މި މައްސަލަ އާއި ގުޅިގެން ކަރެކްޝަންސްގެ ބައެއް މުވައްޒަފުން ވަނީ ހައްޔަރުކޮށްފަ
ކަރެކްޝަންގެ މުވައްޒަފުންގެ ބައިވެރިވުމާއި އެކު ޖަލަށް ފޯނާއި މަސްތުވާތަކެތި ވައްދަމުންދާ މައްސަލައިގައި ފުލުހުން ބޭއްވި ނޫސްވެރިންގެ ބައްދަލުވުން
ބޮޑެތި އަދަދުތަކުން ފައިސާ ދީގެން، ކަރެކްޝަންގެ 18 މުވައްޒަފުންގެ ބައިވެރިވުމާއި އެކު ޖަލަށް ފޯނާއި މަސްތުވާތަކެތި ވައްދަމުންދާކަމަށާއި މި އަހަރު އެކަނިވެސް އޮފިސަރުންނަށް 73.6 މިލިއަން ރުފިޔާ ލިބިފައިވާ ކަމަށް ފުލުހުން ހާމަކޮށްފިއެވެ.
ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ފުލުހުންގެ ކަންކަން ބެލެހެއްޓުމުގެ ޒިންމާ ހަވާލުވެފައިވާ، ދާޚިލީ ސަލާމަތާ ފަންނިއްޔާތާ ބެހޭ ވަޒީރު އަލީ އިހުސާން ވަނީ މިކަމާއި ގުޅޭ ތަފްސީލްތައް ހިއްސާކުރައްވާފައެވެ. އިހުސާން ވިދާޅުވީ ޔުނިފޯމް އެޅި މުއައްސަސާއެއްގައި ހަރަކާތްތެރިވާ އެއްވެސް މީހަކު ފައިސާއަށް ވިކުމަކީ އެއްވެސް ވަރަކަށް ތަޙައްމަލްކުރައްވާނެ ކަމެއް ނޫން ކަމަށެވެ. ޖަލުން ތަކުރާރުކޮށް ފޯނާއި މަސްތުވާތަކެތި ފެންނަމުންދާތީ އެ މައްސަލަ ހައްލުކުރުމަށް މަސައްކަތްތަކެއް ކުރަމުންދާ ކަމަށް އިހުސާން ވިދާޅުވިއެވެ. އެގޮތުން ކުރި މަސައްކަތުގެ ތެރެއިން، މީގެ ތިން މަސް ކުރިން ޖަލުގެ އޮފިސަރުންގެ ބައިވެރިވުމާއި އެކު އެފަދަ ކަންކަން ހިނގާކަން އެމަނިކުފާނުގެ ސަމާލުކަމަށް ފުލުހުންގެ އިންޓެލެޖެންސުން ގެނެސްފައިވާ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ އެ މައުލޫމާތުތައް ލިބުމާއި އެކު ފުލުހުންގެ އިންޓެލިޖެންސުން ޚާއްސަ މަސައްކަތަކެއް ކޮށްފައިވާ ކަމަށާއި އެ މަސައްކަތްތަކުގެ އަލީގައި ދެނެގަނެވުނު ކަންކަން އެމަނިކުފާނާއި ހިސާބަށް ފުލުހުން ގެނެސްފައި ވަނީ ބުދަ ދުވަހު ކަމަށެވެ.
އެ ނޫސްވެރިންގެ ބައްދަލުވުމުގައި ވާހަކަދައްކަވަމުން، އެސިސްޓެންޓް ކޮމިޝަނަރ އޮފް ޕޮލިސް އަބްދުﷲ ޝަރީފް ވަނީ އެ މައްސަލަ އާއި ގުޅިގެން ފުލުހުންނަށް ފާހަގަކުރެވޭ ކަންކަމަށް އަލިއަޅުވާލައްވާފައެވެ. އެގޮތުން މިހާތަނަށް އައި އިރު ބެލި ބެލުމުން ކަރެކްޝަންގެ 18 މުވައްޒަފެއްގެ އެކައުންޓަށް އާދަޔާއި ޚިލާފަށް ގިނައިން ފައިސާ ޖަމާވެފައި ހުރިކަން އެނގެން އެބަ އޮތް ކަމަށް އޭނާ ވިދާޅުވިއެވެ. އަދި އެއް މުވައްޒަފުގެ އެކައުންޓަށް ގާތްގަނޑަކަށް 24 މިލިއަން ރުފިޔާ ޖަމާވެފައިވާ ކަަމަށް ވެސް އޭނާ ވިދާޅުވިއެވެ. އަދި އެ 18 މުވައްޒަފުންގެ އެކައުންޓަށް އެކި ފަހަރު މަތިން ގާތްގަނޑަކަށް 73 މިލިއަން ރުފިޔާ އެ މުވައްޒަފުންގެ އެކައުންޓަށް ޖަމާކޮށްފައިވާ ކަމަށް އޭނާ ވަނީ ފާހަގަކުރައްވާފައެވެ.
މި މައްސަލަ އާއި ގުޅިގެން ކަރެކްޝަންސްގެ ބައެއް މުވައްޒަފުން ވަނީ ހައްޔަރުކޮށްފައެވެ. މި މައްސަލަ ތަހުގީގުކޮށް އަޅަން ޖެހޭ ފިޔަވަޅުތައް އަޅަމުންދާނެކަމުގެ ޔަޤީންކަން ފުލުހުން ވަނީ ދީފައެވެ.
