ބްރެޒިލްގެ ޤައުމީ ޓީމުގެ ގޯލު ކީޕަރު ބެންޓޯ، ސައުދީ ޕްރޯ ލީގުގެ އަލް ނަސްރަށް ބަދަލުވާން އެއްބަސްވެއްޖެ އެވެ.
މީޑީއާ ތަކުގައި ރިޕޯޓުކޮށްފައިވާ ގޮތުން އުމުރުން 25 އަހަރުގެ ބެންޓޯ ހޯދުމަށް އަލް ނަސްރުން ކުރި މަސައްކަތުގައި މިހާރު ވަނީ އޭނާ އާއެކު އެއްބަސްވުމަކަށް އާދެވިފަ އެވެ. އެގޮތުން ބެންޓޯ ކުޅެމުން އަންނަ ބްރެޒިލްގެ އެތުލެޓިކޯ ފަރަނައެންސް އަށް 18 މިލިއަން ޔޫރޯ އަލް ނަސްރުން ދައްކާނެ ކަމަށް ވެސް ރިޕޯޓުތައް ބުނެ އެވެ. އަލް ނަސްރުން ބެންޓޯ ހޯދުމުގެ ޑީލް ކާމިޔާބު ކޮށްފައިވާއިރު، އެ ލީގުގެ އަލް އިއްތިހާދުން ވެސް އޭނާ ހޯދުމަށް މަސައްކަތް ކޮށްފައިވެ އެވެ.
ބެންޓޯ އަލް ނަސްރަށް ބަދަލުވާނީ ދިގު މުއްދަތެއްގެ އެއްބަސްވުމެއްގެ ދަށުންނެވެ. އެގޮތުން އެ ކުލަބާ އެކު ބެންޓޯ ސޮއި ކުރާ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުގެ ނިޔަލަށް ކަމަށް ވެސް ރިޕޯޓުތައް ބުނެ އެވެ. އަލް ނަސްރަށް ބަދަލުވުމުގެ ގޮތުން ފުރިހަމަ ކުރަން ޖެހޭ މެޑިކަލްގެ ކަންކަން ކުރިއަށް އޮތް ދުވަސްތަކުގެ ތެރޭގައި ބެންޓޯ ފުރިހަމަ ކުރާނެ ކަމަށާއި، އެއަށްފަހު ރަސްމީކޮށް އެއްބަސްވުމުގައި ސޮއި ކުރާނެ ކަމަށް ރިޕޯޓުތައް ބުނެ އެވެ.
ބްރެޒިލްގެ ޤައުމީ ޓީމުން ބެންޓޯ އަށް ޖާގަ ލިބުނީ މިދިޔަ އަހަރުގެ އޯގަސްޓު މަހުގެ ތެރޭގަ އެވެ. އޭރު ބްރެޒިލްގެ ވަގުތީ ކޯޗަކަށް ހުރި ފެނާންޑޯ ޑިނީޒް ވަނީ، 2026 ވަނަ އަހަރުގެ ފީފާ ވޯލްޑް ކަޕް ކޮލިފިކޭޝަންގެ މެޗުތަކަށް ބްރެޒިލް އިން އެކުލަވާލި ޓީމުގައި އޭނާ ހިމަނައިފަ އެވެ. އެއީ ބޮލީވިއާ އަދި ޕެރޫއާ ދެކޮޅަށް ކުޅުނު މެޗުތަކެވެ. ބްރެޒިލް ޤައުމީ ޓީމުގައި ބެންޓޯ ކުޅުނު އެންމެ ފުރަތަމަ މެޗަކީ މިއަހަރު އިންގްލެންޑާ ދެކޮޅަށް ކުޅުނު ބައިނަލްއަޤުވާމީ ރަޙުމަތްތެރިކަމުގެ މެޗެވެ. ދާދި ފަހުން ނިމުނު ދެކުނު އެމެރިކާ ސަރަހައްދުގެ ފުޓުބޯޅަ މުބާރާތް (ކޮޕާ އެމެރިކާ) އަށް ބްރެޒިލް އިން އެކުލަވާލި ސްކޮޑުގައި ވެސް ބެންޓޯ ހިމެނެ އެވެ.
