ފާޑުކިޔަސް އެމްބާޕޭ އާއި ގްރިއެޒްމަން ފުރަތަމަ 11ގައި ކުޅޭނެ: ޑެޝޯން
މި ދެ ކުޅުންތެރިން ފުރަތަމަ 11 އަށް އަރުވަންޖެހޭ ފަދަ ކުޅުމެއް މިހާތަނަށް ދައްކާފައިނުވާ ކަމަށް ބުނެ ގިނަ ބަޔަކު ދަނީ ފާޑުކިޔަމުން
(ކ_ވ) ގްރިއެޒްމަން އާއި އެމްބާޕޭ ފްރާންސްގެ ކޯޗާއެކު
ކިތަންމެ ވަރަކަށް ފާޑުކިޔަސް އޭނާގެ ކެޕްޓަން ކީލިއަން އެމްބާޕޭ އާއި ފޯވަޑް އެންޓޮއިން ގްރިއެޒްމަން ފްރާންސް ޓީމުގައި މިރޭ ސްޕޭނާ ދެކޮޅަށް ކުޅޭނެ ކަމަށް ކޯޗު ޑިޑިއޭ ޑެޝޯން ބުނެފި އެވެ.
ޔޫރޯ ފުޓްބޯޅަ މުބާރާތުގައި މިރޭ ސްޕޭނާ ދެކޮޅަށް ކުޅޭ މެޗުގައި މި ދެ ކުޅުންތެރިން ފުރަތަމަ 11 އަށް އަރުވަންޖެހޭ ފަދަ ކުޅުމެއް މިހާތަނަށް ދައްކާފައިނުވާ ކަމަށް ބުނެ ގިނަ ބަޔަކު ދަނީ ފާޑުކިޔަމުންނެވެ. ނަމަވެސް ޑެޝޯން ބުނީ ކުޅުންތެރިންނަކީ އަބަދު އެއްގޮތަކަށް ތިބޭނެ ބައެއްނޫން ކަމަށެވެ.
އޭނާ ބުނީ މުބާރާތުގައި މިހާތަނަށް ދެ ފޯވަޑުންނަށް ވެސް އެންމެ މޮޅަށް ނުކުޅެވޭކަން ގަބޫލުކުރާ ކަމަށާއި ނަމަވެސް އެ ދެ ކުޅުންތެރިން މިރޭ ފުރަތަމަ 11ގައި ކުޅޭނެ ކަމަށެވެ. ސަބަބަކީ އޭނާގެ ފުރިހަމަ އިތުބާރު ކުޅުންތެރިންނަށް އޮތުން ކަމަށެވެ.
އޭނާ ބުނީ މުބާރާތުގައި އެންމެ މޮޅު އެޓޭކިން ފުޓްބޯޅަ އެއް ކުޅޭ ޓީމަކީ ސްޕޭން ކަމަށެވެ. މިހެންވެ އެމީހުން ބަލިކުރެވޭނީ ފްރާންސްގެ ފަހަތް ވަރުގަދަކޮށްގެން ކަމަށެވެ.
