ސަރުކާރުން ވާ ކޮންމެ ވައުދެއް ތުރުކީ ހަނޑުލަށް ވީމަ ކަމަކުނުދާނެ: ފިއްޓެ
25 ޖޫން 2024 | އަންގާރަ 05:35ޙައްގު ހޯދުމަށް މަސްވެރިން ނުކުތުމުން މިއަދު ސަރުކާރުން މަސައްކަތް ކުރަނީ އެއީ ސިޔާސީ ކަމެއްކަމަށް ދެއްކުމަށް
ވައިކަރަދޫ ދާއިރާގެ މެމްބަރު ހުސައިން ޒިޔާދު އަންގާރަ ދުވަހުގެ ޖަލްސާގައި ވާހަކަ ދައްކަވަނީ
ސަރުކާރުން ވާ ކޮންމެ ވައުދެއް "ތުރުކީ ހަނޑުލަށް ވީމަ ކަމަކުނުދާނެ" ކަމަށް ވައިކަރަދޫ ދާއިރާގެ މެމްބަރު ހުސައިން ޒިޔާދު (ފިއްޓެ) ވިދާޅުވެއްޖެއެވެ.
މަސްވެރިންނަށް ދޭންޖެހޭ ފައިސާ ނުދޭ މައްސަލައިގައި އެމްޑީޕީން ހުށަހެޅި ކުއްލި މައްސަލައަށް ބަހުސް ކުރައްވަމުން މެމްބަރު ޒިޔާދު ވިދާޅުވީ، ޙައްގު ހޯދުމަށް މަސްވެރިން ނުކުތުމުން މިއަދު ސަރުކާރުން މަސައްކަތް ކުރަނީ އެއީ ސިޔާސީ ކަމެއްކަމަށް ދެއްކުމަށް ކަމަށެވެ.
މެމްބަރު ވިދާޅުވީ، 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމަކީ ރައީސް ޑރ މުޙައްމަދު މުއިއްޒުގެ ވައުދުފުޅެއް ކަމަށާއި، ނަމަވެސް އެ ވައުދުފުޅު ފުއްދަވައިދެވިފައި ނުވާ ކަމަށެވެ.
އެހެންކަމުން މިއަދު މަސްވެރިން އެދެނީ އެންމެ ކުޑަމިނުން ފައިސާ ލިބޭނެ ކަމުގެ ޔަޤީންކަމާއި ލިބޭނެ ދުވަހެއްކަން މެމްބަރު ފާހަގަ ކުރެއްވިއެވެ.
މެމްބަރު ވަނީ ސަރުކާރުން ވާ ކޮންމެ ވައުދެއް "ތުރުކީ ހަނޑުލަށް ވީމަ ކަމަކުނުދާނެ" ކަމަށް ވިދާޅުވެފައެވެ.
މެމްބަރު އެހެން ވިދާޅުވެފައިވާއިރު، ރާއްޖެ އަށް ބޭނުންވާ ވަރަށް ކާޑުގެ ބާވަތްތައް ގެންނަން ތުރުކީ ސަރުކާރާ އެކު އެއްބަސްވުމެއްގައި ސޮއިކޮށްފައިވާ ކަމަށް ރައީސް ވިދާޅުވި ނަމަވެސް އެކަން އެހެން ނުހިނގާތީ ގިނަ ބަޔަކު ވަނީ ސަރުކާރަށް ފާޑު ކިޔާފައެވެ.
މެމްބަރު އިތުރަށް ވިދާޅުވީ، މަސްވެރިން އެދެނީ ކުރި މަސައްކަތަށް ޙައްގުވާ އަގު ހޯދުމަށް ކަމަށާއި، ސަރުކާރުން އެކަން އަވަސްކުރަން ޖެހޭ ކަމަށެވެ.
