ހިޔާ ފްލެޓްގައި ވެސް ބައެއް އާއްމުން އުޅެނީ ޕާޓްޝަން ޖަހައިގެން ކަމަށް އާޒިމް ވަނީ ވިދާޅުވެފަ
މާލެ ސިޓީގެ މޭޔަރ އާދަމް އާޒިމް ނޫސްވެރިންގެ ބައްދަލުވުމެއްގަިއ ވާހަކަދައްކަވަނީ
ގޯތި ލިބުނު މީހުން އަތުން ގޯތި އަތުލަން ވާނީ އެ ސަބަބު ސާފުކޮށް ވަކިވަކިން ކިޔާދިނުމަށް ފަހުގައި ކަމަށް މާލެސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން މޭޔަރ އާދަމް އާޒިމް ވިދާޅުވީ މާލޭގެ ރައްޔިތުންގެ ބޯހިޔާވަހިކަމުގެ މައްސަލަ ހައްލުނުވާ ކަމަށާއި އެ މަސައްކަތް ލަސްވަމުންދާތީ ކަންބޮޑުވެ ވަޑައިގަންނަވާ ކަމަށެވެ. އާޒިމް ވިދާޅުވީ ރައްޔިތުންގެ ބޯހިޔާވަހިކަމަށް ހައްލު ހޯދައިދިނުމަކީ އެމްޑީޕީގެ ސިޔާސަތެއް ކަމަށާއި އެކަމުގެ ހައްގުގައި އެމްޑީޕީން އަބަދުވެސް ވަކާލާތުކުރާނެ ކަމަށެވެ. އަދި އޭނާ މަޤާމަށް ވަޑައިގަތީ ވެސް ނިމިދިޔަ ސަރުކާރުން ދީފައިވާ ފްލެޓްތައް ހޯދާ ދިނުމަށް ކުރެވެން ހުރި ހުރިހާ މަސައްކަތެއް ކުރައްވާނެކަމުގެ ޔަޤީންކަމާއި އެކުގައި ކަމަށް ވިދާޅުވެފައެވެ. އެހެންކަމުން މިހާރު އާއްމުން އެ ކަންބޮޑުވުން ފާޅުކުރަމުންދާއިރު އެ ރައްޔިތުންނާއި އެކުގައި އެމަނިކުފާނު ހުންނަން ޖެހޭނެ ކަމަށް ޤަބޫލުކުރައްވާ ކަމަށް އޭނާ ވަނީ ވިދާޅުވެފައެވެ. އާޒިމް ވަނީ ސަރުކާރުން އެކަމަށް އިޖާބަ ނުދޭތީ ކަންބޮޑުވުން ފާޅުކުރައްވާފައެވެ.
އާޒިމް ވަނީ މާލޭގެ ބޯހިޔާވަހިކަމުގެ މައްސަލަ އޮތީ ވަރަށް ދަތި ހާލަތުގައި ކަމަށް ފާހަގަކުރައްވާފައެވެ. އެގޮތުން ހިޔާ ފްލެޓްގައި ވެސް ބައެއް އާއްމުން އުޅެނީ ޕާޓްޝަން ޖަހައިގެން ކަމަށް އާޒިމް ވަނީ ވިދާޅުވެފައެވެ.
ދާދިފަހުން އާޒިމް ވަނީ ގޯތި ލިބުނު މީހުންގެ ޝަކުވާތައް އަޑު އައްސަވާ ގޯތި ދިނުމުގެ މަރުހަލާ އަވަސްކުރުމަށް ގޮވާލައްވާ ނޫސްވެރިންގެ ބައްދަލުވުމެއްވެސް ބާއްވަވާފައެވެ. އެގޮތުން މުޅި ސަރުކާރުގެ ވަގުތު ހުސް ކުރައްވައިގެންވެސް ގެދޮރުވެރިކަމުގެ މައްސަލައަށް ޙައްލު ހޯދައިދިނުމަށް އާޒިމް ސަރުކާރަށް ގޮވާލެއްވިއެވެ. އާޒިމް ވިދާޅުވީ ރައްޔިތުންނަށް ދިމާވެފައިވާ ދަތިތައް ޙައްލު ނުކުރުމަށް ދައްކާ ބަހަނާ ރައްޔިތުން އަޑުއަހަން ބޭނުން ނުވާ ކަމަށެވެ. ފްލެޓު މައްސަލައަށް އަވަހަށް ގޮތެއް ނިންމައިދިނުމަށް އާޒިމް ވަނީ ސަރުކާރަށް ގޮވާލައްވާފައެވެ.
