ސްޕޭން އެފްއޭގެ ރައީސް 2 އަހަރަށް ސަސްޕެންޑްކޮށްފި

ބާރުތައް ނަހަމަ ގޮތުގައި ބޭނުންކުރި ކަމުގެ ކުށުގައި ސްޕޭނުގެ ފުޓްބޯލަ ފެޑަރޭޝަނުގެ ރައީސް ޕެޑްރޯ ރޮޗާ 2 އަހަރު ދުވަހަށް ސަސްޕެންޑްކޮށްފި އެވެ.

ސްޕޭނުގެ އެޑްމިނިސްޓްރޭޓިވް ޓްރައިބިއުނަލް އޮފް ސްޕޯޓްސްއިން އޭނާ ސަސްޕެންޑް މިކުރީ ޔޫރޯ ފުޓްބޯޅަ މުބާރާތް އެ ގައުމުން ކާމިޔާބު ކުރިތާ ތިން ދުވަސް ފަހުންނެވެ. ރޮޗާ ވަނީ ޓީމާއެކު އުފާފާޅު ކުރުމަަށް އިއްޔެ އާއި އޭގެ ކުރީ ދުވަހު ބޭއްވި ހަރަކާތްތަކުގައި ވެސް ބައިވެރިވެވަޑައިގެންފަ އެވެ. މި ގޮތުން ރަސްގެފާނުގެ ގަނޑުވަރާއި ބޮޑު ވަޒީރުގެ އޮފީހުގައި ބޭއްވި ހާއްސަ ރަސްމިއްޔާތުތަކުގެ އިތުރުން ޓީމާއެކު ޖަރުމަނުގައި ވެސް އޭނާ ހަރަކާތްތެރިވި އެވެ.

ރޮޗާ އަށް ރައީސްކަން އެންމެ ފުރަަތަމަ ދިނީ ވަގުތީ ގޮތުންނެވެ. އެއީ 2023 ވަނަ އަހަރުގެ ޖުލައި މަހު ނިމުނު ވޯލްޑްކަޕް ނިންމުމުގެ ރަސްމިއްޔާތުގައި އެ ގައުމުގެ އަންހެން ކުޅުންތެރިއަކަށް ބޮސްދިނުމާ ގުޅިގެން އުފެދުނު މައްސަަލަތަކުގެ އިތުރަށް ކޮރަޕްޝަނުގެ ތުހުމަތު ކުރެވި އޭރުގެ ރައީސް ލުއިސް ރުބިއަލެސް ސަސްޕެންޑްކޮށް ފަހު މަގާމުން ވަކިކުރުމުންނެވެ. ރޮޗާ އަށް ފަހުން ރައީސްކަން ދާއިމީކޮށް ދިން ނަމަވެސް އޭނާގެ މައްޗަށް ވަނީ ކޮރަޕްޝަނުގެ ތުހުމަތު ކުރެވިފަ އެވެ. މި ގޮތުން ރުބިއަލެސް އަށް ވަރަށް ބޮޑަށް ވާގިވެރިވާ މީހެއްގެ ގޮތުގައި އޭނާ ވަނީ ލޭބަލްކޮށްފަ އެވެެ. ނަމަވެސް ރޮޗާ އާއި ރުބިއަލެސް ވެސް ވަނީ ގޯސް އެއްވެސް ކަމެއް ނުކުރާ ކަމަށް ބުނެފަ އެވެ. މި ދެ މީހުންގެ މައްޗަށް ކުރެވޭ އެއް ތުހުމަަތަކީ ސްޕެނިޝް ސުޕަކަޕް ސައޫދީ އަރަބިއާގައި ބާއްވަން ފުރުސަތުދީ ފައިސާ ނެގި ކަމުގެ ތުހުމަތެވެ.

ރޮޗާ އަށް އޭނާގެ ސަސްޕެންޝަން އިސްތިއުނާފު ކުރެވޭނެ އެވެ. ނަމަވެސް މި ސަސްޕެންޝަނުގެ ސަބަބުން ކުރިއަށް އޮތް ސްޕެނިޝް އެފްއޭގެ އިންތިހާބުގައި ވާދަކުރުމުގެ ފުރުސަތު އޭނާ އަށް ބަންދުވުން ވަރަށް ގާތެވެ.