ގަވާއިދާ ހިލާފަށް ބޮޑެތި ވިޔަފާރި ހިންގަމުންދާ 118 ބިދޭސީން އަތުލައިގަނެފި
މާލޭގައި ހިންގާ 6 މާރުކޭޓު، 7 ރީޓައިލް ފިހާރަ، 17 ޓޭކްއަވޭ ފިހާރަ، 3 ސްޕަރ، 5 ކެފޭ، 1 ފަހާތަން އަދި 3 މޯބައިލް ފިހާރަ ބަލާ ފާސްކޮށްފައިވޭ
އިމިގްރޭޝަންގެ ބެލުމުގެ ދަށަށް ގެނައި މީހުންތައް ފުލުހުންގެ ވެހިކަލްއަށް އަރުވަނީ- ފައިލް ފޮޓޯ
ގަވާއިދާ ހިލާފަށް ވިޔަފާރި ހިންގަމުންދާ ބިދޭސީންނާ ދެކޮޅަށް ހިންގަމުންދާ އޮޕަރޭޝަންތަކުގައި މިހާތަނަށް 118 ބިދޭސީން ގެނެވިފައިވާ ކަމަށް މޯލްޑިވްސް އިމިގްރޭޝަނުން ބުނެފިއެވެ.
ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވީ ގަވާއިދާ ހިލާފަށް އުޅޭ ބިދޭސީންނާ ދެކޮޅަށް ކުރިއަށް ގެންދާ އޮޕަރޭޝަންތަކަކީ ކުރިއަށްދާ އޮޕަރޭޝަންތަކެއް ކަމަށެވެ. މިހާތަނަށް އައިރު ވިޔަފާރިތަކަށް ޚާއްސަކޮށްގެން 42 ރެއިޑް އޮޕަރޭޝަންތައް ކުރިއަށް ގެންގޮސްފައިވާ ކަަމަށް އޭނާ ވިދާޅުވިއެވެ.
ޝަމްއާން ވިދާޅުވީ މި އޮޕަރޭޝަންތަކުގައި މިހާތަނަށް 118 ބިދޭސީއަކު ގެނެވިފައިވާ ކަމަށާއި، މި މީހުން ފުރުވާލުމުގެ މަސައްކަތްތައް ކުރަމުންދާ ކަމަށެވެ.
ޝަމްއާން ވިދާޅުވީ ބަލާ ފާސްކުރެވުނު ތަންތަނުގެ ތެރޭގައި މާލޭގައި ހިންގާ 6 މާރުކޭޓު، 7 ރީޓައިލް ފިހާރަ 17 ޓޭކްއަވޭ ފިހާރަ، 3 ސްޕަރ، 5 ކެފޭ، 1 ފަހާތަން އަދި 3 މޯބައިލް ފިހާރަ ހިމެނޭ ކަމަށެވެ.
އިމިގްރޭޝަނުން ބުނީ މިވަގުތު ވިޔަފާރިތަކަށް ޚާއްސަކޮށްގެން މިގެންދާ އޮޕަރޭޝަންތަކުގައި 42 ރެއިޑެއް ޚާއްސަކޮށްފައި ވަނީ ސީދާ ވިޔަފާރިތަކާ މިފަދަ ވިޔަފާރިތަކާ ގުޅުންހުރި އޭރިޔާތަކަށް ކަމަށެވެ. އަދި ބޮޑަށް ޓާގެޓް ކުރަނީ އެންމެ އަދައިގެކޮށް ގަވާއިދާ ހިލާފުވާ މީހުންނަށް ވުރެ ބޮޑަށް ބޮޑަށް މެއިންކޮށް ޝާމިލްވާ މީހުންނަށް ކަމަށް އިމިގްރޭޝަނުން ބުނެއެވެ.
