ޔޫރޯ އާއެކު ފުއެންޓޭ އަށް ޚާއްސަ ޝަރަފެއް

ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތް ސްޕެއިން އިން ކާމިޔާބު ކުރުމާއެކު، އެ ޓީމުގެ ކޯޗު ލުއިސް ޑި ލާ ފުއެންޓޭ އަށް ޚާއްސަ ޝަރަފެއް ލިބިއްޖެ އެވެ.

އުމުރުން 63 އަހަރުގެ ފުއެންޓޭ ސްޕެއިންގެ ކޯޗުކަމާ ހަވާލުވީ 2022 ވަނަ އަހަރުގެ ޑިސެމްބަރު މަހުގެ ތެރޭގަ އެވެ. އެއީ ފީފާ ވޯލްޑް ކަޕަށްފަހު، އެ ޓީމުގެ ކޯޗުކަމުން ލުއިސް އެންރީކޭ ވަކިވި ފަހުންނެވެ.

ޔޫރޯ ކާމިޔާބު ކުރުމާއެކު، ފުއެންޓޭ ވެގެން ގޮސްފައި ވަނީ 19 އަހަރުން ދަށުގެ ޔޫރޯ މުބާރާތް، 21 އަހަރުން ދަށުގެ ޔޫރޯ މުބާރާތް، ޔުއެފޭ ނޭޝަންސް ލީގު އަދި ޔޫރޯ ފުޓުބޯޅަ މުބާރާތް ކާމިޔާބު ކުރި ފުރަތަމަ ކޯޗަށެވެ.

ސްޕެއިންގެ ސީނިއަރ ޤައުމީ ޓީމާ ހަވާލުވުމުގެ ކުރިން ފުއެންޓޭ ވަނީ ޒުވާން އުމުރުފުރާގެ ޓީމުތަަކަށް އިރުޝާދު ދީފަ އެވެ. 19 އަހަރުން ދަށުގެ ޓީމާ އެކު ފުއެންޓޭ ވަނީ 2015 ވަނަ އަހަރު ޔޫރޯ ކާމިޔާބު ކޮށްފަ އެވެ. އޭގެ ފަހުން 2019 ވަނަ އަހަރު ވަނީ 21 އަހަރުން ދަށުގެ ޔޫރޯ ކާމިޔާބު ކޮށްފަ އެވެ. ސީނިއަރ ޓީމާ ހަވާލުވުމަށްފަހު، އޭނާ ވަނީ 23-2022 ވަނަ އަހަރުގެ ނޭޝަންސް ލީގު ކާމިޔާބު ކޮށްދީފަ އެވެ. އޭގެ ފަހުން މިއަހަރުގެ ޔޫރޯ ކާމިޔާބު ކޮށްފައި ވަނީ ސައްތައިން ސައްތަ ރެކޯޑާ އެކު އެވެ.

ސްޕެއިންގެ ކޯޗުކަމާ ފުއެންޓޭ ހަވާލުވީ ފަހުން އެ ޓީމުގެ ކުޅުން އޭނާ ވަނީ ވަރަށް ބޮޑަށް ރަނގަޅު ކޮށްފަ އެވެ. މިއަހަރުގެ ޔޫރޯ މުބާރާތާ ކުރިމަތިލީއިރު ވެސް، ސްޕެއިން އަކީ މުބާރާތް ކާމިޔާބު ކުރާނެ ޓީމުގެ ގޮތުގައި ގިނަ ބަޔަކު ފާހަގަކޮށްފައިވާ ޓީމެކެވެ.