ކުރަން ޖެހިފައި އޮތީ އުނދަގޫ މަސައްކަތެއް: ޑަލިކް

ޖަރުމަނުގައި ކުރިއަށްދާ ޔޫރޯ ފުޓުބޯޅަ މުބާރާތުގައި ކުރިއަށް ދިޔުމަށްޓަކައި ކްރޮއޭޝިއާ އިން ކަރަން ޖެހިފައި ވަނީ ވަރަށް އުނދަގޫ މަސައްކަތެއްކަން އިނގޭ ކަމަށް އެ ޓީމުގެ ކޯޗު ލަޓްކޯ ޑަލިކް ބުނެފި އެވެ.

އޭނާ މިހެން ބުނީ މުބާރާތުގެ ގްރޫޕް ސްޓޭޖުގައި ކްރޮއޭޝިއާގެ ދެ ވަނަ މެޗުގައި އަލްބޭނިއާއާ ދެކޮޅަށް ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ މެޗަށް ނިކުންނައިރު، ކްރޮއޭޝިއާ އިން ވަނީ ފުރަތަަމަ މެޗުގައި ސްޕެއިންއާ ވާދަކޮށް ބަލިވެފަ އެވެ. އެހެންކަމުން މުބާރާތުގައި ކުރިއަށް ދިޔުމަށް އެ ޓީމަށް އަލްބޭނިއާ މެޗުން މޮޅުވުން މަޖުބޫރު ވާނެ އެވެ.

ޑަލިކް ބުނީ ކްރޮއޭޝިއާގެ ކުރިމަތީގައި އޮތް ޗެލެންްޖު ވަރަަށް ރަނގަޅަށް އިނގޭ ކަމަށެވެ. ގްރޫޕް ސްޓޭޖުގައި ކްރޮއޭޝިއާ އަށް ބާކީ އޮތް ދެ މެޗަކީ ވެސް ވަރަށް އުނދަގޫ ދެ މެޗު ކަމަށް ޑަލިކް ސިފަ ކުރި އެވެ. ނަމަވެސް ކްރޮއޭޝިއާގެ އުންމީދު ނުގެއްލޭ ކަމަށާއި، އެހެންކަމުން ހިތްވަރު އެލުވާލަން ޖެހޭ ސަބަބެއް ނެތް ކަމަށް ވެސް ޑަލިކް ބުންޏެވެ.

އިތުރަށް އޭނާ ބުނީ ކްރޮއޭޝިއާގެ ފުރަތަމަ އަމާޒަކީ މުބާރާތުގެ ގްރޫޕް ސްޓޭޖު ފަހަނަ އަޅާ ދިޔުން ކަމަށެވެ. އެހެންކަމުން އެކަން ޙާސިލު ކުރުމަށްޓަކައި ކުރަން ޖެހޭ ހުރިހާ ކަމެއް ވެސް، ގަދަ އަޅާ ކުރާނެ ކަމަށް ވެސް ޑަލިކް ވަނީ ބުނެފަ އެވެ. އޭނާ ބުނި ގޮތުގައި ކްރޮއޭޝިއާގެ ކުޅުންތެރިންނަށް އޭނާގެ ފުރިހަމަ އިތުބާރު އޮންނާނެ އެވެ.

މީގެ އިތުރުން ޑަލިކް ބުނީ ކްރޮއޭޝިއާގެ އަތް މަތިން އެއްވެސް ކަމެއް ނުގެއްލޭ ކަމަށާއި، އެ ޓީމަށް އުންމީދު ވެސް ނުގެއްލޭ ކަމަށެވެ. ކްރޮއޭޝިއާ އިން އެ ޓީމު ކުރަމުން އަންނަ މަސައްކަތް ރަނގަޅުކޮށް، އިތުރު ހިތްވަރެއް ލައިގެން ދެން އޮތް ދެ މެޗު ވެސް ކާމިޔާބު ކުރެވޭނެ ކަމަށް ޑަލިކް ބުންޏެވެ. އެހެންކަމުން އަލްބޭނިއާއާ ދެކޮޅަށް ކްރޮއޭޝިއާ އިން ނިކުންނާނީ ފުރިހަމަ އަށް ތައްޔާރުވެ ތިބެ ކަމަށް ވެސް އޭނާ ބުންޏެވެ.

ކްރޮއޭޝިއާ އިން އަލްބޭނިއާއާ ދެކޮޅަށް ނިކުންނާނީ ބުދަ ދުވަހުގެ ހަވީރު އެވެ.