"މުއިއްޒު ވެރިކަމަށް ގެންނަން ނިދި ނަގާލާފައި މަސައްކަތް ކުރިން، މިއަދު އަސަރާއެކު ގޮވާލަން ބޭނުމީ އިސްތިއުފާ ދެއްވާށޭ"

ރައީސް ޑރ މުޙައްމަދު މުއިއްޒު ވައުދުވެވަޑައިގެންނެވީ ޑޮލަރުން މަސްވެރިންނަށް ފައިސާދެއްވަން ކަމަށާއި ނަމަވެސް ކުޑަމިނުން ރުފިޔާއިން ވެސް ފައިސާނުދޭ ކަމަށް ބުނެ މިއަދު މަސްވެރިން ތިބީ މާޔޫސްވެ، ސަރުކާރާމެދު ހިތްހަމަ ނުޖެހިފައެވެ. މަސްވެރިން މިއަދު ދަނީ އެ ހިތްހަމަ ނުޖެހުން އެކި ގޮތްގޮތުން ފާޅު ކުރަމުންނެވެ.

ތ ގުރައިދޫގެ ކެޔޮޅު ފިޔާޒުއަކީ ރައީސް ޑރ މުޙައްމަދު މުއިއްޒު ވެރިކަމަށް ގެނައުމަށް ވަރުގަދައަށް ކެމްޕޭން ކޮށްދިން މީހެކެވެ.

ރާއްޖެއެމްވީއާ ވާހަކަ ދައްކަމުން އޭނާ ބުނީ، މަސްވެރިންނަށް ފައިސާ ދެވެން ނުޖެހޭނެ އެއްވެސް ސަބަބެއް ނޯންނާނެ ކަމަށާއި، މަސްވެރިން އެދެމުންދަނީ މަސްވެރިން ކުރި މަސައްކަތަށް ޙައްޤުވާ އުޖޫރަ ދިނުމަށް ކަމަށެވެ.

އޭނާ ބުނީ، ސަރުކާރުގައި އެތައް ޑެޕިއުޓީ މިނިސްޓަރުންނެއް އެބަ ތިއްބެވި ކަމަށާއި، އެންމެ ކުޑަ މިނުން ސިޔާސީ މަޤާމުތަކުގެ އަދަދުވެސް މިއަދު ސާފެއް ނޫން ކަމަށެވެ. ނަމަވެސް ދައުލަތުގެ މާލިއްޔަތުން ސިޔާސީ މަޤާމުތަކަށް މުސާރަ ދެމުންދާއިރު، މަސްވެރިންގެ ފައިސާ ނުދޭތީ އޭނާ ވަނީ އެކަމުގެ ކަންބޮޑުވުން ފާޅުކޮށްފައެވެ.

އޭގެ އިތުރުން، އާމްދަނީ ނުލިބި، ބިލުތައް ނުދެއްކުމުގެ ސަބަބުން މަސްވެރިންނަށް ކުރިމަތިވަމުންދާ ތަކުލީފުތަކަށްވެސް އޭނާ ވަނީ އަލިއަޅުވާލާފައެވެ.

އޭނާ ވަނީ އެތައް އުއްމީދެއް ކޮށްގެން ގެނައި ސަރުކާރުގެ ބޭނުމަކީ މިއީތޯ މިއަދުގެ ރައީސުލްޖުމްހޫރިއްޔާއަށް ސުވާލު ކުރައްވާފައެވެ.

ހުދު އޭނާއަކީވެސް ރައީސް ޑރ މުޙައްމަދު މުއިއްޒު ވެރިކަމަށް ގެނައުމަށް ރެޔާއި ދުވާލު ނިދި ނަގާލައިގެން މަސައްކަތް ކޮށްދިން މީހެއްކަމަށް ތ ގުރައިދޫއަށް ނިސްބަތްވާ މި މަސްވެރިޔާ ކިޔާދެއެވެ.

އޭނާ އިތުރަށް ބުނީ، މަސްވެރިންގެ ކަންބޮޑުވުންތަކަށް ޙައްލު ހޯދައި ނުދެވޭނަމަ، މަޤާމުން އިސްތިއުފާ ދެއްވުމަށް އަސަރާ އެކު އެދޭ ކަމަށާއި، އެކަންކަން ކޮށްދެވޭނެ މީހަކާ ވެރިކަން ޙަވާލުކޮށްދެއްވުމަށް އެދޭ ކަމަށެވެ.

އޭނާ ބުނީ، މި ސަރުކާރު ވެރިކަމަށް ގެނައުމަށް މަސައްކަތް ކުރެވުނީތީ އޭނާ މިހާރު ހިތާމަ ކުރާ ކަމަށާއި، ރައްޔިތުންގެ ކިބައިންވެސް އެކަމަށް މާފަށް އެދޭ ކަމަށެވެ.

މިއީ މި ސަރުކާރު ވެރިކަމަށް ގެނައުމަށް ބުރަކޮށް މަސައްކަތް ކުރި މަސްވެރިންގެ މިއަދުގެ ޝުއޫރުތަކެވެ. މަސްވެރިން މިއަދު ތިބީ ނުހަނު މާޔޫސްވެ، ސަރުކާރު ދެކެ ފޫހިވެފައެވެ.