އޮޑިޓް ރިޕޯޓު ހުށަހަޅާފައިނުވާ ތިން ސިޔާސީ ޕާޓީއެއް ބައިލައްކަ ރުފިޔާއިން ޖޫރިމަނާ ކޮށްފި
ޖޫރިމަނާކުރީ މޯލްޑިވްސް ތާރޑްވޭ ޑިމޮކްރެޓްސް، މޯލްޑިވްސް ނޭޝަނަލް ޕާޓީ އަދި ދަ ޑިމޮކްރެޓްސް
ދަ ޑިމޮކްރެޓްސް އުފެއްދުމަށް ބޭއްވި ޖަލްސާގެ ތެރެއިން، އެޕާޓީ ވެސް ވަނީ ޖޫރިމަނާ ކޮށްފައި
އޮޑިޓް ރިޕޯޓު ހުށަހަޅާފައިނުވާ ތިން ސިޔާސީ ޕާޓީއެއް ބައިލައްކަ ރުފިޔާއިން ޖޫރިމަނާ ކުރުމަށް އިލެކްޝަން ކޮމިޝަން (އީސީ)އިން ނިންމައިފިއެވެ.
އީސީން ބުނީ ސިޔާސީ ޕާޓީގެ ގާނޫނުގެ 42 ވަނަ މާއްދާގައިވާ ގޮތުގެމަތިން އޮޑިޓް ރިޕޯޓު ހުށަހަޅާފައި ނުވާތީ ސިޔާސީ ޕާޓީތަކުގެ ގާނޫނުގެ 44 ވަނަ މާއްދާގެ (ށ)އާ ހަވާލާދީ ތިރީގައިވާ 50،000 ރުފިޔާއިން ޖޫރިމަނާ ކުރުމަށް އީސީން ނިންމާފައިވާ ކަމަށެވެ.
އީސީން ބުނީ ޖޫރިމަނާ ކުރުމަށް ނިންމީ ތިން ސިޔާސީ ޕާޓީއެއް ކަމަށެވެ. އެއީ މޯލްޑިވްސް ތާރޑްވޭ ޑިމޮކްރެޓްސް، މޯލްޑިވްސް ނޭޝަނަލް ޕާޓީ އަދި ދަ ޑިމޮކްރެޓްސް އެވެ.
އީސީގެ މެމްބަރު ހަސަން ޒަކަރިއްޔާ ވިދާޅުވީ ގާނޫނުގައި ބުނާ މުއްދަތުގައި އޮޑިޓް ރިޕޯޓު ހުށަހަޅާފައިނުވާތީ ޖޫރިމަނާ ކުރުމަށް ނިންމީ ޖޫން މަހުގެ ފަހުކޮޅު ކޮމިޝަނުން ބޭއްވި ބައްދަލުވުމެއްގައި ކަމަށެވެ. އަދި އެކަން ޕާޓީތަކަށް ވެސް އަންގާފައިވާ ކަމަށެވެ. އަދި ވިދާޅުވީ ރިޕޯޓު ހުށަހެޅުމަށް އިތުރު ވަގުތު ނުދެވޭނެ ކަމަށާއި، ގާނޫނުގައި ބުނާ މުއްދަތުގެ ތެރޭގައި ރިޕޯޓު ހުށަހަޅަންޖެހޭނެ ކަމަށެވެ.
ގާނޫނުގައި ބުނާގޮތުން ކޮންމެ އަހަރެއް ނިމި 90 ދުވަހުގެ ތެރޭގައި އޮޑިޓަރަކު މެދުވެރިކޮށް ޕާޓީތައް އޮޑިޓްކުރުމަށްފަހު އޮޑިޓާ ޖެނެރަލްގެ އޮފީހަށް އެ އޮޑިޓް ރިޕޯޓު ހުށަހަޅަން ޖެހެއެވެ. އަދި ރިޕޯޓު ހުށަނާޅާ ސިޔާސީ ޕާޓީތައް 20،000 ރުފިޔާއާއި 50،000 ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ ބާރު އީސީއަށް ލިބެއެވެ.
