އިޒްރޭލު ސިފައިންގެ ހަމަލާ ތަކުގައި ގާޒާ ގައި ހުންނަ ފަލަސްތީނުގެ ރެފިއުޖިންނާ ބެހޭ އދ. ގެ މައި އިދާރާ މުޅިން ހަލާކުކޮށް ސުންނާފަތި ވެއްޖެ ކަމަށް އެ އިދާރާގެ ވެރިޔާ ފިލިއްޕޭ ލަޒަރިނީ ބުނެފިއެވެ.
އދ ގެ ވަސީލަތްތަކަކީ ހުރިހާ ހާލަތެއްގައި ވެސް ރައްކައުތެރިކަން ދޭން ޖެހޭ ތަންތަން ކަމުގައި ބައިނަލް އަގްވާމީ ގާނޫނު ބުނި ނަމަވެސް ގާޒާގައި ހުންނަ ރެފިއުޖީންނާ ބެހޭ އދ ގެ މައި މަރުކަޒަށް ދީފައިވާ ހަމަލާތަކުން އިޒްރޭލަކީ ބައިނަލް އަގްވާމީ ގާނޫނުތަކަށް އެއްވެސް ވަރެއްގެ އިހްތިރާމެއް ކުރާ ބައެއް ނޫންކަން މިކަމުންވެސް ހާމަވާ ކަމަށް އެ އިދާރާއިން ބުނެފައިވެއެވެ.
ޔޫއެން ރެފިއުޖީ އޭޖެންސީގެ ތަރުޖަމާނު ތަމާރާ އަލްރިފާއީ އަލްޖަޒީރާ އާ ވާހަކަ ދައްކަމުން ބުނި ގޮތުގައި ރެފިއުޖީންނާ ބެހޭ މައި އޮފީހަށް އެތައް ހަމަލާދީ އިޒްރޭލު ސިފައިން ހަލާކު ކޮށްލިއިރު އެ އޮފީހުގެ ދަށުން ހިނގަމުންދާ ފަލަސްތީނުގައި ހާލުގައި ޖެހިފައިވާ މީހުންނަށް ބޯހިޔާވަހިކަން ފޯރުކޮށްދޭ 190 ފެސިލިޓީ އަށް އިޒްރޭލުގެ ހަމަލާތަކުގެ ސަބަބުން ވަނީ ގެއްލުން ލިބިފައެވެ. އެއީ ގެދޮރު ގެއްލި ހާލުގައި ޖެހިފައިވާ ފަލަސްތީނު ރައްޔިތުންނަށް އެހީތެރިވާ ތަންތަނަށް އިޒްރޭލުން ދިން ހަމަލާތަކުގައި 500ށް ވުރެ ގިނަ މީހުން މަރުވެފައިވާ ކަމަށް ތަރުޖަމާން އަލް-ރިފާއީ ބުނެފައިވެއެވެ.
އދ. ގެ ދިދައިގެ ދަށުގައި ވަގުތީ ހިޔަލުގައި ތިބޭ މީހުންނަކީ ރައްކާތެރި ކަމާއި ހިމާޔަތް ލިބޭނެ ކަމަށް ތިބޭ ބައެއް ކަމަށް ވާއިރު، އެ ތަންތަނަކީ ބައިނަލް އަގްވާމީ ގާނޫނުގެ ދަށުން ރައްކައުތެރިކަން ލިބިގެންވާ ތަންތަން ކަމަށްވެސް އަލް-ރަފާއީ ބުންޏެވެ.
އެހެން ނަމަވެސް ވަގުތީ ހިޔާތަކަށް ގަސްދުގައި އިޒްރޭލް ސިފައިން ދިން ހަމަލާ ތަކުގައި އެތައް ސަތޭކަ ބަޔަކު މަރުވުމުގެ އިތުރުން 1600ށް ވުރެ ގިނަ މީހުން ޒަޚަމްވެފައިވާ ކަމަށްވެސް އޭނާ ބުންޏެވެ.
