ފެނަކައިން އެޕްރިލް މަހު ހޯދަން އެދުނު މައުލޫމާތު ތަކެއް އަދިވެސް ނުލިބޭ - އޭސީސީ
އޭނާގެ ވާހަކައިގައި އެފަދަ ކަންކަމުގެ ސަބަބުން ވަރަށް ބޮޑަށް ދައުލަތުގެ ޚަރަދު ބޮޑުވާކަން ފާހަގަކުރެއްވި
މަޖިލީހުގެ އެސްއޯއީ ކޮމިޓީގައި އޭސީސީގެ މެމްބަރުން ބައިވެރިވެވަޑައިގަންނަވަނީ
ފެނަކައިން އެޕްރިލް މަހު ހޯދަން އެދުނު މައުލޫމާތުތަކެއް އަދިވެސް ނުލިބޭ ކަމަށް އޭސީސީ އިން ބުނެފިއެވެ.
ރައްޔިތުންގެ މަޖިލީހުގެ އިގުތިސާދީ ކޮމިޓީއަށް ވަޑައިގެން އޭސީސީގެ ރައީސް އާދަމް ޝާމިލް ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ.
ރައްޔިތުންގެ މަޖިލީހުގެ އިގުތިސާދީ ކޮމިޓީއަށް ވަޑައިގެން އޭސީސީގެ ރައީސް އާދަމް ޝާމިލް ވިދާޅުވީ ފެނަކައިގެ ނިމިދިޔަ މެނޭޖްމެންޓާއި މެދު ވަރަށް ގިނަ ޝަކުވާތައް ހުށަހަޅާފައިވާ ކަަމަށެވެ. އެކަމުގެ ސަބަބުން އެ މައްސަލަތަކާއި މެދު ވަކިގޮތަކަށް ޢަމަލުކޮށްފައިވާ ކަަމަށް އޭނާ ވިދާޅުވިއެވެ. އެކަމުގެ ސަބަބުން މައްސަލަތައް ބެލުމުގައި ކާމިޔާބީތައް ލިބުނު ކަމަށް ޝަމާލް ވަނީ ވިދާޅުވެފައެވެ. އަދި އެއް ބާވަތެއްގެ ގިނަ މައްސަލަ އޭސީސީ އަށް ހުށަހަޅަމުންދާ ކަމަށާއި އެ މައްސަލަތައް އޭސީސީން އެއްކޮށްލުމަށް ފަހު ބަލަމުންދާ ކަމަށް އޭނާ ވިދާޅުވިއެވެ. އަދި ފެނަކައިން ހޯދަން ބޭނުންވި މައުލޫމާތު ނުލިބުމުން ފެނަކައަށް ވަދެގެން ލިޔެކިޔުންތައް ހޯދައިގެން މައްސަލަތައް ބަލާފައިވާ ކަަމަށް އޭނާ ވިދާޅުވިއެވެ.
އޭސީސީގެ ނައިބު ރައީސް އަބްދުއް ސަލާމް ވިދާޅުވީ ފެނަކައިން އިންހައުސް މަޝްރޫޢުތައް ނެގުމުގެ ބޭނުމަކަށް ވަނީ ކުންފުންޏަށް ކޮންޓްރެކްޓް މުވައްޒަފުން ވަކި ބޭނުމެއްގައި ނެގުން ކަމަށް އޭނާ ވިދާޅުވިއެވެ. އޭގައި ސީދާ ބޭނުންވާ އަދަދެއް ކަނޑައަޅާފައި ނުހުންނަ ކަމަށާއި 15 މިލިއަނަށް ކުރިއަށް ގެންދެވޭ އިންޖީނުގޭގެ މަަސައްކަތް އެގޮތަށް ޢަަމަލުކުރުމުގެ ސަބަބުން ވަރަށް ބޮޑުތަނުން އިތުުރުވާ ކަމަށް އޭނާ ވިދާޅުވިއެވެ. އަދި މުވައްޒަފުންގެ ކެއުމަށް ބޭނުންވާ ފައިސާ ވެސް ޑަބަލްކޮށް ދީފައިވާކަން ފާހަގަކުރެވޭ ކަަމަށާއި މެޓީރިއަލް ގެންނަން ވެސް ބޮޑު ޚަރަދެއް ކުރާ ކަަމަށް އޭނާ ވަނީ ވިދާޅުވެފައެވެ. އެ މައްސަލަ ވަރަށް ގިނަ ޕްރޮޖެކްޓްތަކުގައި ފާހަގަކުރެވޭ ކަަމަށް އޭނާ ވިދާޅުވިއެވެ. އޭނާގެ ވާހަކައިގައި އެފަދަ ކަންކަމުގެ ސަބަބުން ވަރަށް ބޮޑަށް ދައުލަތުގެ ޚަރަދު ބޮޑުވާކަން ފާހަގަކުރެއްވިއެވެ.
