މާލީ ހާލަތު "ވާނުވާ" ގައި ބާއްވައިގެން ގައުމަށް ލިބޭނެ އެއްވެސް ކުރިއެރުމެއް ނެތްކަމަށް އެމްޑީޕީގެ ޗެއަރޕަރސަން ފައްޔާޒު އިސްމާއިލް ވިދާޅުވެއްޖެއެވެ.

ހޯމަ ދުވަހު އެކްސްގައި ފައްޔާޒު ކުރެއްވި ޕޯސްޓެއްގައި ވިދާޅުވީ، ނިޒާމަށް ބަދަލުތަކެއް އަންނަން ޖެހޭ ކަމަށާއި، ނަމަވެސް ކައުންސިލްގެ އަދަދު މަދުކުރުމާއި، މަޖިލިސް އަދަދު މަދުކުރުމާއި، މިކަންކަން ކުރުމުގެ ކުރިން ރައްޔިތުންގެ ހިޔާލާއި މަޝްވަރާ ފުޅާ ދާއިރާއެއްގައި ހޯދަން ޖެހޭ ކަމަށެވެ.

އެހެންނަމަވެސް ދެބޯގެރި ދުއްވުމުގެ ބަދަލުގައި މިހާރުން މިހާރަށް ކުރެވެން ހުރި ކަންކަން ކުރުން މުހިންމުކަންވެސް ފައްޔާޒު ފާހަގަ ކުރެއްވިއެވެ.

ފައްޔާޒު އިތުރަށް ވިދާޅުވީ، މާލިއްޔަތު ރަނގަޅު ކަމަށް ވަޒީރުން ވިދާޅުވާއިރު، އަނެއްކޮޅުން އާންމު ރައްޔިތުން ހިތި ބޭސް ބޯންޖެހޭ ވާހަކަވެސް ދައްކަމުންދާ ކަމަށެވެ. އެހެންކަމަށްވާނަމަ، މާލިއްޔަތު އަދި އިގްތިސާދު ރަނގަޅަށް އޮތަސް ރައްޔިތުން އަދި އިންވެސްޓަރުންނާއި ފައިނޭންސަރުންގެ އިތުބާރު ގެއްލި ނުބައި ދިމާލަކަށް ގޮސްދާނެކަން ފައްޔާޒު ފާހަގަ ކުރެއްވިއެވެ.

ފައްޔާޒު ވިދާޅުވި ގޮތުގައި ސަރުކާރުން ގެންނަށް ހުށަހަޅާފައި ހުރި ބަދަލުތަކުގައި އިހްލާސްތެރިކަމެއް ހުރިކަމަކަށް ނުފެނެއެވެ.

އޭގެއިތުރުން، ވިޔަފާރިތަކާއި ކިޔަވަން ބޭރުގައި ތިބި ދަރިވަރުންނަށް ދޭން ޖެހޭ ފައިސާ ދޭނެ ގޮތެއްގެ ވާހަކަ ސަރުކާރުން ހާމަކުރަން ޖެހޭކަން ފާހަގަ ކުރައްވައި ފައްޔާޒު ވިދާޅުވީ، އެކަންކަން ހަމަ ގައިމުވެސް ހުރީ ނުވެ ކަމަށެވެ.

މި ސަރުކާރުން އިތުބާރު ހޯދުމަށް ވައުދުވެފައިވާ ގޮތަށް ކަންކަން އަދި ހާލަތު އޮތްގޮތް މުޅިން ސާފުވާ ގޮތަށް ހާމަކުރަން ޖެހޭކަމަށްވެސް ފައްޔާޒު ވިދާޅުވިއެވެ. އެގޮތުން ސިޔާސީ މުވައްޒަފުންގެ އަދަދާއި، ރަށްރަށުގެ ކައުންސިލަރުން މަދުކުރުމުގެކުރިން ސިޔާސީ މުވައްޒަފުން ވައުދާ އެއްގޮތަށް މަދުކުރޭތޯ ސާފު ކޮށްދޭން ޖެހޭނެ ކަމަށް ފައްޔާޒު ވިދާޅުވިއެވެ.

ފައްޔާޒު ވިދާޅުވީ، މިކަންކަން ހާމަކުރުމަކީ އެއްވެސް ވަރަކަށް އުނދަގޫކަމެއް ނޫން ކަމަށާއި، އެއީ މިވަގުތުވެސް ސަރުކާރަށް އެނގެންޖެހޭ މައުލޫމާތު ކަމަށެވެ. އެ މައުލޫމާތުތައް ސަރުކާރަށް ނޭނގޭނަމަ އެއީ އަދި މާ ކަންބޮޑުވާންޖެހޭ ކަމެއްކަމަށްވެސް ފައްޔާޒު ވިދާޅުވިއެވެ.

އަދި އެމްޑީޕީން ރައްޔިތުން ބަލައިގަންނާނެ ހަރުދަނާ ބަދަލުތަކަކަށް މަރުހަބާ ކިޔާނެކަން ފާހަގަ ކުރައްވައި ފައްޔާޒު ވިދާޅުވީ، މާލީ ހާލަތު ‘ވާނުވާ’ ގައި ބާއްވައިގެން ގައުމަށް ލިބޭނެ އެއްވެސް ކުރިއެރުމެއް ނެތް ކަމަށެވެ.