރާގެ ބައިވެރިން ބުނެފައިވަނީ ރައީސް މުއިއްޒު ވެރިކަމަށް ވަޑައިގެންނެވިފަހުން ފްލެޓުތަކަށް ވާނުވާ ނޭނގޭ ކަމަށެވެ. ރައީސް އަކަށް އެންމެ ފަސޭހައިން ފުއްދޭނެ ވައުދުފުޅަކީ ހަދާނިމިފައިވާ ފްލެޓުތައް ދޫކޮށްލުން ކަމަށް މުޒާހަރާގެ ބައިވެރިން ބުނެފައިވެއެވެ.
ފްލެޓުތައް ދޫކުރާނެ ދުވަހެއް ހާމަކުރުމަށް ސަރުކާރަށް ގޮވާލަމުންދާއިރު، ކުރީ ސަރުކާރުގައި ދޫކޮށްފައިވާ ބިންތައް ދޫކުރުމުގައި ވެސް ލަސްތައް ކުރިމަތިވެފައިވާ ކަމަށް ބުނެ ބައެއް މީހުން ވަނީ ކަންބޮޑުވުންފާޅު ކޮށްފައެވެ. ކުރީ ސަރުކާރުގައި ނުހިއްކާ ސަރަހައްދުތަކުން ބިން ދޫކޮށްފައިވާތީ މިސަރުކާރުގެ ބޭފުޅުން ފާޑު ވިދާޅުވުމަށްފަހު މިހާރު ހިއްކާފައިވާ ސަރަހައްދުތަކުން ވެސް ބިން މިސަރުކާރަށް ދޫކުރެވިފައިނުވާ ކަމަށާއި، އެމަސައްކަތް އަވަސް ކޮށްދިނުމަށް އެމީހުން ބުނެފައިވެއެވެ.
މީގެ އިތުރުން ވެސް ހައުސިން މިނިސްޓަރު ޑރ.އަލީ ހައިދަރުގެ އިސްތިއުފާ ވެސް މުޒާހަރާގެ ބައިވެރިން ވަނީ ގޮވާލާފައެވެ. އަދި މައްސަލައަށް ހައްލެއް ލިބެންދެން ސިލްސިލާ މުޒާހަރާތަކެއް ކުރިއަށް ގެންދާނެ ކަމަށް މުޒާހަރާގެ ބައިވެރިން ބުނެއެވެ.