މަޖިލިސް މެމްބަރުން އިތުރުވަމުން ދަނީ އޮބި ނޯންނަ ވަރަށް، ތިބެން ޖެހެނީ 72-80 މެމްބަރުން - ނާޒިމް
މިހާރު މި ދާ ގޮތަށް ދާ ނަމަ 2029ގެ ނިޔަލަށް 108 ގޮނޑި އަދި 2033 ވަނަ އަހަރު 115 މެމްބަރުން މަޖިލީހަށް އަންނާނެ
ދިއްގަރު ދާއިރާގެ މެމްބަރު އަހުމަދު ނާޒިމް
ރައްޔިތުންގެ މަޖިލީހުގެ މެމްބަރުން އިތުރުވަމުން ދަނީ އޮބި ނޯންނަ ވަރަށް ކަމަށާއި މަޖިލީހުގެ މެމްބަރުން ތިބެން ޖެހެނީ 72 އާއި 80 އާއި ދެމެދުގެ އަދަދަކަށް ކަމަށް ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވެއްޖެއެވެ.
އޭނާ އެފަދައިން ވިދާޅުވީ ކޮންމެ 5 އަހަރަކުން އިތުރުވަމުންދާ ދިއުމާމެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވާފައިވާ ޤަރާރަށް ބަޙުސްކުރައްވަމުންނެވެ.
މިހާރު މި ދާ ގޮތަށް ދާ ނަމަ 2029ގެ ނިޔަލަށް 108 ގޮނޑި އަދި 2033 ވަނަ އަހަރު 115 މެމްބަރުން މަޖިލީހަށް އަންނާނެ ކަމަށާއި އެއީ އޮބި އޮންނަ ވަރުގެ ކަމެއް ނޫން ކަމަށް ނާޒިމް ވިދާޅުވިއެވެ.
ޤާނޫނު އަސާސީ ވުޖޫދަށް ގެނައުމުގެ މަސައްކަތް ކުރި ޚާއްސަ މަޖިލީހުގައި ވެސް ހިމެނިވަޑައިގަންނަވާ މެމްބަރެއްގެ ހައިސިއްޔަތުން އެ ޤަރާރަށް ބަހުސް ކުރާ އިރު އެމަނިކުފާނަކީ ވަރަށް ދޮށީ މީހެއް ކަމުގެ އިޙުސާސް ކުރެވޭ ކަމަށް ނާޒިމް ވިދާޅުވިއެވެ. މަޖިލީހުގެ މެމްބަރުންގެ އަދަދު އިތުރުވަމުން ދިއުމަކީ އެހެން ޤައުމުތަކުން ކުރިމަތިލާ ހައްލުކޮށްފައިވާ ކަމެއް ކަމަށް އޭނާ ވަނީ ވިދާޅުވެފައެވެ. މެމްބަރުން ގިނަވާ މައިގަނޑު ސަބަބަކީ ކޮންމެ 5000 ރައްޔިތަކަށް މެމްބަރެއް ހުންނަ ގޮތަށް އޮތުން ކަމަށާއި އެ ނޫން ސަބަބުތައް ވެސް އެބަ ހުރި ކަަމަށް ނާޒިމް ވިދާޅުވިއެވެ. ބައިނަލްްއަޤުވާމީ ގޮތުން މެމްބަރުން ކަނޑައެޅުމުގައި ކިއުބްރޫޓް ލޯ ބޭނުން ކުރާ ކަމަށާއި އެ މިންގަނޑުން ބަލާ ނަމަ ރާއްޖޭގެ މަޖިލީހުގައި ތިބެން ޖެހެނީ 72 މެމްބަރުން ކަމަށް އޭނާ ވަނީ ވިދާޅުވެފައެވެ. އެއީ ބޯހިމެނުމުގެ ނަތީޖާ އިން ޤައުމުގެ އާބާދީގެ ނިސްބަތަށް ބަލާ ނަމަ ކަމަށް އޭނާ ވިދާޅުވިއެވެ. އަދި މަސައްކަތް ކުރާ އާބާދީއަށް ބަލާ ނަމަ އެ އަދަދު ހުންނަން ވާނީ 73 އާއި 80 އާއި ދެމެދު ކަމަށް ވެސް ނާޒިމް ވިދާޅުވިއެވެ.
ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވާފައިވާ، ރައްޔިތުންގެ މަޖިލީހުގެ މެންބަރުންގެ ޢަދަދު ކޮންމެ 5 އަހަރަކުން އިތުރުވަމުންދާ ދިއުމާމެދު 20 ވަނަ ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ހުށަހަޅާ ޤަރާރުގެ އިބްތިދާއީ ބަހުސްގެ މަރުހަލާ ކުރިއަށް ގެންގޮސްފައި ވަނީ އަންގާރަ ދުވަހުއެވެ. އެ ގަރާރު ހުށަހަޅުއްވަމުން ޝުޖާއު ވިދާޅުވީ މަޖިލީހުގެ މެމްބަރުން ދައުރަކަށް ވުރެ ދައުރެއް އިތުރުވަމުން ދިއުމާއި މެދު މެމްބަރުން ދެކޭ ގޮތް ދެނެގަތުމަކީ މި ގަރާރުގެ މަޤްސަދެއް ކަމަށެވެ. ކޮންމެ 5 އަހަރަކުން މެމްބަރުން އިތުރުވަމުންދާ ދިއުމަކީ އެއީ ކަންބޮޑުވެވަޑައިގަންނަވާ ކަމެއް ކަމަށް ވެސް ޝުޖާއު ވިދާޅުވިއެވެ. ޝުޖާއު ވަނީ ދުނިޔޭގެ ނިސްބަތުން ބަލާ ނަމަވެސް ރާއްޖޭގެ މަޖިލީހަށް އައްޔަން ކުރާ މެމްބަރުންގެ އަދަދު އިތުރުކަމަށް ފާހަގަކުރައްވާފައެވެ. އަދި އެއީ ރައްޔިތުންގެ ބޮޑެތި ކަންބޮޑުވުމެއް ކަމަށް ޝުޖާއު ވަނީ ވިދާޅުވެފައެވެ.
