ސައުލް ސެވިއްޔާ އަށް ބަދަލުވެއްޖެ

ސްޕެއިންގެ އެތުލެޓިކޯ މެޑްރިޑަށް ކުޅެމުން އައި މިޑްފީލްޑަރު ސައުލް ނިގޭޒް، ސެވިއްޔާ އަށް ބަދަލުވެއްޖެ އެވެ.

އުމުރުން 29 އަހަރުގެ ކުޅުންތެރިޔާ ސެވިއްޔާ އަަށް ބަދަލުވީ ލޯނު އެއްބަސްވުމެއްގެ ދަށުން، އެއް އަހަރުގެ މުއްދަތަކަށެވެ. އެ އެއްބަސްވުމުގެ މުއްދަތު 25-2024 ވަނަ ސީޒަންގެ ނިޔަލަށް ހަމަވާއިރު، އެއްބަސްވުން އިތުރު ކުރުމުގެ ފުރުސަތު ވެސް ސެވިއްޔާ އަށް އޮންނާނެ އެވެ. ސައުލް ސެވިއްޔާ އަށް ބަދަލުވެފައިވާއިރު، އެ ކުލަބުން ވަނީ އެކަން ރަސްމީކޮށް އިއުލާން ވެސް ކޮށްފަ އެވެ. މިއީ ސެވިއްޔާ އިން އައު ސީޒަނަށް ތައްޔާރުވުމުގެ ގޮތުން ސޮއި ހޯދި ހަތަރު ވަނަ ކުޅުންތެރިޔާ އެވެ.

މިއީ އެތުލެޓިކޯ އަށް ބަދަލުވުމަށްފަހު ސައުލް ވަނީ ލޯނު އެއްބަސްވުމެއްގެ ދަށުން ކުޅޭނެ ތިން ވަނަ ކުލަބެވެ. އެންމެ ފުރަތަމަ ލޯނު އެއްބަސްވުމެއްގެ ދަށުން 2013 ވަނަ އަހަރު އޭނާ ކުޅުނީ ސްޕެއިންގެ ރަޔޯ ވަޔެކާނޯ އަށެވެ. އޭގެ ފަހުން 2021 ވަނަ އަހަރު އޭނާ ވަނީ ލޯނު އެއްބަސްވުމެއްގެ ދަށުން ޗެލްސީ އަށް ވެސް ކުޅެފަ އެވެ. އޭގެ ފަހުން ސައުލް ވަނީ އަނެއްކާ ވެސް އެނބުރި އެތުލެޓިކޯ އަށް އައިސްފަ އެވެ. އެތުލެޓިކޯ އާއެކު ސައުލް ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރު އެވެ.

ސައުލް ވަނީ އެތުލެޓިކޯ އަށް ކުޅެދިން 12 ސީޒަންގެ ތެރޭގައި 427 މެޗު ކުޅެދީ 48 ލަނޑު ޖަހައިފަ އެވެ. އެ ކުލަބާ އެކު އޭނާ ވަނީ ހަ ތައްޓެއް ކާމިޔާބު ކޮށްފަ އެވެ. އޭގެ ތެރޭގައި ސްޕެނިޝް ލީގު، ކޮޕާ ޑެލް ރޭ، ސްޕެނިޝް ސުޕަ ކަޕް، ޔުއެފާ ޔޫރޮޕާ ލީގު އަދި ޔުއެފާ ސުޕަ ކަޕް ހިމެނެ އެވެ. މީގެ ތެރެއިން ޔޫރޮޕާ ލީގު ވަނީ ދެ ފަހަރެއްގެ މަތީން ކާމިޔާބު ކޮށްފަ އެވެ.