އިޒްރޭލުން ހަމަލާދީ ލުބުނާނުން ދެ މީހުން މަރާލައިފި
ހަމަލާ ދިނީ ހަނގުރާމަވެރިންނަށް ކަމުގައި އިޒްރޭލުން ބުނާއިރު، މަރުވީ އާންމުންގެ ދެ މީހުން ކަމަށް ލުބުނާނުގެ އޮފިޝަލުން ބުނެއެވެ.
އިޒްރޭލުން ދެކުނު ލުބުނާންގެ ދާރު މިނާސް އަށް ދިން ބޮމުގެ ހަމަލާގެ ތެރެއިން
އިޒްރޭލުން ވައިގެ މަގުން ލުބްނާނަށް ހަމަލާ ދީ އާންމުންގެ ދެ މީހުން މަރާލައިފި ކަމަށް ލުބުނާގެ ސަލާމަތީ އޮފިޝަލުން ބުނެފިއެވެ.
ދެކުނު ލުބުނާންގެ ދާރު މިނާސް އަށް ހޮނިހިރު ދުވަހު ދިން މި ހަމަލާގައި މަރުވީ ގެންގުޅޭ ޖަނަވާރުތަކަށް ފެން ދިނުމަށް ފެން ބަލައި ގޮސް އުޅުނު ދެމީހުންނަށް ކަމަށް ލުބުނާންގެ އޮފިޝަލުން ވަނީ ބުނެފައެވެ.
ޑްރޯން ބޭނުން ކޮށްގެން އިޒްރޭލުން ދިން މި ހަމަލާގައި މަރުވީ އާންމުންގެ ދެ މީހުންކަން ލުބުނާންގެ އޮފިޝަލުން ކަށަވަރު ކޮށްދޭއިރު، އިޒްރޭލުން ބުނެފައިވަނީ ހަމަލާ ދިނީ ދެ ހަނގުރާމަވެރިންނަށް ކަމަށާއި އެމީހުން އުޅުނީ އިޒްރޭލަށް ހަމަލާ ދިނުމަށް ކަމަށެވެ.
ހުސްވި އަހަރުގެ އޮކްޓޯބަރު މަހުން ފެށިގެން އިޒްރޭލުން ލުބުނާނަށް ދެމުންދާ ހަމަލާ ތަކުގައި މިހާތަނަށް 500ށް ވުރެ ގިނަ މީހުން ލުބުނާނުން މަރުވެފައިވާ ކަމަށް އޭއެފްޕީ އިން ބުނެއެވެ. އޭގެ ތެރޭގައި ގިނަ އަދަދެއްގެ އާންމު ރައްޔިތުން ހިމެނެއެވެ.
ލުބުނާނުގެ ހަނގުރާމަވެރިންގެ ހަމަލާތަކުގައި މި މުއްދަތުގައި އިޒްރޭލުން 29 މީހުން މަރުވެފައި ވާއިރު އޭގެ ތެރޭގައި ގިނައީ އިޒްރޭލުގެ ސިފައިންނެވެ.
