ބޭރުގައި ކިޔަވަން ތިބި ދަރިވަރުން ނިކަމެތިވަމުންދާއިރު، އެ ވާހަކަ ދައްކަން މަޖިލީހުން ނުކުޅެދުމަކީ ހިތާމަހުރި ކަމެއް: ނާޒިލް

ރާއްޖެއިން ބޭރުގައި ކިޔަވަން ތިބި ދަރިވަރުންނާއި ދަރިވަރުންގެ އާއިލާތައް ނިކަމެތިވެ މަގުމަތިވަމުންދާއިރު، އެ ވާހަކަ ދައްކަން ރައްޔިތުންގެ މަޖިލީހުން ނުކުޅެދުމަކީ ހިތާމަހުރި ކަމެއްކަމަށް ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.

ނާޒިލް އެހެން ވިދާޅުވީ އެ ކަންބޮޑުވުން ފާޅުކޮށް އެމްޑީޕީން ހުށަހެޅި ކުއްލި މައްސަލަ ސަރުކާރުގެ މެމްބަރުންގެ ބާރުން ބޭރުކޮށްލުމާއި ގުޅިގެންނެވެ.

ނާޒިލް ވިދާޅުވީ، ހޯމަ ދުވަހުގެ އެޖެންޑާގައި އޮތީ ކޮޕީ ރައިޓްސް ބިލު އެކަނި ކަމަށާއި، މިއީ ނަމޫނާ މަޖިލީހަކަށް ވާނެކަމަށް ރިޔާސަތުން މީގެ ކުރިން ބުނެފައިވާ ކަމަށެވެ.

ނަމޫނާ ދެއްކެނީ ހަމައެކަނި ސަރުކާރުން ފޮނުވާ ބިލުތަކާ ޤަރާރުތަކާ ގުޅިގެންތޯ ނާޒިލް ވަނީ ސުވާލު ކުރައްވާފައެވެ.

ނާޒިލް ވިދާޅުވީ، މިއީ ނަމޫނާ މަޖިލީހެއްގެ ވާހަކަ ދައްކާއިރު ކަޅު، އަނދިރި ދުވަހެއް ކަމަށެވެ. އެގޮތުން ރާއްޖެއިން ބޭރުގައި ތިބި ދަރިވަރުންނާއި ދަރިވަރުންގެ އާއިލާތައް ނިކަމެތިވެ މަގުމަތި ކުރަމުންދާތީ އެ ވާހަކަ ދައްކަން މަޖިލީހުން ނުކުޅެދުމަކީ ހިތާމަހުރި ކަމެއްކަމަށް ނާޒިލް ވިދާޅުވިއެވެ.

ނާޒިލް ވިދާޅުވީ، ދަރިވަރުންގެ ތެރެއިން އެންމެ ބޭނުން ޖެހިފައިވާ ދަރިވަރުންނަށް ފައިސާ ޖަމާކުރަމުންދާކަމަށް ހަޔަރ އެޑިއުކޭޝަން މިނިސްޓަރ ވިދާޅުވެފައިވާ ކަމަށާއި، އެއީ ކޮން އުސޫލަކުން ކިހިނެއް ކުރަމުންދާ ކަމެއްކަންވެސް ސާފު ނުވާ ކަމަށެވެ.

މިއަދު އެތައް ދަރިވަރުންނަކަށް ފައިސާ ނުލިބި ނިކަމެތިވެފައިވާކަން މެމްބަރު ފާހަގަ ކުރެއްވިއެވެ.

މެމްބަރުގެ ވާހަކައިގެ މެދު ތެރެއިން ސަރުކާރުގެ މެމްބަރުން ވަނީ ތަކުރާރުކޮށް ނިޒާމީ މައްސަލަ ނަންގަވައި، ހުށަހެޅިފައިވާ ބިލާ ގުޅޭގޮތުން ނޫނީ ވާހަކަ ދެއްކިގެން ނުވާނެކަމަށް ވިދާޅުވެފައެވެ. ނިޒާމީ މައްސަލަ ބަލައިގަތުމުން ނާޒިލް ވިދާޅުވީ، ތަޅުމުގައި ދަނޑުވެރިކަމާއި އެނޫންވެސް އެތައް އިތުރު ދާއިރާތަކާ ގުޅޭ ވާހަކަ ދައްކާފައިވާ ކަމަށެވެ.