ފީބާ އަށާރަ އަހަރުން ދަށުގެ މުބާރާތުގައި ސައުތު އޭޝިއަން (ސާބާ) ކޮލިފައިންގެ ތިން ވަނަ ހޮވާ މެޗުން ރާއްޖޭގެ ބާސްކެޓު ޓީމު މޮޅުވެއްޖެ އެވެ.
ތިން ވަނަ ހޮވާ މެޗުގައި ހޮނިހިރު ދުވަހު ރާއްޖެ ނިކުތީ ބަންގްލަދޭޝްއާ ދެކޮޅަށެވެ. ރާއްޖެ އިން އެ މެޗު ކާމިޔާބު ކޮށްފައި ވަނީ 59-57ންނެވެ.
ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު މެޗުގައި ރާއްޖެ އިން ވަނީ ލީޑު ހިފަހައްޓައިގެން ކުޅެފަ އެވެ.
ޖުމުލަ ހަތަރު ޓީމު ވާދަކުރި މި މުބާރާތުން ރާއްޖެ އަށް ތިން ވަނަ ލިބުނުއިރު، ރާއްޖޭގެ ކޯޗަކަށް ހުރީ މިހާތަނަށް ރާއްޖޭގައި އުފެދުނު އެންމެ މޮޅު އެއް ބާސްކެޓު ކުޅުންތެރިޔާ، މުޙައްމަދު ޒިލާލް (ޒިލާ) އެވެ.
ލީގު އުސޫލުން ކުޅުނު މުބާރާތުގެ ލީގު ބުރުގައި ވެސް ރާއްޖެ އިން ވަނީ ބަންގްލަދޭޝްއާ ވާދަކޮށް މޮޅުވެފަ އެވެ. އެ މެޗު ރާއްޖެ އިން ކާމިޔާބު ކުރީ 66-55ންނެވެ. ލީގު ބުރުގައި އިންޑިއާ އަދި ސްރީ ލަންކާއާ ދެކޮޅަށް ކުޅުނު މެޗުން ރާއްޖެ ވަނީ ބަލިވެފަ އެވެ.
