މެންޗެސްޓާ ސިޓީ އަށް ކުޅެމުން އަންނަ ނޮލީޓޯ ސެވިއްޔާ އަށް ވިއްކާލުމަށް އެ ކްލަބުން އެއްބަސްވެއްޖެ އެވެ.

ސެވިއްޔާގެ ރަސްމީ ވެބްސައިޓުގައި އާންމުކުރި ބަޔާނެއްގައި ބުނީ ނޮލީޓޯގެ ޓްރާންސްފާއާ ގުޅިގެން ސެވިއްޔާ އަދި ސިޓީ އެއްބަސްވުމަކަށް އައިސްފައިވާ ކަމަށާއި، ކުރިޔަށް އޮތް ދުވަސްތަކުގައި އޭނާ ކްލަބާއެކު މެޑިކަލް ހެދުމަށްފަހު އެއްބަސްވުމުގައި ސޮއިކުރާނެ ކަމަށެވެ.

މި އަހަރު އޮކްޓޯބަރު މަހު 31 އަހަރުވާ ނޮލީޓޯ އާދީއްތަ ދުވަހު މެޑިކަލް ފުރިހަމަކުރުމަށް ސެވިއްޔާ އަށް އަންނާނެ ކަމަށް އެ ކްލަބުން ބުނެއެވެ.

ބާސެލޯނާ އަށް މީގެކުރިން ކުޅެފައިވާ ނޮލީޓޯ ވަނީ ބެންފީކާ، ގްރަނަޑާ އަދި ސެލްޓަވިގޯ އަށްވެސް ކުޅެފައެވެ.

ނޮލީޓޯ ވަނީ ބެންފީކާގައި ހޭދަކުރި ދެ ސީޒަނުގައި ކުޅުނު 63 މެޗުގައި 16 ލަނޑު ކާމިޔާބުކޮށްފައެވެ. ގްރަނަޑާއަށް ކުޅުނު ސީޒަނުގައި އޭނާ ވަނީ ކުޅުނު 17 މެޗުގައި ތިން ލަނޑު ކާމިޔާބުކޮށްފައެވެ. ސެލްޓަ ވިގޯގައި ނޮލީޓޯ ތިން ސީޒަން ހޭދަކޮށްފައިވާއިރު، ނޮލީޓޯ ވަނީ ކުޅުނު 103 މެޗުގައި 39 ލަނޑު ކާމިޔާބުކޮށްފައެވެ.

ނޮލީޓޯ ސިޓީ އަށް ބަދަލުވީ މިދިޔަ ސީޒަނުގައެވެ. އެގޮތުން އޭނާ ވަނީ ސިޓީ އަށް ކުޅުނު 30 މެޗުގައި ހަ ލަނޑު ކާމިޔާބުކޮށްފައެވެ. މީގެއިތުރުން ނޮލީޓޯ ވަނީ ސްޕެއިން ގައުމީ ޓީމަށް ކުޅުނު 16 މެޗުގައި ހަ ލަނޑު ކާމިޔާބުކޮށްފައެވެ.

ނޮލީޓޯ ހޯދި ކާމިޔާބީތަކަށް ބަލާއިރު، އޭނާ ވަނީ ބެންފީކާއާއެކު ލީގު ކާމިޔާބުކޮށްފައެވެ. އަދި އޭނާ ވަނީ ބާސާއާއެކު ސްޕެނިޝް ލީގުވެސް އެއްފަހަރު ކާމިޔާބުކޮށްފައެވެ.