ނޭޕާލްގެ ބޮޑު ވަޒީރު ޕުޝްޕާ ކަމާލް ދަހަލް ގެ އިތުބާރު ނެތް ކަމަށް އެ ގައުމުގެ ގާނޫނު ހަދާ މަޖިލީހުން ހުކުރު ދުވަހު ފާސް ކޮށްފިއެވެ.

އެއާ އެކު ހަމަ ނުޖެހުންތަކުގެ ތެރޭގައި ހިނގަމުން އައި 20 މަސް ދުވަސްވީ އޭނާގެ ސަރުކާރު ވަނީ ނިމުމަކަށް އައިސްފައެވެ.

މަޖިލީހުގެ މި ވޯޓާއެކު ނޭޕާލްގައި އަނެއްކާވެސް އުފެދެނީ ކޯލިޝަން ސަރުކާރެއް ކަމަށާއި އެ ކޯލިޝަންގެ ވެރިއަކަށް ހުންނަވާނީ ކޭޕީ ޝަރުމާ އޯލީ ކަމަށް ރޮއިޓާސް އިން ބުނެއެވެ.

އޯލީ އަކީ މީގެ ކުރިން ދެ ފަހަރެއްގެ މަތިން ނޭޕާލްގެ ބޮޑު ވަޒީރު ކަން ކުރައްވާފައިވާ ފަރާތެކެވެ.

ނޭޕާލް 239 އަހަރުވީ ރަސްކަން 2008 ވަނަ އަހަރު ނިމުމަކަށް އައި ފަހުން އެ ގައުމު ފާހަގަ ކުރެވިފައިވަނީ ސިޔާސީ ގޮތުން ހަމަ ނުޖެހުން ބޮޑު ގައުމެއްގެ ގޮތުގައެވެ. އަލަށް އެކުލަވާލެވޭ އޯލީ ގެ ސަރުކާރު ވެގެން ދާނީ ރަސްކަން އުވާލި ފަހުން އެގައުމަށް ގެންނަ 14 ވަނަ ސަރުކާރު ކަމުގައެވެ.

ނޭޕާލް އަކީ އިންޑިއާ އާއި ޗައިނާ އާއެކު ސަރަހައްދީ ރޮނގު ހިއްސާ ކުރާ ގައުމަކަށް ވުމުގެ އިތުރުން، އެ ދެ ގައުމުން ގިނަ އިންވެސްޓްމަންޓް ތަކެއް ކޮށްފައިވާ ގައުމަކަށް ވެފާ ނޭޕާލް ގުދުރަތީ ގޮތުން އޮންނަ ސަރަހައްދުގެ ގޮތުން އިންޑިއާ އިންނާއި ޗައިނާ އިންވެސް އެގައުމުގެ ސިޔާސީ މަސްރަހަށް ޚާއްސަ ޝައުގެއް ބަހައްޓާކަން ސިޔާސީ ތަޖުރިބާކާރުން ފާހަގަ ކުރެއެވެ.

ބޮޑު ވަޒީރު ދަހަލްގެ އިތުބާރު އޮތްތޯ ބެލުމަށް 275 ގޮނޑީގެ މައްޗަށް އެކުލެވޭ ނޭޕާލުގެ ގާނޫނު ހަދާ މަޖިލީހުގައި ނެގި ވޯޓުން އޭނާގެ އިތުބާރު އޮތް ކަމަށް ވޯޓު ދިނީ ހާޒިރުވެ ތިބި 258 މެމްބަރުންގެ ތެރެއިން އެންމެ 63 މެމްބަރުންނެވެ. އިތުބާރު ނެތް ކަމަށް 194 މެމްބަރުން ވޯޓު ދީފައިވެއެވެ.

ނޭޕާލްގެ ބޮޑުވަޒީރު ކަން ތިން ދައުރެއްގައި ކުރެއްވި އުމުރުން 69 އަހަރުގެ ދަހަލް 2022 ވަނަ އަހަރުގެ ޑިސެމްބަރު މަހު ފެށުނު އޭނާގެ އޭނާގެ 3 ވަނަ ދައުރުގައި، ތިން ފަހަރެއްގެ މަތިން ކޯލިޝަން ޕާޓްނަރުން ބަދަލު ކުރައްވާފައިވެއެވެ. އެއާއެކު އޭނާގެ ތިންވަނަ ދައުރުގެ ތެރޭގައި، ހުކުރު ދުވަހު ނެގި ވޯޓާ އެކު 3 ފަހަރުގެ މަތިން އިތުބާރު އޮތްތޯ މަޖިލީހުގައި ވޯޓް ނަގައިފައި ވެއެވެ.

އައު ސަރުކާރު އެކުލަވާލާ ސަރުކާރުގެ މަސައްކަތް ފަށާނެ ވަކި ތާރީޚެއް އަދި ކަނޑައަޅާފައެއް ނުވެއެވެ.