ބައިޑްން ހުންނެވީ ރިޔާސީ ރޭސް ދޫކުރައްވާ ގޮތަކަށް ނޫން

ޑޮނަލްޑް ޓްރަމްޕް އާއެކު ހުސްވި ހަފްތާގައި ކުރެއްވި ރިޔާސީ ބަހުސްގައި ހެއްދެވުނީ ގޯސް ކަމަށާއި އެހެން ނަމަވެސް ރިޔާސީ ރޭސް ދޫކޮށް ނުލައްވާ ކުރިއަށް ވަޑައިގަންނަވާނެ ކަމަށް އެމެރިކާގެ ރައީސް ޖޯ ބައިޑްން ވިދާޅުވެއްޖެއެވެ.

ސީއެންއެން އިން ބޭއްވި ރިޔާސީ ބަހުސަށްފަހު ބައިޑްން އިންތިޚާބު ކާމިޔާބު ކުރެއްވުމާ މެދު އޮތް އިތުބާރު ދައްވެ، ޑިމޮކްރެޓިކް ޕާޓީ އަށް ނިސްބަތްވާ ސެނެޓަރުންނާއި، ޑިމޮކްރަޓެކި ޕާޓީއަށް ފަންޑުހޯދުމުގައި އިސްކޮށް ހަރަކާތްތެރިވާ ބައެއް ބޮޑެތި ވިޔަފާރި ވެރިންވެސް ވަނީ ބައިޑްން ރޭހާ ދުރަށް ވަޑައިގަތުމަށް ފާޅުގައި ގޮވާ ލައިފައެވެ.

އެމެރިކާގެ ވިސްކޮންސިންގެ ރޭޑިއޯ ސްޓޭޝަނެއްގައި ވާހަކަފުޅު ދައްކަވަމުން ބައިޑްން ވިދާޅުވީ ބަހުސްގައި ރަނގަޅަށް ޕާފޯމް ނުކުރެއްވުނު ކަމަށެވެ. އެހެން ނަމަވެސް ރައްޔިތުން އޭނާ ޖަޖް ކުރަންވީ ވައިޓް ހައުސްގައި އޭނާ ހޭދަ ކުރެއްވި މުއްދަތުގައި ކުރެއްވި ޚިދުމަތައް ކަމަށް އޭނާ ވިދާޅުވިއެވެ.

ބަހުސްގައި ރަނގަޅަށް ފާފޯމް ނުކުރެއްވުމުގެ ސަބަބުން، ބައިޑްންގެ އަމިއްލަ ކެމްޕޭން ޓީމުގެ ތެރޭގައި ވެސް ނުތަނަވަސްކަން ފެތުރިފައި ވާ ކަމަށް ރިޕޯޓްތައް ބުނެއެވެ. ބީބީސީ އިން ބުނެފައިވާ ގޮތުގައި ބުދަ ދުވަހު ކެމްޕެއިން ޓީމު ހަމަޔަކަށަ އެޅުވުމަށް ބައިޑްން ވަނީ މަސައްކަތް ކުރައްވާފައެވެ.

ބުދަ ދުވަހު ކެމްޕޭންގެ މައި ޓީމާ ފޯނުން ގުޅުއްވާ، އޭނާ އަކީ، ޑިމޮކްރަޓިކް ޕާޓީގެ ރިޔާސީ ކެންޑިޑޭޓް ކަމަށާއި، ރޭސް ދޫކޮށް ނުލައްވާނެ ކަމަށް ބައިޑްން ވިދާޅުވި ކަމަށް ބައިޑްންގެ އަރިސް ފަރާތަކާ ހަވާލާ ދީ ބީބީސީ އިން ބުނެފައިވެއެވެ. ބައިޑްންގެ މި ކޯލް ގައި ނައިބު ރައީސް ކަމަލާ ހެރިސް ބައިވެރިވަޑައިގެންނެވި ކަމަށާއި، ކަމަލާ ހުންނެވީ ބައިޑްން އާ އެކު ގައި ކަމަށް ވިދާޅުވެ ޓީމާ ވާހަކަފުޅު ދެއްކެވި ކަމަށްވެސް ބީބީސީ އިން ބުނެފައި ވެއެވެ.

ބަހުސްގައި ބައިޑްން ގެ ފެންވަރު މާ ދައްކޮށް ފެނިގެން ދިޔުމާއެކު، ނޮވެމްބަރު މަހު އޮންނަ ރިޔާސީ އިންތިޚާބަށް ޑިމޮކްރަޓިކް ޕާޓީގެ ކެންޑިޑޭޓުގެ ގޮތުގައި ބައިޑްންގެ ބަދަލުގައި ނައިބު ރައީސް ކަމަލާ ހެރިސް ހަމަޖައްސަފާނެ ކަމުގެ އަޑުތައް ވެސް ވަނީ ފެތުރިފައެވެ.

ރިޔާސީ ބަހުސް ގައި އުމުރުން 81 އަހަރުގެ ބައިޑްން ހުއްޓުން އެރުމާއި، އަޑު ފަނޑުވެގެން ގޮސް ވިދާޅުވާ އެއްޗެއް ނޭގުން ފަދަ ކަންކަން ފެނިގެން ދިއުމުން އިންތިޚާބު ކާމިޔާބު ކުރެވިދާނެ ކަމާ މެދު ސުވާލު އުފެއްދުމުގެ އިތުރުން މަގާމަށް ބައިޑްން ފިޓް ވޭތޯ ވެސް ޑިމޮކްރެޓިކް ޕާޓީގެ އެތެރޭގައި ވާހަކަ ދެކެވިފައިވާ ކަމަށް ޚަބަރުތައް ބުނެއެވެ.

ބައިޑްން ރިޔާސީ ރޭސް ދޫކޮށްލުމަށް ގޮވާލާ އަޑު ގަދަވެގެން ގޮސްފައިވަނީ ބަހުސް އަށް ފަހު ނެގި އެކި ޕޮލް ތަކުން ޓްރަމްޕަށް ތާއީދު އިތުރުވި ކަން ހާމަ ވުމާއި އަދި ބައިޑްން އާ ޓްރަމްޕް އާ ދެމެދު ހުރި ތާއީދުގެ ފަރަގު ބޮޑުވެފައިވާ ކަން ހާމަވުމުންނެވެ.

ބަހުސަށް ފަހު ނިއުޔޯކް ޓައިމްސް އިން ކުރިއަށް ގެންދިޔަ ޕޮލް އެއް ގެ ނަތީޖާ ބުދަ ދުވަހު ޝާއިއު ކުރިއިރު، ޓްރަމްޕް އާއި ބައިޑްން ގެ ދެމެދުގައިވާ ތާއީދުގެ ފަރަގަށް ބަލާއިރު އެއީ މިހާތަނަށް ފެނުނު އެންމެ ފަރަގު ބޮޑު ނަތީޖާގެ ކަމަށް ނިއުޔޯކް ޓައިމްސް އިން ބުނެފައިވެއެވެ.